2 कुरुन्थियों 6 - चम्बयाली नौआ नियम

¹ असी जे परमेश्वर रे सहकर्मी हिन, छंदे करी के समझादें की परमेश्वर री अनुग्रह जे तुसा पर है, तिसजो बेकार मत जाणा देयो।

² किजोकी पवित्रशास्त्र बिच परमेश्वर ता ए बोलदे, “ठीक समय पर मैं तेरी सुणी लित्ती, ते छुटकारे वाले दिन मैं तेरी मदद कित्ती, सुणो, अब्बे ए से ठीक समय है; सुणो, अब्बे से छुटकारे रा दिन है।”

³ परमेश्वर रे सहकर्मी होणे रे नात्ते असी कुसकी गल्ल बिच ठोक्कर खाणे रा कोई भी मौक्का नी दिदें, ताकि असा री सेवा पर कोई इल्जाम ना आये।

⁴ हर तरिक्के कने असी ए ज़ाहिर करदे कि असी परमेश्वर रे चुणे रे दास हिन, असी बड़े सबर कने दुखां, कमी-घटियां ते मुसीबतां जो सैह्‍ंदे।

^5-6 ते असी कोड़े खाणे कने, कैद होणे कने, हगांमेया कने, मैहनत करदे होए, जागदे रैह्णे कने, भूख्ख बिच, पवित्रता कने, ज्ञान कने, सबर कने, रहम कने, पवित्रात्मा कने अप्पु जो परमेश्वर रे चुणे रे दास साबित करदे।

^7-8 असी सच्चे प्यार कने, सच्चाई रे वचनां कने, परमेश्वर री ताकत कने, धार्मिकता रे हथियारां कने जे हमला करणे ते अपणी रक्षा करणे तांइ हिन, ते लोक्कां रा असा री इज्जत या बेइज्जती करणे रे जरिये, ते तिन्हेरे असा रे बारे बिच ठीक या बुरी गल्लां बोलणे रे जरिये भी अप्पु जो परमेश्वर रे चुणे रे दास साबित करदे। ते हालांकि असा जो ढोंगी समजेया गेया, पर असी सच ही बोलदे।

^9-10 किच्‍छ मणू असा जो ठीक जाण-पैछाण वालेयां सांई मिलदे, पर किच्‍छ मणू असा जो अनजाण लोक्कां सांई नजरंदाज करी दिंदे। असी मरणे रे करीब रैहन्दे, पर असी फिरी भी जिन्दे हिन। असा जो कुट्टेया गेया, पर असी फिरी भी नी मरे। असा रे दुखी होणे रा समय भी आया पर असी फिरी खुसी मनांदे। असी गरीब हिन, पर मते जणेया जो आत्मिक रुप बिच अमीर बणाई दिदें, असी इदेय हिन कि जिय्यां असा का किच्‍छ भी नी है, पर फिरी भी असी सब किच्‍छ रखदे। ते इन्हा ही सारे तरिक्के कने असी ए ज़ाहिर करदे कि असी परमेश्वर रे चुणे रे दास हिन।

¹¹ ओ कुरिन्थियों सहर रे विश्वासियों, असी तुसा कने खुली करी गल्लां कित्ती री हिन, असी तुसा जो खुले दिल कने प्यार करदे।

¹² असा रे दिल बिच तुसा तांइ प्यार री कोई कमी नी है, पर तुसा ने असा तांइ अपणे प्यार जो रोक्की रख्खे रा है।

¹³ पर तुसा जो अपणे बच्चे समजी करी मैं तुसा जो बोलदा की तुसा भी असा रे प्यार रे बदले बिच पर अपणे प्यार जो मत रोक्की रख्खो।

असी परमेश्वर रे मन्दिर हिन

¹⁴ अविश्वासी लोक्कां रे सहभागी मत बणो। किजोकी धार्मिकता ते अधार्मिकता रा कोई मेल जोल नी है, रौसनी या न्याहरे री कोई सगंती नी है।

¹⁵ ते मसीह यीशु जी रा शैतान कने कोई लैणा-दैणा नी है, ते विश्वासी कने अविश्वासी रा कोई नात्ता नी है।

¹⁶ ते मूर्तां कने परमेश्वर रे मन्दिर रा कोई रिस्ता नी। किजोकी असी ता जिन्दे परमेश्वर रे मन्दिर हिन, जिय्यां परमेश्वर ने बोल्ले रा है, “मैं तिन्हा लोक्कां बिच बसणा ते तिन्हा बिच चलणा-फिरणा, मैं तिन्हेरा परमेश्वर होण ते से मेरे मणू होणे।”

¹⁷ इस तांइ परमेश्वर पवित्रशास्त्र बिच असा जो बोलदे, “अविश्वासी लोक्कां रे बिच का निकलो ते बखरे रेयो ते भिठ्ठी चीजां री अराधना मत करो, तां मैं तुसा जो अपनाणा।

¹⁸ ते मैं तुसा रा प्यो होणा ते तुसा मेरे बच्चे-बच्चियां होणे, ए सर्वशक्तिमान प्रभु परमेश्वर रा वचन है।”