2 कुरुन्थियों 4 - चम्बयाली नौआ नियम

मिट्टी रे भाडेंया बिच धन

¹ इधेरे तांइ जां असा रे पर इदेयी दया होई कि असा जो परमेश्वर रा बसेख सुनाणे री सेवा मिल्ली तां असी हिम्मत नी हारदे।

² पर असा ने शरम रे ते गुप्त कम्मां जो छड्डी दित्तेया, अते न चलाकी कने चलदे, अते ना परमेश्वर रे वचन बिच हेराफेरी करदे, पर परमेश्वर रे सामणे असी सिर्फ सच बोलदे, ते असी लोक्कां रे विवेक बिच ए बिठाई दिंदे कि जे असी बोल्लेया करदे हिन से सच है।

³ जे सुब बसेख असी लोक्कां जो सुणांदे, से तिन्हा लोक्कां का लुके रा है जे हमेसा री मौत रे रस्ते पर हिन।

⁴ शैतान, जे इस दुनिया रे लोक्कां रा शासक है, तिनिये मसीह यीशु बिच विश्वास ना करणे वाले लोक्कां री समझ जो मंद करी रख्खे रा है, ताकि से मणू सुब बसेख री महिमामय रौसनी जो नी दिख्खी सके। से मणू मसीह यीशु रे इस महिमा रे बसेख जो नी समजदे जे परमेश्वर रे प्रतीरुप हिन।

⁵ दिख्खो, असी लोक्कां बिच जाई-जाई करी अपणे बारे बिच प्रचार नी करेया करदे हिन। असी मसीह यीशु रा प्रचार करेया करदे हिन, ते मसीह रे खातिर असी तुसा रे सेवक हिन।

⁶ किजोकी परमेश्वर ने ही बोल्ले रा है, “न्याहरे बिच रौसनी चमके।” ते से ही असा रे दिल बिच चमकी, ताकि असी मसीह बिच परमेश्वर री महिमा जो दिख्खी सकण।

⁷ असी मिट्टी रे भांडेया सांई हिन जिन्हा बिच इस धन्न जो जमा करी के रख्खेया गे रा है, किजोकी ए असीम ताकत असा रे पास्से का नी पर परमेश्वर रे पास्से का है।

⁸ असी चौं पास्से का तकलिफां ता भोगदे, पर असी खतरे बिच नी पैंदे। असी घबराये रे ता हिन, पर निरास नी हिन।

⁹ सताए ता जान्दे, पर छड्डे नी जांदे, झुकाये तां जांदे, पर नास नी होये हिन

¹⁰ असी हर बेल्ले मसीह यीशु री तकलिफां ते मरणे रे अनुभव जो अपणे सरीर बिच महसूस करदे ताकि मणू मसीह यीशु रे जिन्दगी जो असा रे कम्मां रे जरिये जाणी सकण।

¹¹ हाँ, असी हमेसा मौत रे खतरे बिच रैहन्दे किजोकी असी मसीह यीशु रा सुब बसेख सुणांदे ताकि मसीह यीशु री जिन्दगी असा रे कम्मां रे जरिये लोक्कां पर ज़ाहिर हो।

¹² तां असी मौत रे खतरे बिच रैहन्दे पर इसेरा नतीज्जा ए होया कि तुसा जो हमेसा रा जीवन मिल्लेया।

¹³ पर असी प्रचार करणा जारी रखदे किजो असा बिच तैसा ही विश्वास है जैसा तिस भजनकार बिच थिया जां तिनिये ए लिख्खेया, “मैं परमेश्वर पर विश्वास कित्तेया, इधेरे तांइ मैं बोल्लेया, इधेरे तांइ असी भी विश्वास करदे ते बोलदे।”

¹⁴ अते ए जाणदे कि जिनिये प्रभु यीशु जो मरे रे लोक्कां बिच का जिंदा कित्तेया, तिन्हा ने ही असा जो भी तिय्यां ही जिंदा करणा, ते परमेश्वर ने असा जो तुसा कने कठ्ठे करी के लेई आणा ते असी तिन्हेरी मौजुदगी बिच हाजिर रैह्ण।

¹⁵ जे किच्‍छ असा कने घटे रा है, से तुसा रे फायदे तांइ ही हिन ताकि जिय्यां परमेश्वर रा अनुग्रह जादा का जादा लोक्कां जो मसीह बिच लेई आया करदा है तिस कने मते लोक्कां ने परमेश्वर रा तिन्हेरी महिमा तांइ शुकर करणा।

¹⁶ इधेरे तांइ असी हिम्मत नी हारदे, हालांकि असा रा सरीर मुकेया करदा है पर असा अंदर असा री आत्‍मा हर रोज नौई हुंदी जांदी।

¹⁷ किजोकी असा री मुसीबतां छोटी हिन ते तिन्हा ने जादा हाण तांइ नी रैह्णा किजोकी तिन्हेरे अंजाम “हमेसा री महिमा” होणा, जे तिस हर कुसकी चीज का बड्डी भी है, जिसेरे बारे बिच असी कदी सोच्ची भी नी सकदे।

¹⁸ अते असा तां दिख्खी री चीजां जो नी पर अण-दिख्खी चीजां जो दिखदे रैह्‍न्दे, किजोकी दिख्खी री चीजां थोड़े ही रोज री हिन, पर अणदिख्खी चीजां हमेसा बणी रेह्न्दी।