1 कुरुन्थियों 5 - चम्बयाली नौआ नियम

कलीसियां बिच परेसानियां अते रिसतेयां रे बारे बिच कलीसिया बिच गलत गल्लां

¹ किच्‍छ लोक्कां ने मेरे जो दस्से रा है कि तुसा रे कलीसिया रे किच्‍छ मणू व्यभिचार बिच पे रे हिन। बल्कि इदेया व्यभिचार ता मसीह बिच विश्वास ना करणे वाले लोक्कां बिच भी नी हुंदा कि इक्क मणू अपणी सौतेली मां कने नाजायज़ रिश्ते बणाए।

² इस बारे बिच तुसा दुखी होणा चाएदा थिया। जे कोई इदेया कम्म करदा तुसा जो तिस मणू जो अपणी कलीसिया बिच का बाहर कड्डी दैणा चाएदा थिया, पर इय्यां करणे रे बजाए तुसा उल्टा घमंड कने भरी गे।

³ हालांकि मैं तित्ते तुसा कने नी है, पर जां मैं तुसा ते कलीसिया बिच होणे वाली परेशानियां रे बारे बिच सूणदा तां इय्यां लगदा कि जिय्यां मैं तित्ते तुसा रे बिच मझाटे ही है ते तिस मणू रा हिसाब-किताब करेया करदा है।

⁴ तुसा जो इय्यां करणे री जरुरत है कि मसीही विश्वासियां रे रुप बिच कठियो ते ए जाणी रख्खो कि तुसा का मसीह यीशु रा हक है। ते ए ऐसा है कि मैं भी अपणे मन बिच तुसा कने तित्ते ही है तां फिरी मसीह यीशु री ताकत कने

⁵ इदेय मणू जो शैतान जो वापिस सौंपी देयो, ताकि से अपणे पाप्पां का माफी मंगी लेयो। जे अगर से अपणे पाप्पां का माफी मंगी लिंदा तां मसीह रे दुनिया रे हिसाब-किताब करणे बेल्ले तिस मणू ने बची जाणा।

⁶ तुसा घमंड करणा छड्डी देयो। जिय्यां कि तुसा जाणदे कि जरा करी तराक पूरे गुह्ने रे आट्टे जो तराक्की दिंदा तिय्यां ही जां कोई इक्क मणू पाप करदा रैहन्दा तां तिस वजह कने तिसेरे कन्ने रे सारे मणू तिस असर बिच पाप करणा लग्गी पैंदे।

⁷ इधेरे तांइ तिस पाप जो अप्पु बिच का हटाओ जिय्यां कि यहूदी मणू फसह री रोट्टी रा त्योहर का पैल्ले अपणे घरे का तराक्के रे आट्टे जो हटाई दिंदे थिये, तां फिरी तुसा ने इक्क इदेय पवित्र विश्वासियां रा समुह बणना जे पवित्र ते सुच्चे होई करी बगैर कुसकी पाप रे असर रे इक्क-दूए कने संगती करणे वाले मणू बणना किजोकी परमेश्वर ने तुसा जो पैल्ले का ही साफ करी दित्ते रा है ते तुसा जो पवित्र बणाई दित्ते रा है। तुसा जो हमेसा साफ ते सुच्चे तरिक्के कने जिन्दगी जीणी चाएदी किजोकी मसीह यीशु ने असा जो असा रे पाप्पां का अजाद करणे तांइ कुर्बानी दित्ती थी, जिस तरिक्के कने यहूदी मणू फसह रे त्योहर का पैल्ले अपणे घर का खमीर हटाई दिंदे।

⁸ इधेरे तांइ आओ असा अपणा फसह रा त्योहर मनांदे जिय्यां कि यहूदी मणू तराक्क जो कड्डी करी सूटी दिंदे ते अखमीरी रोट्टी खांदे थिये, तिय्यां ही असा जो भी जिन्दगी तिस हिसाब कने नी जीणा चाएदी जिय्यां असी मसीह यीशु बिच विश्वास करणे का पैल्ले जिंदे थिये।

⁹ मैं अपणी पैल्ली चीठ्ठियां बिच तुसा जो लिख्खेया थिया कि व्यभिचारियां री संगती मत करदे।

¹⁰ ए नी कि तुसा बिल्कुल ही इस दुनिया रे व्यभिचारियां, लालचियां, ठग मणूआं या मूर्ति पूजा करणे वालेयां कने गल्ल-बात करणा ही छड्डी देयो, इस हिसाब कने ता तुसा जो इस दुनिया जो छडणा पैणा,

¹¹ पर मैं चीठ्ठी बिच तुसा जो जे लिख्खेया, से ए है कि कुसकी इदेय मणू कने कोई रिस्ता मत रख्खो जे मसीह यीशु बिच विश्वास करणे रा दावा ता करदा हो पर फिरी व्यभिचारी, लालची, मूर्ति पूजा करणे वाला, गाली दैणे वाला, पियक्कड़, या इक्क ठग हो। इदेय मणू कने गल्ल-बात मत रखदे, बल्कि इदेय मणूआं कने रोट्टी भी मत खान्दे।

¹² जे मणू विश्वासी नी हिन, तिन्हेरा हिसाब-किताब करणा मेरी जिम्मदारी नी है। पर शायद तुसा इदेय लोक्कां जो सजा देई सकदे जे तुसा री कलीसिया रे हिस्से हिन।

¹³ जिय्यां कि पवित्रशास्त्र बिच लिख्खे रा है कि अविश्वासियां रा हिसाब-किताब ता परमेश्वर करदा, पर तुसा इदेय बुरे कम्म करणे वालेयां जो अपणे बिच का कड्डी देयो।