1 तीमुथियुस 2 - चम्बयाली नौआ नियमअराधना रे बारे बिच सलाह दैणा 1 सबका पैल्ले मैं इस गल्ल पर जोर पाई करी बोलदा कि परमेश्वर का सारे लोक्कां तांइ छंदे-मिन्नतां, प्रार्थना ते धन्यवाद करेया करो। 2 सारे राज्जेयां ते अधिकारी मणूआं तांइ प्रार्थना करेया करो ताकि असी सुख-चैन कने रेई सके ताकि असी परमेश्वर री अराधना करण ते दूए लोक्कां कने खरा बर्ताव रखण। 3 इय्यां प्रार्थना करणा ठीक गल्ल है ते ए असा जो छुटकारा दैणे वाले परमेश्वर जो खरा लगदा। 4 परमेश्वर चाह्ंदे कि सारे मणू छुटकारा पाए ते सच्चाई जो जाणे। 5 किजोकी सिर्फ इक्क ही परमेश्वर है ते सिर्फ इक्क ही बिचौल्ला है जे परमेश्वर ते मणूआं बिच फिरी मेल जोल कराई सकदा ते से मसीह यीशु हिन जे इक्क मणू रे रुप बिच पैदा होए थिये। 6 सारे लोक्कां शैतान ते पाप रे काबू का छुड़ाणे तांइ मसीह ने अप्पु जो कुर्बान कित्तेया ते तिन्हेरी कुर्बानी सही समय इस गल्ल रा सबूत थी कि परमेश्वर सारे लोक्कां जो छुटकारा दैणा चाह्ंदे थिये। 7 परमेश्वर ने मेरे जो सुब बसेख रा प्रचार करणे ते प्रेरित बणने तांइ चुणेया। तिन्हा ने मेरे जो गैर यहूदी लोक्कां जो सच्चाई रा बसेख सुनाणे तांइ चुणेया। मैं झूठ नी बोल्लेया करदा है पर मैं सच बोल्लेया करदा है। 8 मैं चाह्ंदा कि हर प्रार्थना सभा बिच पवित्र जिन्दगी जीणे वाले मर्द हत्थां जो चुक्की करी बगैर कुसकी गुस्से ते बैह्सबाजी रे प्रार्थना करेया करे। 9 तिय्यां ही मैं चाह्ंदा कि मसीही जनानियां ना इदेय बाल बणाई करी ते ना सोन्ने मोत्ती ते मैह्ंगे-मैह्ंगे गहणे पाई करी ते ना ही इदेय कपड़े पाई करी अप्पु जो संवारे जिसेरी वजह कने मर्द तिन्हेरे जो पाणा चाह्ण बल्कि से चज्ज कने इदेय कपड़े पाया करे जे तिन्हेरे सरीर जो ठीक कने तरिक्के कने ढके। 10 पर इन्हा चीजां जो करणे रे बजाए तिन्हा जो दूए लोक्कां तांइ भलाई रे कम्म करी के अप्पु जो खूबसुरत बनाणा चाएदा किजोकी मसीही जनानियां जो इय्यां करणा सजदा। 11 जां कोई सारे विश्वासियां जो शिक्षा देया करदा हो तां जनानियां जो बड़ी इज्जत कने चुप्पचाणे सिखणा जरुरी है। 12 मैं नी चाह्ंदा कि जनानियां प्रार्थना सभा बिच मर्दां जो सिखाए, बल्कि तिन्हा जो प्रार्थना सभा बिच सांत रैह्णा चाएदा 13 मेरे इय्यां बोलणे री वजह ए है कि परमेश्वर ने आदम जो पैल्ले बणाया ते तिसेरे बाद हव्वा जो बणाया। 14 आदम शैतान रे बहकावे बिच नी आया थिया पर जनानी तिसेरे बहकावे बिच आई थी जिसेरी वजह कने तिनिये परमेश्वर रे हुकम जो तोड़ेया। 15 पर फिरी भी जे अगर जनानियां मसीह बिच विश्वास बणाई रखदी, बाकि लोक्कां कने प्यार करदी ते पवित्र ते ठीक तरिक्के कने बर्ताव करदी तां परमेश्वर ने तिन्हा जो बच्चे पैदा करणे रे जरिये बचाणा। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.