Salmos 8 - Candoshi-Shapra

Apanll tputsee tsapurunasee ksutamapaneem wayarangu, anoo kamankiya

Dapiyarini wayasee. Yandayaru, yasimpaneem panarangiya, kitarpata yasimaama.

¹ Apaa, shiyamari ichingarootsini kasirush taaksha. Shiyaa taarashipaneetsish, tputs ztaru wizpurireetsish pakanaya. Kanindaatstaa arang kasiru taaksha.

² Tputs tsapurunasshuch shiyaa natsaktaatssin, itaru nllursha, kanxutaa shiyaa kis yaseeksin, zamangakchusin, kundararshitish anoo mazinakchusin, paziksin zamakanaya.

³ Apaa, yuwaa shaana tinarangish, anoo psaan kanindap napkuri, tsupeetstam, tsangacheetstam pakuri, napuxtakina.

⁴ Ichingaroo pakuri, mangishi Apaa chinakina, ¿Mayaama iy tputsini taakanee? atina. ¿Mayaamsha shiy iyaa tputseetsini chinaksha? ¿Mayaamsha iyapa mapeerush taaksha?

⁵ Shiy iyaa tputseetsini tinarangush, shaana tamapari ashtamartam iyaa tinarangsha.

⁶ Tínamareetsish ichingaru kasiru iyaatsimari wayarangsha. Ksutamapaneemtam iyaatssha wayarangsha. Sheerush iyaatssha tputseetsini kamachtakush tárangsha:

⁷ Siysa opeejaa, wakaraatstam, mishat manginshucheetstam,

⁸ íwar mangataru anootstam, mishat kayupcheetstam, maachi ichinguru kungush taataru anootstam siyamari kasirus taatssa, tárangsha Apaa.

⁹ Itaru Apaa, shiyamarisha ichingarootsini kasirush taaksha. Shiyaa taarashipaneetsish wizpurireetsish tputs ztaru pakanaya. Dapiyarini wayas átu yandarangiya.