1 यूहन्ना 3 - चम्बयाली नौआ नियम1 ध्यान देयो कि परमेश्वर पिता ने असा कने कितणा प्यार कित्तेया ताकि असा जो परमेश्वर रे निके-निके बोल्लेया जाई सके अते वाक्केई असी तिन्हेरे बच्चे हिन भी! इधेरे तांइ दुनिया रे मणू असा जो नी जाणदे कि असी परमेश्वर रे बच्चे हिन किजोकी तिन्हा ने परमेश्वर पिता जो भी नी जाणेया। 2 ओ मेरे प्यारे दोस्तों, अवे असी परमेश्वर री औलाद हिन, पर कल जो कै हुंगे, ए हल्ले तिकर जाहिर नी होया पर असी ए जाणदे कि जां उसने आणा तां असी भी उसेरे ही सांई होई जाणा किजोकी जदेय से हिन, तिसजो असा तदेया ही दिखणा 3 हर कोई जे मसीह पर इदेयी आस रखदा, से अप्पु जो तिय्यां ही पवित्र रखदा, जिय्यां मसीह यीशु पवित्र है। 4 जे कोई पाप करदा रैहन्दा, से परमेश्वर रे नियम जो तोड़दा। किजोकी हर तरिक्के रा पाप परमेश्वर रे नियम खिलाफ है। 5 तुसा जो तां पता ही है कि मसीह यीशु मणूआं रे पाप्पां जो दुर करणे तांइ ही दुनिया रे लोक्कां बिच आया अते ए भी कि मसीह बिच कोई भी पाप्पी नी है। 6 जे कोई मसीह यीशु बिच बणी रैह्न्दा, से अग्गे जो पाप बिच जिन्दगी नी बितांदा पर हर इक्क कोई जे पाप करदा रैहन्दा, तिसेरा परमेश्वर कने कोई रिस्ता नी अते तिसने तिन्हा जो नी जाणेया। 7 ओ प्यारे बच्चो, तुसा जो कोई धोखा ना देयो, जे कोई नेक कम्म करदा, से मसीह यीशु सांई धार्मिक है। 8 जे कोई पाप करदा रैहन्दा, से शैतान रे पास्से का है किजोकी शैतान दुनिया रे बणने का पैल्ला का ही पाप करदा आया है, इधेरे तांइ परमेश्वर रा पुत्तर आया कि से शैतान रे कम्मां जो खत्म करण। 9 जे कोई परमेश्वर री औलाद हिन, से पाप करणा छड्डी दिंदा किजोकी परमेश्वर रा स्वभाव तिस मणू बिच बणी रैहन्दा, इधेरे तांइ से पाप नी करी सकदा, किजोकी से परमेश्वर रा पुत्तर है। 10 परमेश्वर री औलाद ते शैतान रे औलाद बिच इस कने फरक पता लाई सकदे कि हर से मणू जे धार्मिकता रे कम्म नी करदा से परमेश्वर री औलाद नी है, अते जे अपणे संगी विश्वासी कने प्यार नी करदा, से भी परमेश्वर री औलाद नी है। परमेश्वर रा प्यार अते म्हारा प्यार इक्क-दूज्जे कने प्यार करो 11 ए उपदेस तुसा मसीह बिच विश्वास करणे रे सुरु रे बेल्ले का ही सुणे रा है कि असा जो इक्क-दूय्ये कने प्यार कने रैह्णा चाएदा। 12 असा जो आदम रे पुत्तर कैन सांई नी बणना जे उस शैतान रे पास्से का थिया, ते जिनिए अपणे भ्याल जो मारी रख्खेया, तिसने अपणे भ्याल जो भला किजो मारेया? तिसने इधेरे तांइ इदेया कित्तेया कि तिसेरे कम्म बुरे थिये अते तिसेरे भ्याल रे कम्म धार्मिक थिये। 13 ओ मेरे संगी विश्वासियों, जां दुनिया रे मणू तुसा कने नफरत करदे, तां हैरान मत हुन्दे। 14 असी जाणदे कि असी हमेसा री मौत रे वस बिच नी हिन ते अवे असा का परमेश्वर रे पास्से का हमेसा री जिन्दगी है किजोकी असी अपणे संगी विश्वासी कने प्यार करदे ते जे मणू प्यार नी करदा, से हमेसा री मौत रे वस बिच हिन। 15 हर इक्क मणू जे अपणे संगी विश्वासी का नफरत करदा, से खूनी है, अते तुसा जाणदे कि खूनी लोक्कां बिच हमेसा री जिन्दगी नी है। 16 असा ने प्यार मसीह यीशु का सिख्खेया कि तिन्हा ने असा तांइ अपणी जिन्दगी देई दित्ती, इधेरे तांइ असा जो भी अपणे संगी विश्वासियां तांइ अपणी जान दैणी चाएदी। 17 पर जिस का इस दुनिया री धन-दौलत है अते से अपणे संगी विश्वासियां जो जरुरत रे बेल्ले तिस पर दया नी करदा, तां तिस बिच परमेश्वर रा प्यार नी है। 18 ओ प्यारे बच्चों, असा रा प्यार सिर्फ गल्लां बिच ही नी रैह्णा चाएदा बल्कि से कम्मां बिच दिसणा चाएदा अते सच्चा होणा चाएदा। परमेश्वर रे सामणे हिम्मत 19 इसी कने ही असा जो ए पता चलदा कि असी सच्चाई रे हिसाब कने जिन्दगी जिया करदे हिन; 20 भले ही असा रा मन असा जो दोषी ठेहरांदा तां भी असी परमेश्वर का हिम्मत कने प्रार्थना करी सकदे किजोकी परमेश्वर असा री सोच का बड्डे हिन ते से सब किच्छ जाणदे। 21 ओ प्यारे विश्वासियों, जे अगर असा रा मन असा जो दोषी नी ठेहरांदा तां असा जो परमेश्वर का प्रार्थना करणे री हिम्मत मिलदी। 22 अते जे असी किच्छ तिन्हा का मंगदे, से असा जो दिंदे किजोकी असी तिसेरे हुकमां जो मनदे, अते से ही करदे, जे तिसजो खरा लगदा 23 तिसेरा हुकम ए है कि असी तिसेरे पुत्तर मसीह यीशु बिच विश्वास करण अते जिय्यां तिन्हा हुकम दित्तेया है, कि असी इक्क-दूय्ये कने प्यार करो। 24 जे तिसेरे हुकमां जो मनदा, से परमेश्वर कने बणी रैहन्दा ते परमेश्वर तिस मणू बिच बणी रैहन्दा ते इस तरिक्के कने पवित्रात्मा रे जरिए जिस जो परमेश्वर ने असा जो दित्तेया है, असी ए जाणदे कि असा रा परमेश्वर कने रिस्ता बणे रैहन्दा। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.