1 कुरुन्थियों 3 - चम्बयाली नौआ नियम

कलीसिया बिच गुटबदीं करणे पर भतसर्ना

¹ ओ संगी विश्वासियों, मैं तुसा रे कने तिय्यां गल्ल नी करी सकेया, जिय्यां आत्मिक मणूआं कने करदा। पर इसेरे उलट मेरे जो तुसा कने इय्यां गल्ल करणा पेई जिय्यां कि दुनियावी मणूआं कने कित्ती जांदी, मतलब उन्हा कने जे मसीह यीशु री गल्लां जो समजणे बिच हल्ले बच्चे हिन।

² मैं तुसा जो परमेश्वर रे बसेख बिच हल्ले मामुली गल्लां ही सिखाई ते हल्ले गहराई री सच्चाई नी दस्सी, किजोकी तिस बेल्ले तुसा तदेई गल्लां जो सिखणे रे जोग्गे नी होए थिये ते तुसा हल्ले भी तिस शिक्षा जो अपनाणे रे जोग्गे नी होए रे थिये।

³ किजोकी हल्ले तांइ तुसा इस दुनिया रे अविश्वासी लोक्कां सांई हिन। तुसा रे बिच हिर्स अते झगड़ा है, इस कने साबित हुंदा कि तुसा इस दुनिया रे दूए लोक्कां सांई हिन ते तिय्यां ही बरताव करदे।

⁴ किजोकी जां इक्क बोलदा कि मैं पौलुस रे सिखाए चलदा, ते दुज्जा मणू बोलदा कि मैं अपुल्लोस रे सिखाए चलदा, तां तिस बेल्ले तुसा रा बोल-चाल दुनियावी मणूआं सांई हुंदा।

⁵ मैं पौलुस ते अपुल्लोस परमेश्वर री सेवा करणे वाले दास का बधी करी होर किच्‍छ नी हिन, जिन्हेरे जरिए तुसा ने मसीह यीशु रे बसेख विश्वास कित्तेया, असा सबने से ही कम्म कित्तेया जे प्रभु ने असा जो दित्तेया।

⁶ परमेश्वर रा बसेख इक्क बीह् सांई है जे जमीन बिच बाया गेया। मैं तुसा लोक्कां जो सुब बसेख सुणाया जिय्यां इक्क मणू खेत्तर बिच बीह् बांदा, ते अपुल्लोस ने तिस कम्म जो शिक्षा दैणे कने जारी रख्खेया जिय्यां इक्क मणू पौधेयां जो पाणी दिंदा पर सिर्फ परमेश्वर ने ही तुसा जो आत्मिक रुप कने बधणे रे काबिल बणाया जिय्यां से पौधेयां जो बधांदे।

⁷ इधेरे तांइ ना तां लगाणे वाला किच्‍छ है, अते ना ही सींचणे वाला, पर परमेश्वर जे बधाणे वाला है, से ही सब किच्‍छ है।

⁸ मैं तुसा बिच मसीह रा बसेख सुणाया ते तुसा जो शिक्षा दैणा सुरु कित्तेया ते अप्पुल्लोस ने तुसा जो शिक्षा दैणा जारी रख्खेया पर असा दोन्नों रा इक्क ही मकसद है। पर हर इक्क जणे जो अपणे कम्मां रे हिसाब कने परमेश्वर का मजदूरी मिलणी।

⁹ किजोकी असी मणू परमेश्वर रे सहकर्मी हिन ते तुसा विश्वासी मणू परमेश्वर रे खेत्तर सांई हिन, ते तुसा परमेश्वर रे घर सांई हिन।

¹⁰ मैं परमेश्वर रे दित्ते रे वरदान कने से कम्म पूरा कित्तेया जे तिन्हा ने मेरे जो करणे तांइ दित्तेया थिया; मैं तुसा रे सहर बिच सुब बसेख सुणाया ते तुसा बिच का सुरु-सुरु बिच मसीह बिच विश्वास करणे वाले लोक्कां जो तिस बिच बधणे तांइ मदद कित्ती। तिसेरे बाद, बाकि मसीही सेवकां ने तिस कम्म जो जारी रख्खेया जे मैं सुरु कित्तेया थिया। पर असा बिच का हर इक्क मसीही सेवक जो इस गल्ल रा ध्यान रखणे री जरुरत है कि असा जो परमेश्वर रा कम्म किय्यां करणा चाएदा।

