2 कुरुन्थियों 10 - चम्बयाली नौआ नियम

पौलुस इक्क सच्चा प्रेरित पौलुस रा हक्क

¹ मैं पौलुस, तुसा का मसीह यीशु री दयालुता ते निमतेपन कने बिनती करदा, हालांकि मेरे जो इस गल्ल रा एहसास है कि तुसा लोक्कां जो ए लगदा कि मैं आमणे-सामणे गल्ल करणे बिच डरपोक है, ते सिर्फ चीठ्ठी लिख्खी करी गल्लां समझाणे बिच बड़ी हिम्मत रखदा।

² मैं तुसा रे छंदे करदा कि जां मैं तुसा का आं, तां मेरे जो तिन्हा लोक्कां कने कड़ाई कने गल्ल ना करणा पये, जे ए सोचदे कि असी दुनियावी तौर-तरिक्के रे हिसाब कने चलदे।

³ हालांकि असी इस दुनिया बिच रैहन्दे, पर असी इस दुनिया रे बाकि लोक्कां सांई लड़दे-झगड़दे नी।

⁴ असी इन्सानी विचारां ते झूठ्ठी बैह्सबाजी जो नास करणे तांइ दुनियावी हथियारां रा नी, बल्कि परमेश्वर रे ताकतवर हथियारां रा इस्तेमाल करदे।

⁵ असी इन्सानी बैह्सबाजी ते घमंड री वजह कने आणे वाली हर इक्क बाधा जो तोड़ी दिंदे जे लोक्कां जो परमेश्वर जो जानणे का दुर रखदी। ते असी तिन्हेरे हर इक्क चाहत जो काबू बिच करी के, तिन्हा जो मसीह यीशु री गल्ल मनणे वाले बणांदे।

⁶ ते जां से पूरी तरिक्के कने मसीह रे हुकम मनणे वाले बणी जांदे, तां असी तैयार रैहन्दे कि मसीह यीशु रे हुकमां जो ना मनणे वाले जो सजा दिंदे।

⁷ तुसा बाहरी दिखावट पर ध्यान दिंदे। जे अगर कुसकी मणू जो अप्पु पर ए भरोस्सा हो, कि से मसीह यीशु रा है, तां से ए भी जाणी लेयो कि जिय्यां से मसीह यीशु रा है, तिय्यां ही असी भी मसीह यीशु रे हिन।

⁸ किजोकी अगर मैं तिस हक रे बारे बिच होर भी गर्व करां, जे प्रभु ने असा जो तुसा रे विश्वास जो घटाणे तांइ नी पर तुसा रे विश्वास जो बधाणे तांइ दित्ते रा है, तां मैं शर्मिंदा नी होणा।

⁹ मैं अपणी चीठ्ठियां रे जरिये तुसा जो डराणे री कोसीस नी है करेया करदा।

¹⁰ किजोकी तुसा बिच का मते जणे बोलदे, कि मेरी चीठ्ठियां तां बड़ी कड़क ते जोरदार हिन, पर जिस बेल्ले मैं आमणे-सामणे मिलदा, तां कमजोर ते गल्ल-बात करणे बिच बेकार लगदा।

¹¹ जे इय्यां बोलदे, से ए समजी रख्खे कि जिय्यां पिठ्ठी पीच्छे चीठ्ठियां बिच असा रे बसेख हिन, तिय्यां ही तुसा सामणे असा रे कम्म भी होणे।

¹² किजोकी असा जो ए हिम्मत नी है कि असी अप्पु जो तिन्हा बिच का किच्‍छ इदेय जणेया कने गिणन या तिन्हा बिच अप्पु जो मिलाण, जे अपणी तारिफ अप्पु करदे, ते अपणे आप जो अप्पु-मिते नाप्पी-तोल्ली करी इक्क-दूज्जे कने बराबरी करी के बेवकूफ ठेहरदे।

¹³ असी तां तिस कम्म री सीमा का बाहर कदी भी गर्व नी करणा जे कम्म परमेश्वर ने असा जो दित्ते रा है, पर तिस्सी सीमा तक जे परमेश्वर ने असा तांइ ठैहराई दित्ते री है, ते तिस बिच तुसा भी आई गेरे हिन, ते तिन्हा कम्मां री सीमा बिच ही गर्व भी करणा।

¹⁴ जां असी पैल्ली वरी तुसा का पूज्जे, तां असी गर्व करणे बिच तिस सीमा जो नी टप्पेया, जित्ते परमेश्वर ने असा जो कम्म करणे तांइ नी ठैहराया थिया। तिन्हा ने असा जो तुसा रे इलाक्के बिच कम्म करणे तांइ ठैहराया थिया, ते असी तुसा जो मसीह रा सुब बसेख दसणे वाले पैल्ले मणू थिये।

¹⁵ असी सीमा का बाहर दूज्जेयां री मैहनत पर गर्व नी करदे, पर असा जो आस है कि जिस तरिक्के कने तुसा रा विश्वास बदधा जाणा तिस तरिक्के कने असी अपणी सीमा रे हिसाब कने तुसा री वजह कने होर भी जादा लोक्कां जो मसीह रा सुब बसेख सूणाई सकणा।

¹⁶ ताकि असी तुसा रे इलाके री सीमा का अग्गे बधी करी, होर इलाक्केयां बिच भी सुब बसेख सुनाण, ते ए ही नी कि असी दूज्जेयां री सीमा रे अन्दर बणे-बणाए कम्मां पर गर्व करण।

¹⁷ पर जिय्यां कि पवित्रशास्त्र बिच लिख्खे रा है, “जे अगर कोई गर्व करो, से प्रभु पर ही गर्व करो।”

¹⁸ किजोकी जे अपणी तारिफ करदा, से नी, पर जिसेरी तारिफ प्रभु करदे, से ही प्रभु री नजरां बिच सही है।