1 कुरुन्थियों 14 - चम्बयाली नौआ नियम

भविष्यवाणी ते बखरी-बखरी भाषा

¹ पूरे दिल कने इक्क-दूए कने प्यार बणाए रखणे री हर मुमकिन कोसीस करेया करो ते आत्मिक वरदान्नां री धुन बिच रेयो, खासतौर पर की भविष्यवाणी करेया करो।

² किजोकी बखरी-बखरी भाषा बिच प्रार्थना करणे वाला मणू परमेश्वर कने गल्लां करदा ते इस वजह कने कोई मणू तिसेरी गल्लां जो नी समजदा किजोकी से राज़ री गल्लां पवित्रात्मा री ताकत कने बोलदा।

³ पर जे मणू भविष्यवाणी करदा से विश्वासी मणू री मसीह बिच विश्वास जो मजबूत बणने बिच मदद करदा, प्रोत्साहित रे सुकून दिंदा।

⁴ जे विश्वासी मणू बखरी-बखरी भाषा बिच गल्लां करदे से मसीह बिच अपणे ही विश्वास जो मजबूत करदा, पर जे विश्वासी मणू भविष्यवाणी करदा से कलीसिया रे विश्वास जो मजबूत करदा।

⁵ मैं चाह्‍ंदा की तुसा बखरी-बखरी भाषा बिच गल्लां करों पर इसका जादा मैं ए चाह्‍ंदा कि तुसा भविष्यवाणी करो किजोकी जे अगर बखरी-बखरी भाषा बोलणे वाला मणू कलीसिया बिच तिसेरा मतलब ना समजाए जे से बोल्लेया करदा है, तां भविष्यद्वक्ता तिसका जादा बधी करी है।

⁶ ओ संगी विश्वासियों जे अगर मैं तुसा का आई करी बखरी-बखरी भाषा बिच गल्लां करणे रे बजाए प्रकाशन, ज्ञान या परमेश्वर रे बसेख री शिक्षा री गल्लां करां, तां तुसा जो मेरे का फायदा होणा।

⁷ इसी तरिक्के अवाज पैदा करणे वाली चीजां री अवाज्जां बिच भी जे अगर कोई फरक ना हो तां तिन्हा जो भी कुसकी ने नी पेहचाणी सकणा।

⁸ जे अगर कुसकी जांग बिच तुरही साफ अवाज ना दे, तां सिपाई भी लड़ाई तांइ तैयार नी होई सकणा।

⁹ तिय्यां ही जां तुसा अपणी जुबान का साफ-साफ गल्ल ना करो तां जे किच्‍छ भी तुसा बोलणा लोक्कां ने से बिल्कुल भी नी समझणा। इस हिसाब कने ता तुसा हवा कने गल करणे वाले ठैहरणे।

¹⁰ दुनिया बिच मती सारी भाषां हिन ते हर इक्क भाषा रा मतलब है।

¹¹ पर जे अगर असी से भाषा ना समजे जिस बिच दुआ मणू असा कने गल्ल करेया करदा हो, तां असी तिस गल्ल करणे वाले मणू री नजर बिच परदेसी होणे, ते तिस भाषा बिच गल्ल करणे वाला मणू असा जो परदेसी लगणा।

¹² इधेरे तांइ तुसा भी जां आत्मिक वरदानां री धुन बिच हिन तां ए कोसीस करो कि इन्हा वरदान्नां री वजह कने पूरी कलीसिया रे तरक्की हो।

¹³ इधेरे तांइ जे मणू बखरी-बखरी भाषा बोलदा हो, से प्रार्थना करे कि से तिसेरा मतलब भी समझाई सके।

¹⁴ इधेरे तांइ जे मैं बखरी-बखरी भाषां बिच प्रार्थना करां, तां मेरी आत्‍मा प्रार्थना करदी पर तिस बिच मेरी समझ री कोई हिस्सेदारी नी है किजोकी मैं तिसजो नी समजी सकेया।