¹¹ किजोकी जे नीं पैल्ले का पेई गयी री है, से मसीह यीशु हिन, ते कोई दुज्जा कोई होर नीं पाई नी सकदा।

¹² जे अगर परमेश्वर रे सेवक सुब बसेख री सही शिक्षा दैण जे परमेश्वर ने तिन्हा जो दित्ते री है, तां से मणू इक्क घर बणाणे वाले मिस्त्रि सांई हिन, जे सोन्ना, चाँदी ते कीमती पत्थर जदेय बदिया समान लाई करी तिस नीं पर घर पांदे। पर जे अगर से सुब बसेख री सही शिक्षा ना दैण तां से मणू तिन्हा मिस्त्रियां सांई होए जे तिस नीं पर घा-फू जदेया घटिया समान लाई करी घर पांदे।

¹³ पर इक्क दिन पता लग्गी जाणा कुसने कदेया कम्म कित्ते रा है। किजोकी जिस दिन मसीह ने वापिस हटी करी आणा तां तिन्हा ने इस गल्ल जो साफ-साफ ज़ाहिर करी दैणा। ए सब किच्‍छ इदेया होणा कि सारेयां ने तिस घर जो बणाणे तांइ इस्तेमाल कित्ते रे समान जो आग्ग बिच पाई करी परखेया जाणा। तिन्हा ने ए दिखणा कि परमेश्वर रे हर इक्क सेवक ने कदेया कम्म कित्ते रा है, ते तिन्हा ने इस गल्ल फैसला करणा कि तिन्हेरा कम्म खरा है या बेकार। जिय्यां कोई आदमी घर बणाणे रे समान जो आग्ग कने परखी करी दिखदा कि से जादा समय तांइ चलणा या तौले ही फुकी जाणा।

¹⁴ ते जे कम्म तिस मणू ने तिस नीं पर कित्ते रा है, जे अगर से कम्म नी फुकिंदा, तां तिसजो ईनाम मिलणा।

¹⁵ जे अगर मसीह ए फैसला लेई लिंदे कि कुसकी रा कम्म बेकार है तां मसीह ने तिस मणू जो ईनाम ता नी दैणा पर तिस मणू ने अपणी हमेसा री जिन्दगी भी नी गुआणी जे परमेश्वर ने तिसजो दित्ते री है।

¹⁶ तुसा ठीक तरिक्के कने जाणदे कि तुसा परमेश्वर रा मन्दिर हिन अते पवित्रात्मा तुसा रे बिच वास करदा।

¹⁷ जे कोई मणू तुसा लोक्कां बिच, जे परमेश्वर रे मन्दिर सांई हिन फूट पाणे री कोसीस करगा तां परमेश्वर ने तिस मणू जो कड़ी सजा दैणी। किजोकी परमेश्वर रा मन्दिर पवित्र है ते से तुसा हिन।

¹⁸ जे अगर तुसा बिच कोई अप्पु जो इस जुग रे लोक्कां री नजर बिच अप्पु जो समजदार समजे तां अप्पु जो इस जमाने रे लोक्कां री नजर बिच बेवकूफ भी समजे ताकि तुसा परमेश्वर री नजर बिच भी समजदार बणो।

¹⁹ किजोकी परमेश्वर री नजर बिच इन्सानी ज्ञान बेवकूफी है, जिय्यां कि पवित्रशास्त्र बिच लिख्खे रा है, “से ही (परमेश्वर) है, जे ज्ञानी मणूआं जो तिन्हेरी चलाकी बिच फसाई दिंदा,”

²⁰ पवित्रशास्त्र बिच दुबारा इय्यां लिख्खे रा है, “प्रभु ज्ञानी लोक्कां रे सोच-विचारां जो जाणदा, कि से फजूल हिन।”

^21-23 इधेरे तांइ कोई मणू जो अप्पु पर या कुसकी होर मणू पर घमंड नी होणा चाएदा, चाए पौलुस हो या अपुल्लोस या पतरस, चाए दुनिया हो या जीणा-मरणा हो, चाये अज्ज री गल्लां हो या आणे वाले कल री गल्लां हो, ए सब किच्‍छ तुसा रा है, अते तुसा मसीह यीशु रे हिन, अते मसीह यीशु परमेश्वर रा है।