Salmos 110 - Candoshi-Shapra

Dapiy yuwaa Apanll ipusamarini wamari kasichu anoo kamankiya

Dapiyarini wayassi.

¹ Apanll Taarashipan nuwaa kurakari, waanaatsi ipusamarini, tárangiya; Shiy ningich mbutsunungich k'xinangcha. Nuwsha kundarareetsish kasiyeeruri, tpachingachima, tárangiya.

² Ashiriya kurakaa, Apanll shiyaam waanaatsi wizpur kundarareetsish kasimaam panachu, shiysha mach Siyonamand kizpur kurak shiyamari kasiru taangcha. Ashiriya, kundarareetsish ksingcha, atina.

³ Tapazeemsha waritakchu, Siyonash mach shiysha, Kasiyeeni, tákchush, tputsirishtish, Ayu, táchinllinaya; Anush kanungas wizpur ashirush nizcheezish, ndambaree.

⁴ Apanll waana zurampatari shiyaa kasimaam wayarangu, nllitari ndusha chinachiya. Shiy Melkisarin tamapari ashirush urutamari apanllpan urkar taachsha, ayamamtiyam nda pastamaama, Apanll shiyaa tárangiya.

⁵ Apanll shiyaam tuwizpurtamaam washunand mbutsinungich naachiya. Ashkachu, kundarareetsish waneeyarush, kurakaatstam ichingaru kasiyarush tpachingachsha.

⁶ Tsapurunasee kurak ztaru, tpachingayarush, tputseetssha, minchichee tputs, minchichee tputs ashiru ichinguroo waneeyarush tsiparee washunand xanatatsha.

⁷ Sheerush, arangeem tapazeem naakchush, ngootsush kungoo waakchush, yusur wizpurireetsish tuwizpurtachiya, Dapiyarini yaseeku, Apanllee ipusamarini tárangiya.