1 यूहन्ना 1 - चम्बयाली नौआ नियम

वचन जे जिन्दगी दिंदा जिन्दगी रा वचन

¹ असी तिस इक्क रे बारे बिच लिख्खेया करदे हिन जे जिन्दगी दैणे वाला वचन है। से दुनिया रे बणाए जाणे का भी पैल्ले का है। जिस जो असी सूणेया, ते अपणी हाख्खियां कने दिख्खेया, बल्कि जिस जो असी ध्यान कने दिख्खेया ते अपणे हत्थां कने छुत्तेया।

² से इस दुनिया रे लोक्कां बिच आया ते असा बिच मझाटे रेया, ते असा ने तिसजो दिख्खेया, असी तिसेरे गवाह हिन, अते अवे असी तुसा जो तिस्सी हमेसा री जिन्दगी रा सुब बसेख देया करदे हिन, जे पिता कने थिया अते असा पर प्रकट होया।

³ असा ने तिसजो दिख्खेया अते सूणेया है अवे तुसा जो भी यीशु का सुब बसेख देया करदे हिन ताकि तुसा भी असा रे कने साझी होई जाओ असा रा ए सांझा परम पिता परमेश्वर अते उन्हेरे पुत्तर मसीह यीशु कने है।

⁴ असी इन्हा गल्लां जो तुसा तांइ इधेरे तांइ लिख्खेया करदे हिन ताकि तुसा री खुसी पूरी होई जाओ।

परमेश्वर इक्क रौसनी अते मसीह असां तांइ इक्क उदारण रौसनी बिच चलणा

⁵ असा ने मसीह यीशु का जे सुब बसेख सूणेया है, से ए है, अते इसजो ही असा तुसा जो सुणाया करदे हिन: परमेश्वर रौसनी सांई शुद्व है ते उस बिच न्याहरे सांई बुराई नी है।

⁶ जे असी ए बोलण कि असी उसेरे साझी हिन पर असी पाप रे न्याहारे बिच अपणी जिन्दगी जिंदे तां असी झूठ बोल्लेया करदे हिन ते सच रे रस्ते पर नी चलेया करदे हिन,

⁷ पर जिय्यां परमेश्वर रौसनी बिच हिन जे अगर असी भी तिय्यां ही रौसनी बिच जिन्दगी बिताण ते असी परमेश्वर कने अप्पु मिते इक्क-दूए कने मेल-मिलाप रखगे, ते तां मसीह यीशु रे खून ने असा रे पाप्पां का साफ करणा।

⁸ जे असी बोलण कि असा बिच कोई पाप नी है तां असी खुद जो धोखा देया करदे हिन अते असा बिच सच्चाई नी है।

⁹ जे असी अपणे पाप्पां जो परमेश्वर रे सामणे मन्नी लिंदे तां से असा रे पाप्पां जो माफ करणे विश्वास रे लायक ते नेक है, अते से असा जो हर तरिक्के रे अधार्मिक रे कम्मां का सुच्चा भी करदे।

¹⁰ जे असी बोलदे कि असा रे बिच पाप नी है तां असा परमेश्वर जो झूठा बणान्दे अते असी तिन्हेरे वचन रे हिसाब कने जिन्दगी नी जिन्दे।