Salmos 46 - Candoshi-Shapra

Apanll uru iyaa Israelchicheetsini ksutkiya

Koréchich tputs yandarangiya, tiruchizpa yasimaama.

¹ Apanll iyaa ksutkiya. Iyaam wizpuree panakiya. Apanllish kamungamaam uru taariya. Yuwash xarashish taakchu anush istakiya.

² Ashiriya, ¿mayaamaja punichich? Mundaz mundaztakchitaa, misha tsap kizpuritaa zpoozakchu, machsha pátangambachtaa, marush imurish pantsambachtaa, ashiritaa ¿mayaamaja nuw punichee?

³ Mar kapungtaati warastakchu, mach kizpuritaa zpoozakchu, itaru nda nuw punichina.

⁴ Kungsha wanasirimish Apanllish yaktarini taariya. Anush tputs kungumun wip mang' ksachinlliniya. Watam waana Apanll wamari kasiru an anush taakuwa.

⁵ Waanaatsi yaktarini uru ksutku, tapachindachiya. Zar taraseetaranllu anush kundararini kuskatssin, Undarsha; Taraseekchu pshtuyani, atitaatssin, ayamamtiyam nda kasachiya. Watam Apanll waana naparu iyaa tapachindakiya.

⁶ Kizpuri kuk kimaku, tputs ztaru puniksin zamangachinlliniya. Tsapurunasshuch kurak nungtachinllinaya. Apanll izuuru wizpurpa tsapoo kapeetku pastachiya.

⁷ Apanll kizpurcha. Iyachchee Akoparinchicheetsini nlluranurini uru ksutkiya. Apanllimun mangini tatkuni, urutamari iyaa izuuru tapachindaku taachiya. Apanllishumarisha kamungchiniya.

⁸ Naapangints. Apanll iyaa tsapurunasshucheetsini ichingarootsini tpuxtayanlliya.

⁹ Tapazpaneetsi tsapurunas ztaru; Na Waapa. Zanayangints, tákchu, Tapazpan ztaru zanayanllinaya. K'chirpungoo ichingaru ichip ichip sheersin, Turuwaatstam pátangambeeru kasayanllinaya. Tapazpanee pshiyrshini sumasush mucheenlliya.

¹⁰ Apanll tputsee kamachtaku; Na waapa. Zanayangints, tákchu; Nuw Apanlli Taarashipantana. Tputsee urkar ztaru tiptsirpatatam nuwaatssha; Shiy Apanlltishcha. Shiyamari kasirush taaksha, nuwaa táchinllinaya, átcha Apanlli.

¹¹ Apanll kizpuri iyash taakiya. Iyachchee Akoparinchicheetsini nlluranurini uru ksutkiya. Uwamun kamungchiniya.