Salmos 47 - Candoshi-Shapra

Apanllimari kurak kasiru taakchu, tsapurunasshuch ztaru kis shambatkusin taachinllina, anoo kamankiya

Tputs Koréchich nlluranuri yandamarini.

¹ Apanllee shambatkuni ichingaruni zamangayani. Mangis ksaptari shambatkus zamangakus, Jai, jai, tángtsa.

² Watam Apanll kizpureeru waamari kasiru tpuxtakiya. Ichingaroom tsapurunas Apanllimari kurak taakiya.

³ Apanll Kanaanshuchee tputs tpachingarangu watsapunee iyaamshat panarangiya. Tputseetstam m'chachureemani wayarangitamta.

⁴ Apanll iyaa kapung chinarangu, iyaam waana tsapoo ipuseeru panarangiya. Anush na iyshat Akoparinchichini kis taakaniya.

⁵ Na Apanll ichingaru kurakaam wayarangu, na mapiyshat uxinashimun kuxinkiya. Ashiriya na iyshat mangini kis shambatkuni tamburtakuni, tirucheeni.

⁶ Apanllee shambatkuni yaseeyani. Kurakareetsini ungirtakuni yaseeyani.

⁷ Apanlleem yaseesshish yandayaruni yaseeyani. Watam wamari tsapurunasshucheetsini kasiru kurak taakuwa. Mangiptis yaseengints.

⁸ Apanll uxinashimand kuxinaru tputseetsini ztaru ksutariya. Ichingaroo tsapurunasee napkiya.

⁹ Tsapurunasshuch kurak Apanllpat tiptsir, Apramarinchichpa, washunand shaniyeersin, Apanllee ungirtakanaya. Watam Apanllimari tsapurunasshuchee kurak kasiru taakuwa. Ashiriya, ichingaruni Apanllimunari shambateeni.