2 पतरस 1 - चम्बयाली नौआ नियम

नमस्ते अते प्रार्थना नमस्ते

¹ मैं शमौन पतरस, मसीह यीशु रा सेवादार ते प्रेरित है। मैं तुसा सारेया जो ए चीठ्ठी लिख्खेया करदा है जे असा सांई तिस ही विश्वास बिच हिस्सेदार हिन, से विश्वास जे असा जो मसीह यीशु का मिल्ले रा है, असा रे प्रभु ते छुटकारा दैणे वाले, ते जे असा जो परमेश्वर रे सामणे धार्मिक ठैहरांदे।

² परमेश्वर जो असा रे प्रभु यीशु मसीह रे जरिए जानणे री वजह कने अनुग्रह ते सांती तुसा अन्दर बड़ी बदधी जाओ।

प्रभु रे पीच्छे चलणे वाले कुस तरिक्के कने जिन्दगी बिताणा चहिंदी ईश्वरीय बुलाहट ते चुणेया जाणा

³ परमेश्वर ने अपणी ताकत कने असा जो से सब किच्‍छ दित्ते रा है जिसेरी असा जो परमेश्वर जो खुस करणे तांइ भक्ति कने भरपूर जिन्दगी जीणे री जरुरत है। से ते परमेश्वर इक्क ही हिन जिन्हा ने असा जो अपणी महिमा ते भलाई री वजह कने तिन्हेरे अपणे मणू बणने तांइ सद्दे रा है।

⁴ ते तिन्हेरी महिमा ते भलाई री वजह कने तिन्हा ने असा कने बड़ा महान ते कीमती वादा कित्ते रा है। इन्हा वरदान्नां जो इस्तेमाल करी के असी सरीर री बुरी इच्छां का बची सकदे जिसेरी वजह कने दुनिया रे मणू बर्बाद होई जांदे। ते इन्हा रे जरिये मणू परमेश्वर रे स्वभाव बिच हिस्सेदार बनण।

⁵ किजोकी परमेश्वर बिच तुसा रा मकसद तिन्हा रे स्वभाव बिच हिस्सा लैणा है, इधेरे तांइ तुसा जो सिर्फ विश्वास ही नी करणा चाएदा पर तुसा जो दूज्जेयां कने भलाई करणे तांइ हमेसा भरपूर कोसीस करदे रैह्णा चाएदा। ते तुसा जो सिर्फ भलाई रे कम्म ही नी करणा चाएदे पर तुसा जो इदेय मणू भी बणना चाएदा जे मणू समजदारी कने रैह्णा जाणदे होण।

मसीह री महिमा

⁶ ते ज्ञान पर अप्पु पर काबू रखणा, ते अप्पु पर काबू रखणे पर मजबूती बधांदे रेयो, ते अपणी मजबूती पर भक्ति,

⁷ ते भक्ति पर भाईचारा बधांदे रेयो, ते भाईचारे पर प्यार भी बधांदे रेयो।

⁸ जे अगर तुसा इस तरिक्के कने जिन्दगी बितांदे रे, तां तुसा असा रे मसीह यीशु जो इस तरिक्के कने जाणना जिसेरी वजह कने तुसा बड़े फायदेमंद ते फलवंत बणना।

⁹ ते जे अगर कोई मणू इस तरिक्के कने ना जिये तां से अन्ने मणू रे बराबर है ते जे किच्‍छ नी दिख्खी सकदा। से भुल्ली गे रा है कि परमेश्वर ने तिसेरे पाप्पां जो माफ करी दित्ते रा है जे पाप तिसने मसीह बिच विश्वास करणे का पैल्ले कित्ते थिये।

¹⁰ इधेरे तांइ ओ संगी विश्वासियों, होर भी जादा कोसीस करो कि तुसा इस तरिक्के कने रेयो कि जिस कने लोक्कां जो पता चले कि हकीकत बिच परमेश्वर ने तुसा जो सद्देया ते चुणे रा है। जे अगर तुसा इय्यां करगे, तां तुसा कदी भी परमेश्वर का अलग नी होणा।

¹¹ ते परमेश्वर ने भी तुसा जो बड़ी खुसी कने स्वर्ग लेई आणा जित्ते मसीह यीशु रैह्‍न्दे, जे असा रे प्रभु ते जे असा जो छुटकारा दिंदे, ते जिन्हा ने इक्क राज्जे रे तौर पर हमेसा-हमेसा तिकर राज करणा।

पतरस रा आखरी समय

¹² हालांकि तुसा इन्हा गल्लां जो पैल्ले का जाणदे, ते तिन्हा शिक्षां जो मन्नेया करदे हिन जे तुसा जो मणूआं ने सिखाई री है, मैं तुसा जो तिन्हेरी याद दुआंदा रैह्‍ंगा।

^13-14 असा रे प्रभु मसीह यीशु ने ए गल्ल मेरे पर जाहिर कित्ते री है कि मैं तौले मरी जाणा। इधेरे तांइ मेरे जो लगदा कि अब्बे रा समय मेरे तांइ बदिया है कि जां तिकर मैं जिन्दा है तां तांइ तुसा जो तिन्हा शिक्षां री याद दुआंदा रेयां।

¹⁵ इधेरे तांइ मैं हल्ले चीठ्ठी लिख्खी करी तुसा जो ए दसणे री भरपूर कोसीस करेया करदा है, ताकि तुसा मेरे मरणे रे बाद इन्हा गल्लां जो याद रख्खी सको।

मसीह री महिमा रे दर्शन

¹⁶ जां असी प्रेरितां ने तुसा जो मसीह यीशु री ताकत ते तिन्हेरे हटणे रे बारे बिच दस्सेया थिया, तां असी तुसा जो चलाकी कने कोई मनघड़ंत कहाणी नी थिये सुणांदे। बल्कि असी मसीह री महिमा दिख्खे री है।

^17-18 असी तिस बेल्ले मसीह यीशु कने तिस पवित्र पहाड़ पर थिये जां पिता परमेश्वर ने तिन्हा जो आदरमान ते महिमा दित्ती थी। तां परमेश्वर, जे अप्पु महिमामय हिन, तिन्हा रे पास्से का ए अवाज आई, “ए मेरा प्यारा मुंडा है, जिस कने मैं बड़ा वरी खुस है!” असा ने अप्पु ए अवाज स्वर्ग का आंदी होई सूणी।

¹⁹ इधेरे तांइ असी भविष्यद्वक्तां री बोल्ले री गल्लां बिच होर भी जादा हिम्मत रखदे। जे अगर तुसा इस बसेख पर ध्यान दिंगे ता से बड़ी बदिया गल्ल होणी, किजोकी ए इक्क दीये सांई है जे न्याहरे बिच तां तांइ चमकदी जां तांइ दिन नी आई जांदा ते मसीह री रौसनी तुसा रे दिल बिच नी चमकदी, बिल्कुल तिय्यां ही जिय्यां भ्याग्गे रा तारा इस दुनिया बिच रौसनी लांदा।

²⁰ पर तुसा जो ए गल्ल समजणे री जरुरत है कि जे गल्लां भविष्यद्वक्तां ने बोल्ले री हिन, से तिन्हेरे अपणे मन रे ख्याल नी हिन।

²¹ किजोकी कदी भी कोई भविष्यवाणी अप्पु कुसकी मणू रे पास्से का नी हुंदी। पर पवित्रात्मा लोक्कां रे मन जो उकसाई दिंदा जिस बेल्ले से परमेश्वर रे बसेख जो सुणाया करदे हुंदे।