¹⁵ ए वक्त-वक्त री गल्ल है कि कदी मेरे जो आत्मां बिच होई करी प्रार्थना करणा चाएदी ते कदी मेरे जो समजी करी प्रार्थना करणा चाएदी। कुसकी बेल्ले मेरे जो आत्‍मा बिच भरी करी गीत-भजन गाणे चाएदे ते कदी मेरे जो समजी करी गीत-भजन गाणे चाएदे।

¹⁶ वरना जे अगर तू आत्‍मा कने ही परमेश्वर री महिमा करगा तां कुसकी आम इन्सान ने तेरे शुक्रिया पर आमीन नी बोल्ली सकणा किजोकी से नी जाणदा की तू कै बोल्लेया करदा है।

¹⁷ तेरा परमेश्वर री महिमा करणा तां बड़ी छैल गल्ल है पर इस कने दूए जो अपणे विश्वास बिच बधणे बिच कोई मदद नी मिलदी।

¹⁸ मैं अपणे परमेश्वर रा शुक्रिया करदा कि मैं तुसा सारेयां का जादा बखरी-बखरी भाषा बोलदा।

¹⁹ पर कलीसिया बिच बखरी-बखरी भाषां री दस हजार गल्लां बोलणे का जादा खरा ता मेरे तांइ ए है कि सारेयां जो सखाणे तांइ समजदारी री पांज्ज ही गल्लां बोल्लां।

²⁰ ओ संगी विश्वासियों, इन्हा गल्लां जो समजणे बिच बच्चेयां सांई ना बणो, बुराई करणे बिच तां बच्चेयां सांई अनजाण ही रेयो, पर इन्हा गल्लां जो समजणे बिच अक्कलमंद बणो।

²¹ जिय्यां कि पवित्रशास्त्र बिच लिख्खे रा है, “मैं परदेसी लोक्कां ते पराई भाषा बोलणे वाले लोक्कां रे जरिए इन्हा लोक्कां कने गल्ल करणी तां भी तिन्हा ने मेरी नी सूणनी।”

²² इस तांइ बखरी-बखरी भाषां अविश्वासियां तांइ परमेश्वर री इक्क निशानी है, ते भविष्यवाणी विश्वासियां तांइ परमेश्वर री निशानी है।

²³ ते जे अगर कलीसिया इक्क जगाह् कठ्ठी री हो ते सारे रे सारे विश्वासी बखरी-बखरी भाषा बोलदे होण, ते बाहर वाले मणू या मसीह बिच विश्वास ना करणे वाले मणू तित्ते आई जाण तां तिन्हा ने तुसा जो पागल समझणा।

²⁴ पर जे अगर सारे विश्वासी भविष्यवाणी करदे होण ते कोई बाहर वाला मणू या मसीह बिच विश्वास ना करणे वाला मणू तित्ते आई जाए तां तुसा री बोल्ले री गल्लां री वजह कने तिन्हा जो एहसास होई जाणा कि से मणू पाप्पी हिन ते तिन्हा ने अपणी जिन्दगी जीणे रा तरिक्का बदली लैणा।

²⁵ ते तिन्हा रे मन री गल्लां सामणे आई जाणी ते तिन्हा ने मुँह रे भारे पेई करी परमेश्वर री अराधना करणी ते मन्नी लैणा कि हकीकत बिच परमेश्वर तुसा रे बिच हिन।

उपासना बिच अनुशासन

²⁶ ओ संगी विश्वासियों, मैं तुसा जो दसदा कि ए सारा किच्‍छ किय्यां करणा चाएदा, जां तुसा अराधना करणे तांइ कठ्ठिंदे, तां हर इक्क रे मन बिच भजन या उपदेस या बखरी-बखरी भाषां या परमेश्वर रा प्रकाशन या बखरी-बखरी भाषां रा मतलब दसणा, मसीह बिच विश्वासियां रे विश्वास जो मजबूत करणे तांइ होणा चाएदा।

