Salmos 130 - Candoshi-Shapra

Apanllimun mangich tatkuch, piy ashtarchi

Tputs Irusarinap naakchusin yaseeranganaya.

¹ Zurampatari mangipti Apaa, shiyaa kuruzkina. Mangi kapung mantsakina.

² Apaa, nuwaa kuki mazinangandama. Nayaningandama. Yutaritshishireetsi tchingangandama.

³ Apaa, shiy iyaa yutaritshishirineetsini kirakarishish yandaranginaareesha, nda mbizakush, ¿chakaja shiyash pshtuch?

⁴ Itaru, shiyamaricha yutaritshishirineetsini yaramaam waritaksha. Shiyaatsimari chinakaniya.

⁵ Ashiri Apaa, shiyangzimari mangiptarti kutakina. Apaa, yaranganda, watam shiy, Mangeetsish tachingchinllpa, tárangshawa.

⁶ Ashirucha, nuwsha shiyaam kutakina. Yaktashuch ksutamapan psaan kutaksin, uru tarasitan ashkana, nuwsha ashiritamti shiyaam kutakina, nuw atina.

⁷ Ashiri siysa Israelchichis, Apanllimun mangis tatkus k'tangtamtsa, nuw tamakparina shingtamtsa. Watam Apanllimari iyaa chinaku, izuuru tapachindakuwa. Ashkachu, izuuru Apanllpatarisha kis taatssa.

⁸ Iyaa Israelchicheetsini yutaritshishirinee ichinguru yarchiya, nuw siyaa atina.