1 थिस्सलुनीकियों 3 - चम्बयाली नौआ नियम

तीमुथियुस रा भेज्जेया जाणा

¹ जां तुसा जो मिल्ले बगैर असा का नी रेया गेया, तां मैं ते सीलास ने किल्ले ही एथेंस सहर बिच रैह्णे रा फैसला लेई लित्ता।

² ते असी तुसा जो उत्साहित करणे तांइ ते विश्वास बिच मजबूत करणे तांइ अपणे इक्क विश्वासी भाई, मसीह रा सुब बसेख सुनाणे वाले असा रे साथी ते परमेश्वर रे सेवादार तीमुथियुस जो तुसा का भेज्जेया।

³ ताकि इन्हा मुसीबतां का कोई ना घबराये किजोकी तुसा तां जाणदे ही कि असा जो जुल्म सैह्‍णे ही हिन।

⁴ किजोकी पैल्ले भी जां असी तुसा कने थिये, तां तुसा जो बोल्ली दित्तेया थिया कि असा कने जुल्म होणे, अते इय्यां ही होए रा भी है, तुसा तां ए जाणदे।

⁵ इधेरे तांइ जां मेरे का तुसा रा हालचाल जाणे बगैर रेया नी गेया, तां मैं तुसा रे विश्वास रा हाल जानणे तांइ तीमुथियुस जो भेज्जी दित्ता। मेरे जो ता ए डर थिया कि कुते शैतान ने तुसा जो परिक्षा बिच पाई करी भटकाई दित्ते रा हो ते असा री सारी मैहनत बेकार होई गे री हो।

तीमुथियुस रे जरिये बसेख मिलणा

⁶ पर तीमुथियुस अब्बे तुसा री जगाह् का असा का पूज्जे रा है। तिसने असा जो तुसा रे विश्वास ते प्यार रा सुब बसेख भी दित्तेया। तिसने असा जो ए भी दस्सेया कि तुसा असा जो बड़ा याद करदे ते असा कने मिलणा चाह्‍ंदे जिय्यां असी भी तुसा कने मिलणा चाह्‍ंदे।

⁷ इस वजह कने, ओ संगी विश्वासियों, असा जो तुसा रे मजबूत विश्वास री खबर सुणी करी बड़ा उत्साह मिल्लेया। ए जाणदे होए असा जो बड़ा उत्साह हुंदा कि तुसा विश्वास बिच बदेया करदे हिन।

⁸ किजोकी अवे तुसा प्रभु बिच विश्वास करणे बिच मजबूत हिन तां ही असा री जान बिच जान आई गयी।

⁹ तुसा री वजह कने असा जो जे खुसी मिल्ली तिस तांइ असी परमेश्वर रा जिन्ना भी जादा शुक्रिया करण से घट है।

¹⁰ परमेश्वर रे सामणे असी लगातार प्रार्थना करदे कि तुसा कने मिलण, अते मसीह यीशु बिच तुसा रा विश्वास बधाणे तांइ तुसा री मदद करण।

¹¹ असा रे पिता परमेश्वर अते असा रे प्रभु यीशु तुसा का आणे तांइ असा री मदद करण।

¹² असी प्रार्थना करदे कि जिय्यां असी प्यार तुसा कने करदे तिय्यां ही मसीह यीशु तुसा जो इक्क दूए कने प्यार रखणे ते तिस बिच बधणे बिच मदद करे।

¹³ अते इस तरिक्के कने से तुसा सारेयां रे मन जो मजबूत करण, अते पिता परमेश्वर रे सामणे असा रे प्रभु यीशु रे हटणे पर अपणे सब लोक्कां कने पवित्र अते बेकसूर ठैहराई देंन।