²⁷ जे अगर कोई बखरी-बखरी भाषा बिच गल्लां करदा तां दो या त्रै मणू बारी-बारी ही बखरी-बखरी भाषा बिच बोल्ले ते इक्क जणा सारेयां जो तिसेरा मतलब समझाणे तांइ होणा चाएदा।

²⁸ पर जे अगर बखरी-बखरी भाषा रा मतलब समझाणे वाला कोई ना हो तां बखरी-बखरी भाषां बोलणे वाला कलीसिया बिच चुप रे, ते अपणी विश्वास री तरक्की तांइ मन बिच परमेश्वर कने गल्लां करे।

²⁹ भविष्यवाणी करणे वालेयां बिच का सिर्फ दो या त्रै जणे ही बोल्ले, ते बाकि विश्वासी तिन्हेरी गल्लां जो परखे।

³⁰ पर जे अगर मंडली बिच बैठ्ठे रे कोई मणू जो परमेश्वर रे पास्से का कोई भविष्यवाणी रा बसेख मिल्लेया करदा हो, ते तिस बेल्ले जे गल्ल करेया करदा हो से चुप्प होई जाए ते तिस मणू जो भविष्यवाणी करणा दे।

³¹ किजोकी तुसा सारे इक्क-इक्क करी के भविष्यवाणी करी सकदे ताकि सारे सिखण ते सारे प्रोत्साहित हो।

³² ते जे भविष्यद्वक्ता परमेश्वर का मिल्ले रे बसेख री भविष्यवाणी करेया करदा हो, से अप्पु जो काबू बिच रखदा, ते से अपणी मर्जी कने बोल्ली सकदा या रुकी सकदा।

³³ किजोकी परमेश्वर गड़बड़ी रा नी पर एकता ते सांती रा परमेश्वर है। ते ए तरिक्का परमेश्वर रे लोक्कां री सारी कलीसिया बिच मन्नेया जांदा,

³⁴ किच्‍छ मणू मनदे कि जनानियां कलीसिया री सगंती बिच चुप रैह्ण, किजोकी तिन्हा जो गल्लां करणे री अनुमती नी है, तिन्हा जो अधीन रैह्णे रा हुकम मिल्ले रा है, जिय्यां कि पवित्रशास्त्र बिच लिख्खे रा भी है,

³⁵ जे अगर से किच्‍छ जादा सिखणा चाह्‍ण तां कलीसिया रे बिच ना पुच्छे पर अपणे घरे अपणे लाड़ेयां का पुच्छे।

³⁶ किजो तुसा बिच किच्‍छ जणियां परमेश्वर रे दस्से गे री गल्लां जो नी मनणा चाह्‍ंदी? तुसा जो कै इय्यां लगदा कि परमेश्वर रे बसेख जो पैल्ली वरी दसणे वाली तुसा थियां? या कै से सिर्फ तुसा जो दित्तेया गेया थिया?

³⁷ जे कोई मणू अपणे आप जो भविष्यद्वक्ता या इदेया कोई मणू समजदा जिस जो पवित्रात्मा कोई खूबी दित्ते री हो, तां से मणू ए जाणी लै कि जे गल्लां मैं तुसा जो लिखदा से प्रभु रे हुकम हिन।

³⁸ पर जे मणू मेरी इन्हा गल्लां जो ना मनदा हो, तुसा तिन्हेरी गल्लां जो ना मन्नो।

³⁹ इधेरे तांइ ओ संगी विश्वासियों, भविष्यवाणी करणे री धुन बिच रेयो, पर बखरी-बखरी भाषा बोलणे का कुसकी जो मत रोक्को।

⁴⁰ पर हर इक्क चीज जे तुसा कलीसिया बिच करदे, से बड़े सलीके ते सांती कने कित्ती जाए।