2 यूहन्ना 1 - चम्बयाली नौआ नियमनमस्ते अते प्रार्थना 1 मैं यूहन्ना, जे कलीसिया रा बुजुर्ग है, तिस जनानी जो जिस जो परमेश्वर ने चुणे रा है ते तिसेरे बच्चेयां जो ए चीठ्ठी लिख्खेया करदा है। मैं तिन्हा कने प्यार करदा, बल्कि सिर्फ मैं ही नी पर सारे तिन्हा कने प्यार करदे किजोकी असी सारे परमेश्वर री सच्चाई बिच विश्वास करदे। 2 असी तुसा जो प्यार करदे किजोकी असी सच्ची शिक्षा बिच विश्वास करदे ते असा ने हमेसा तिकर तिस शिक्षा बिच बणी रैह्णा। 3 पिता परमेश्वर ते तिन्हेरे पुत्तर मसीह यीशु रा अनुग्रह, दया ते सांती तिन्हा लोक्कां कने हमेसा-हमेसा तांइ बणी रे जे मणू सच्चाई ते प्यार बिच जिन्दगी बितांदे। सच्चाई ते प्यार 4 मैं बड़ा खुस होया जां मैं सूणेया कि तुसा रे बच्चे तिस सच्चाई रे हिसाब कने जिन्दगी जिया करदे हिन जिस जो मनणे रा हुकम परमेश्वर ने असा जो दित्ते रा है। 5 अते अवे ओ जनानिये, मैं तुसा जो जोर पाई करी बोलदा कि असा जो आपस बिच प्यार रखणा चाएदा। ए कोई नौआ हुकम नी है पर ए से ही हुकम है जे असा जो तां मिल्ली थी जां असा ने मसीह यीशु बिच विश्वास करणा सुरु कित्तेया थिया। 6 परमेश्वर जो सच्चा प्यार करणे रा मतलब ए ही है कि असी अपणी जिन्दगी तिय्यां ही जिए जिय्यां कि परमेश्वर ने असा जो जीणे तांइ बोल्ले रा है। जिस बेल्ले का तुसा ने मसीह यीशु बिच विश्वास कित्ते रा है तुसा तिस्सी बेल्ले का सुणे रा है कि परमेश्वर रा ए हुकम है कि तुसा जो हमेसा इक्क-दूए कने प्यार रखणा चाएदा। 7 मैं ए इधेरे तांइ बोलदा किजोकी लोक्कां जो झूठ्ठी शिक्षा देई करी भटकाणे वाले मणू दुनिया बिच जगाह्-जगह फैल्ली गेरे हिन। से बोलदे कि मसीह यीशु इक्क मणू रे रुप बिच दुनिया बिच नी आए थिये। जे अगर कोई मणू इदेइ गल्लां करदा तां से मणू मसीह विरोधी है जे लोक्कां जो भटकांदा। 8 इधेरे तांइ तुसा इदेय मणूआं का चुकन्ने रेयो कि से तुसा जो धोखा ना दैण ताकि परमेश्वर री सेवा करणे तांइ तुसा जे मैहनत कित्ते री है, से बेकार ना जाओ पर इसेरे बजाए परमेश्वर तुसा जो तुसा री सेवा रा ईनाम दे। 9 मैं तुसा जो बोलदा कि जे अगर कोई मणू मसीह यीशु री शिक्षा पर चलणा छड्डी दिंदा पर तिस शिक्षा बिच अपणी गल्लां भी जोड़ी दिंदा तां तिसेरा परमेश्वर कने कोई रिस्ता नी है। पर जे अगर कोई मणू मसीह री शिक्षा पर बराबर चलदा रैहन्दा तां तिस मणू रा पिता परमेश्वर ते तिन्हेरे पुत्तर मसीह यीशु कने रिस्ता है। 10 जे अगर कोई मणू तुसा जो मसीह री शिक्षा का कोई बखरी ही शिक्षा दे, तां ना ही तिस मणू जो अपणे घरे आणे देयो ते ना ही तिस कने कोई सलाम-दुआ रख्खी करी, तिसजो होर प्रोत्साहन देयो। 11 किजोकी जे अगर कोई मणू इदेय मणू कने सलाम-दुआ रखदा तां से मणू भी तिसेरे मणू रे बुरे कम्मां बिच जिम्मेदार ठैहरदा। आखरी नमस्ते 12 होर भी मती सारी गल्लां हिन जे मैं तुसा जो दसणा चाह्ंदा पर मैं तुसा जो से गल्लां इय्यां चीठ्ठी बिच लिख्खी करी नी बोलणा चाह्ंदा। मैं चाह्ंदा कि तित्ते तुसा का आई करी तुसा कने आमणे सामणे गल्ल करां, ताकि असी अप्पु-मिते खुसी मनाई सकण। 13 तेरी भैण रे बच्चे भी इत्ते ही हिन जिन्हा जो परमेश्वर ने चुणे रा है, से तेरे जो सलाम बोल्लेया करदे हिन। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.