Salmos 93 - Candoshi-Shapra

Apanll wamari kasiru taakiya

¹ Apanll Taarashipan waamari kasiru taakiya. Kizpur wamar kurakurtaru, 'sinish taakiya. Wizpur wamari kasiriya. Tsapurunasee tinarangu, nda zpuzamaam mbam wayayaru kasarangiya.

² Ashirucha, atashiniya; Apaa, shiy tsapurunasee wayarangush, urutamari ksutaksha. Shiy urutamari kizpur kurak taaksha.

³ Apaa, mar kung kapungumash warastakchu, zaw, zaw, zaw, ántaru, kizpur zungantaru,

⁴ anoo shiy wizpurish kasirinashta. Watam shiy kanindush íwar taakshawa.

⁵ Apaa, shiy kamachtamarish urutamari taaratartachiya. Shiy nllitarit chinacheezish, ndambaree. Ashiriya, tputsirish uru shiyash pangish pshtukchusin, Shiyaa Apaa, Kizpur wanasirtishcha. Nda pakchiyam yutarit chinaksha, atusin, shiyaa ungirtachinllinaya, nuw shiyaa Apaa, atina.