1 पतरस 1 - चम्बयाली नौआ नियम

नमस्ते अते प्रार्थना नमस्ते

¹ मैं पतरस मसीह यीशु रा प्रेरित है। मैं पुन्तुस, गलातिया, कप्पदुकिया एशिया ते बितूनिया रे इलाक्केयां बिच इक्क अजनबी रे तौर पर रैह्णे वाले परमेश्वर रे चुणे रे लोक्कां जो ए चीठ्ठी लिख्खेया करदा है।

² पिता परमेश्वर ने तुसा जो अपणे मणू बणाणे ते पवित्रात्मा रे जरिये पवित्र ठैहराणे तांइ बड़े पैल्ले का ही चुनणे रा फैसला करी लित्तेया थिया। तिन्हा ने ए इधेरे तांइ कित्तेया ताकि तुसा मसीह यीशु रे कहे मुताबिक चलो ताकि तुसा तिन्हेरे सुली पर खून बहाणे रे जरिये सुच्चे कित्ते जाण। तुसा जो परमेश्वर रे पास्से का अनुग्रह ते सांती मिलदी रे।

उम्मीद तांइ इक्क सच्ची वजह इक्क जिंदी उम्मीद

³ असा रे प्रभु मसीह यीशु रे पिता ते परमेश्वर रा शुक्रिया हो। असा पर तिन्हेरी दया री वजह कने तिन्हा ने मसीह यीशु जो मरे रे लोक्कां बिच का फिरी जिन्दा करी के असा जो इक्क नौई जिन्दगी दित्ती, ते तिन्हा ने असा जो बड़े हौंसले कने जीणे रे जोग्गे बणाया, इसेरा मतलब ए है कि असी तिन्हा सारी चीजां जो पाणे री आस रख्खी सकदे जिस जो दैणे रा वादा परमेश्वर ने असा ने कित्ते रा है।

⁴ असी तिस विरासत जो पाणे तांइ इंतजार करदे जे परमेश्वर ने असा तांइ तैयार कित्ते री है। कोई भी तिन्हा चीजां जो ना बर्बाद करी सकदा ते ना ही खराब करी सकदा, से ना कदी पुराणी होई सकदी ते ना ही तिन्हेरी खूबसुरती कदी घटी सकदी। परमेश्वर ने तुसा तांइ से चीजां स्वर्ग बिच रख्खे री हिन।

⁵ परमेश्वर अपणी महान ताकत कने तुसा जो सुरक्षित रखदे किजोकी तुसा मसीह बिच विश्वास करदे। तिन्हा ने तुसा जो अग्गे भी तां तांइ सुरक्षित रखणा जां तांइ मसीह यीशु हटी नी आंदे तां ही तुसा ने जाणना कि परमेश्वर ने तुसा जो पाप ते हमेसा री मौत का पूरे तरिक्के कने बचाए रा है।

⁶ भले ही मते तरिक्के री चीजां तुसा जो दुखी करी दिंदी पर फिरी भी इन्हा गल्लां री वजह कने तुसा खुस हुंदे।

⁷ इन्हा मुसीबतां रा मकसद ए दर्शाणा है कि तुसा परमेश्वर पर विश्वास करदे भी या नी। मसीह बिच तुसा विश्वास सोन्ने का भी जादा कीमती है। जिय्यां कि सोन्ना जे इक्क दिन खत्म होई जाणा, तिसजो भी आग्ग बिच परखेया ते निखारेया जांदा। जे अगर तुसा रा विश्वास इन्नी कड़ी मुसीबतां रे बाद भी बणेया रैहन्दा, तां इसेरी वजह कने तुसा जो तिस दिन बड़ा आदरमान ते महिमा मिलणी जिस दिन मसीह यीशु ने हटी आणा।

⁸ तुसा ने मसीह यीशु जो कदी भी नी दिख्खे रा है पर फिरी भी तुसा तिन्हा जो प्यार करदे। तुसा इस बेल्ले तिन्हा जो दिख्खी नी सकदे पर तुसा तिन्हा बिच विश्वास करदे। इधेरे तांइ तुसा तिस आनंद ते महिमा बिच खुस हुंदे जे शब्दां बिच बयान नी होई सकदी।

⁹ तुसा इधेरे तांइ खुस हिन किजोकी तुसा री आत्‍मा पाप री हालत बिच का पूरे तरिक्के कने बचाई जाया करदी है। ए मसीह यीशु बिच तुसा रे विश्वास रा ईनाम है।

¹⁰ ए से ही अनुग्रह है जिसेरे बारे बिच भविष्यद्वक्तां होर भी जादा जाणना चाह्‍ंदे थिये। तिन्हा ने इस गल्ल री भविष्यवाणी कित्ती कि तुसा जो बचाणे तांइ परमेश्वर ने तुसा कने इन्नी करुणा करणे बर्ताव करणा जिसेरे तुसा काबिल भी नी थिये। तिन्हा ने जवाब तोपणे तांइ बड़े ध्यान कने खोज कित्ती थी।

¹¹ मसीह री आत्‍मा तिन्हा बिच थी ते से तिन्हा जो दस्सेया करदा थिया कि किय्यां मसीह ने बड़े जुल्म सैह्‍ण करणे ते फिरी तिन्हा जो बड़ी महिमा दित्ती जाणी। इधेरे तांइ तिन्हा ने बड़ी खौजबीन कित्ती कि मसीह कुण होणा ते ए सब किच्‍छ कुस समय पर होणा।

