1 यूहन्ना 4 - चम्बयाली नौआ नियमआत्मा जो परखो 1 ओ प्यारेयो, हर तिस मणू पर भरोस्सा मत करो जे ए दावा करदे कि असी पवित्रात्मा रे कहे मुताबिक गल्लां करदे। पर आत्मा जो परखो कि से परमेश्वर रे पास्से का हिन का नी किजोकी मते सारे झूठ्ठी भविष्यद्वक्ता दुनिया बिच हिन। 2 पवित्रात्मा जो तुसा इस तरिक्के कने पैछाणी सकदे, कि जे कोई आत्मा मन्नी लिन्दी, कि मसीह यीशु मणू रे रुप अंदर दुनिया बिच आए, तां से परमेश्वर रे पास्से का है। 3 ते जे कोई आत्मा यीशु जो नी मन्दी, से परमेश्वर रे पास्से का नी है ते से ही तां मसीह यीशु रे विरोधी री आत्मा है जिसेरी चर्चा तुसा सुणी बैठ्ठे रे हिन कि, से इणे वाला है ते से अब्बे भी दुनिया अन्दर है 4 ओ प्यारे बच्चेयों, तुसा परमेश्वर रे मणू हिन, तुसा तिन्हा झूठ्ठे भविष्यद्वक्तां पर जीत हासिल कित्ते री है, किजोकी पवित्रात्मा जे तुसा बिच बसदी से शैतान का जादा ताकतवर है जे इस दुनिया रे लोक्कां पर राज करदा। 5 झूठ्ठे भविष्यद्वक्ता इस दुनिया रे लोक्कां बिच का हिन, इधेरे तांइ से दुनिया रे नजरिये कने गल्ल करदे ते दुनिया रे मणू तिन्हेरी सूणदे भी। 6 असी परमेश्वर रे मणू हिन ते जे परमेश्वर जो जाणदा, से असा री सूणदा, जे परमेश्वर जो नी जाणदा, से असा री नी सूणदा। इय्यां ही असी सच री आत्मा ते भटकाणे वाली आत्मा बिच फरक पैछाणदे। परमेश्वर प्यार है 7 ओ प्यारेयों, असी अप्पु-मिते प्यार रखण किजोकी प्यार परमेश्वर रे पास्से का है, ते जे दूज्जेयां कने प्यार रखदा, से परमेश्वर रा बच्चा है, ते परमेश्वर जो जाणदा। 8 जे दूज्जेयां कने प्यार नी रखदा, से परमेश्वर जो नी जाणदा, किजोकी परमेश्वर प्यार है। 9 जे प्यार परमेश्वर असा कने करदा, से इस कने जाहिर होया कि परमेश्वर ने अपणे इक्को ही इक्क निक्के जो दुनिया अन्दर भेज्जे रा है कि असी तिसेरे जरिए हमेसा री जिन्दगी हासिल करण। 10 सच्चा प्यार ए है कि असा ने परमेश्वर जो पैल्ले प्यार नी कित्ता पर तिन्हा ने पैल्ले असा जो प्यार कित्ता। परमेश्वर ने अपणे इकलौते मुंडे जो असा रे पाप्पां तांइ कुर्बान करी के दित्तेया ताकि असा जो असा रे पाप्पां का माफी मिल्ले। 11 ओ प्यारेयो, जां परमेश्वर ने असा कने इदेया प्यार कित्तेया, तां असा जो भी अप्पु-मिते प्यार करणा चाएदा। 12 परमेश्वर जो कदी कुनिए भी नी दिख्खेया अगर असी अप्पु-मिते प्यार रखण, तां परमेश्वर असा री जिन्दगी अन्दर बणी रैह्न्दा, ते तिसेरा प्यार असा अन्दर सिद्ध होई गे रा है। 13 इस कने ही असी जाणदे कि असी परमेश्वर अन्दर बणी रैह्न्दे, ते से असा अन्दर, किजोकी तिनिए अपणी पवित्रात्मा असा जो दित्ते रा है। 14 ते असा ने पुत्तर जो अपणी हाख्खियां कने दिख्खी भी लित्ता ते गवाई दिन्दे कि पिता परमेश्वर ने पुत्तर जो दुनिया रे लोक्कां रा छुटकारा दैणे वाला बणाई करी के भेज्जे रा है। 15 जे कोई ए मन्नी लिन्दा कि यीशु परमेश्वर रा पुत्तर है तां परमेश्वर तिस मणू अन्दर बणी रैहन्दा ते से मणू परमेश्वर अन्दर। 16 ते असी जाणदे ते विश्वास करदे कि परमेश्वर असा कने बड़ा जादा प्यार करदे। परमेश्वर प्यार है, जे प्यार बिच बणी रैह्न्दा, से परमेश्वर बिच बणी रैहन्दा, ते परमेश्वर तिस अन्दर बणी रैह्न्दा। 17 इस कने ही प्यार असा अन्दर सिद्ध होए रा है कि असा जो न्याय वाले रोज्जे हिम्मत हो कि तिन्हा ने असा जो सजा नी दैणी, असी दुज्जेया जो हकीकत बिच प्यार कित्तेया जिय्यां मसीह ने भी इस दुनिया रे लोक्कां कने कित्तेया ते तिसेरे हिसाब कने जिए भी। 18 प्यार अन्दर डर नी हुन्दा, पर सिद्ध प्यार डर जो दुर करी दिन्दा, किजोकी डरा कने तकलीफ हुंदी, ते जे डरदा, से प्यार अन्दर सिद्ध नी होया। 19 असी परमेश्वर कने ते दूए लोक्कां कने इधेरे तांइ प्यार करदे किजोकी परमेश्वर ने पैल्ले असा कने प्यार कित्ता। 20 अगर कोई बोल्ले कि, मैं परमेश्वर कने प्यार रखदा पर अपणे संगी विश्वासी कने प्यार ना रख्खो, तां से झूठा है किजोकी जे अपणे संगी विश्वासी कने जिस जो तिनिए दिख्खे रा है, प्यार नी रखदा तां से परमेश्वर कने भी जिस जो तिनिए नी दिख्खेया, प्यार नी रख्खी सकदा। 21 ते तिसका असा जो ए हुकम मिलेरा है कि जे कोई अपणे परमेश्वर कने प्यार रखदा, से अपणे संगी विश्वासी कने भी प्यार रख्खो। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.