¹² पर परमेश्वर ने तिन्हा भविष्यद्वक्तां जो ए दस्सेया कि ए बसेख तिन्हा तांइ नी पर तुसा लोक्कां तांइ है। से बसेख मसीह यीशु रा सुब बसेख है जिस जो अवे तुसा सुणी चुके रे हिन। तुसा जो सुब बसेख सुनाणे तांइ लोक्कां री मदद तांइ परमेश्वर ने स्वर्ग का अपणे पवित्रात्मा जो भेज्जेया थिया। स्वर्गदूत भी इन्हा गल्लां जो बड़े उत्तेजित होई करी दिख्खेया करदे हिन।

परमेश्वर रे पवित्तर लोकां सांई जिन्दगी बिताणा पवित्र जिन्दगी जीणे तांइ बुलाया जाणा

¹³ इधेरे तांइ अपणे मन जो इय्यां तैयार करी लेयो कि जिय्यां मणू अपणी कमर बन्नी करी कम्म करणे तांइ तैयार हुंदे। इसेरा मतलब ए है कि तुसा जो अपणी सोच पर काबू रखणा चाएदा। बड़े हौसंले कने तिस छुटकारे री पूरी आस रख्खी करी अपणी बोल-चाल जो सही रख्खो जे परमेश्वर ने तुसा जो मसीह यीशु रे स्वर्ग हटणे रे समय पर बड़े अनुग्रह कने दैणा।

¹⁴ परमेश्वर रे हुकमां जो इस तरिक्के कने मन्नेया करो जिय्यां अच्छे बच्चे अपणे प्यो रे हुकमां जो मनदे। तिन्हा बुराई रे कम्मां जो करणे री चाह्‍त मत रख्खो जे तुसा तिस बेल्ले करणा चाह्‍ंदे थिये जां तुसा परमेश्वर जो नी जाणदे थिये।

¹⁵ हर इक्क गल्ल बिच अप्पु जो बुराई रे कम्मां का बखरा रेयो किजोकी परमेश्वर पवित्र हिन।

¹⁶ किजोकी पवित्रशास्त्र बिच इय्यां लिख्खे रा है कि परमेश्वर ने बोल्लेया, “तुसां जो पवित्र रैह्णा चाएदा किजोकी मैं पवित्र है।”

¹⁷ परमेश्वर जाणदे कि हर इक्क मणू ने क्‍या-क्‍या कित्ते रा है, ते से हर इक्क मणू का बगैर कोई पक्षपात कित्ते हिसाब-किताब लिंदे। जां तुसा परमेश्वर का प्रार्थना करदे तां तुसा तिन्हा जो पिता बोल्ली करी पुकारदे। इधेरे तांइ जां तिकर तुसा इस धरती पर इक्क अजनबी सांई रैह्‍न्दे तुसा हमेसा तिन्हेरा आदरमान करो।

^18-19 तुसा जाणदे कि पैल्ले तुसा बेकार तरिक्के कने जिन्दगी जिया करदे थिये, से ओ ही तरिक्का थिया जे तुसा जो अपणे का पैल्ले रे मणूआं का मिल्लेया थिया। पर तुसा जो तिस बेकार जिन्दगी का छुटकारा दित्तेया गेया। तुसा रा मुल्ल चुकाया गेया पर सोन्ने चाँदी जदेई चीजां कने नी जे सड़ी जांदी, पर मसीह रे कीमती खून कने, जे इक्क सुच्चे ते सिद्व उरणू सांई हिन।

²⁰ परमेश्वर ने इस दुनिया जो बणाणे का पैल्ले ही इस गल्ल रा फैसला करी लित्तेया थिया कि मसीह यीशु ने छुटकारा दुआणा। पर से तुसा रे फायदे तांइ ही दुनिया रे इन्हा आखरी दिनां बिच धरती पर आए।

²¹ मसीह यीशु ने जे असा तांइ कित्तेया तिसेरी वजह कने अवे तुसा परमेश्वर बिच विश्वास करदे। तिन्हा ने ही मसीह यीशु जो मुर्देयां बिच का फिरी जिन्दा कित्तेया ते तिन्हा जो महिमा दित्ती। इधेरे तांइ परमेश्वर बिच तुसा रा विश्वास ते आस अवे मजबूत है।

²² सच्चाई जो मन्नी करी चलणे री वजह कने अवे तुसा सुच्चे कित्ते गे, अवे तुसा जो तन-मन लाई करी संगी विश्वासियां कने आपसी प्यार रखणा चाएदा। बड़ी चाह्‍त ते पूरे दिल कने इक्क-दूए कने प्यार रख्खो।

²³ तुसा जो अप्पु-मिते प्यार रखणा चाएदा किजोकी तुसा जो परमेश्वर का इक्क नौई जिन्दगी मिल्ले री है। तुसा जो ए जिन्दगी कुसकी इदेइ चीज रे जरिये नी मिल्ले री है जे इक्क दिन मुकी जाणी पर कुसकी इदेइ चीज रे जरिये मिल्ले री है जे हमेसा-हमेसा तिकर रैह्णी ते से परमेश्वर रा जिंदा ते हमेसा तिकर रैह्णे वाला वचन है।

²⁴ पवित्रशास्त्र बिच ए लिख्खे रा है, “सारे मणू घा सांई हिन ते तिन्हेरी खूबसुरती जंगली फूल्ल सांई है। घा ने सुकी जाणा ते फूल्ल ने झड़ी जाणा,

²⁵ पर परमेश्वर रे वचन ने हमेसा-हमेसा तिकर बणी रैह्णा।” ए वचन मसीह यीशु रा सुब बसेख है जिसेरा प्रचार तुसा जो सुणाया गेया थिया।