সফনিয় 2 - Chakma Bible

¹ ও লাজ্‌‌‌‌‌দর্ নেইয়্যে জাদ্, তুমি এগত্তর্ অ, এক লগে থুবো।

² সেই দিন্নো তুষো ধোক্ক্যেন উড়ি এজের্; সেনত্তে ঠিগ্ গোজ্যে সময়ান এবার্ আগেদি, লগেপ্রভুর জ্বোল্‌জোল্যে রাগ্‌কান তমা উগুরে এবার্ আগেদি, তার্ অমকদ অহুজিগান তমা উগুরে পড়িবার আগেদি তুমি একসমারে থুবো।

³ ও দেজর্ বেক্ নম্র মানুচ্চুন, তুমি যিগুনে লগেপ্রভুর উগুম মজিম্ কাম গরঅ, তুমি তার্ আওজ্ মজিম্ গমেডালে আর নম্রগুরি চলঅ; সেক্কে লগেপ্রভুর রাগর্ দিন্নোত্ অয়ত তুমি আশ্রয় পেবা।

নানান্ জাদ বিরুদ্ধে আগাম্ কধা

⁴ গাজাগানত্ মানুচ্ নেইয়্যে অবঅ আর অস্কিলোনান্ ভস্তর্ জাগা ওইনে পড়ি থেবঅ। দিনোত্ অস্‌দোদর মানুচ্চুনোরে ধাবেই দিয়্যে অবঅ আর ইক্রোণরে উগুরেই ফেলা অবঅ।

⁵ ও করেথীয় মানুচ্চুন, তুমি যিগুনে সাগর পাড়ত্ বজত্তি গরঅ, অভিশাব্ পোড়োক্ তমার্! ও পলেষ্টীয়গুনোর দেশ কনান, তঅ বিরুদ্ধে লগেপ্রভুর এ কধাগান, “মুই তরে এমনভাবে ভস্ত গুরিম, তইদু কনজনে ন-থেবাক্।”

⁶ সাগর পাড়র্ চাগালাগান অবঅ চরেদে জাগা; সিয়েনত্ থেবাক্ গরগর্ গাত্ আর ভেড়ার্ ঘর।

⁷ সেই চাগালাগান যিহূদা-বংশর বাঁজি থেইয়্যে মানুচ্চুনোর অধিকারত্ থেবঅ; সিয়েনত্ তারা পাল চোড়েবার জাগা পেবাক্; সাজোন্যে অক্তত্ তারা অস্কিলোনর ঘরত্ ঘুম্ যেবাক্; তারার্ গোজেন লগেপ্রভু তারারে দেগাশুনো গুরিবো, তে তারার্ অবস্থাগান ফিরেব।

^8-9 ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, “মুই মোয়াবর্ অগমান গরানার কধা আর অম্মোনীয়গুনোর ঠাট্টা-মশ্‌‌কারী গরানার কধানি শুন্যং; তারা মঅ মানুচ্চুনোরে অগমান গোজ্যন্ আর তারার্ দেজ্‌‌চান গজক্ গুরিবাক্ বিলি বাড়্‌বো গোজ্যন। মঅ জিংকানির নাঙে কঙর্, মোয়াব্‌পান্ হামাক্কায় সদোম ধোক্ক্যেন আর অম্মোনীয়গুনোর দেজ্‌‌চান ঘমোরা ধোক্ক্যেন অবঅ-সিয়েন হের্‌পদনার্ জাগা, নুনো খেত্ আর উমরর্ উগুজ্যে ভূই ওই থেবঅ। মঅ জাদর্ বাঁজি থেইয়্যে মানুচ্চুনে তারারে লুদেবাক্ আর তারা দেজ্‌‌চানি গজক্ গুরিবাক্ ।”

¹⁰ তারা বাড়্‌বো গরানাত্তে তারা এ ফল্ পেবাক্, কিত্যেই তারা বেগত্তুন্ খেমতাবলা গোজেন লগেপ্রভুর মানুচ্চুনো বিরুদ্ধে ঠাট্টা-মশ্‌‌কারী গোজ্যন্ আর তারা বিরুদ্ধে নিজোরে দাঙর্ গুরি কোইয়োন।

¹¹ লগেপ্রভু তারা ইধু অমকদ দর্‌‌গরেপারা অবঅ; তে পিত্‌‌থিমীর বেক দেবেদাগুনোরে বল্‌‌পোজ্যে গুরিবো। সেক্কে দূর দেজর্ বেক জাদর্ মানুচ্চুনে নিজো নিজো দেজত্তুন্ তার্ উবোসনা গুরিবাক্।

¹² লগেপ্রভু কোইয়্যেদে, “ও কূশীয়গুন, তুমিও মঅ লাম্বাছুরিগানর্ আঘাতে মুরিবা।‌‌”

¹³ লগেপ্রভু উত্তোরেদিগুনো বিরুদ্ধে আঢ্ বাবেইনে আসিরিয়াগান ভস্ত গুরিবো আর নীনবীগানরে এক্কুবারে মানুচ্ নেইয়্যে আর ধূল্যেচর ধোক্ক্যেন শুগুনো গুরি দিবো।

¹⁴ সিদু গোরু আর ভেড়া পাল্ আহ্ বেগ্ জাদর্ প্রাণীগুন পড়ি থেবাক্। ধূল্যেচর-পেজা আর ভূতুম পেজা তা খুদোগুনো উগুরে ঘুম যেবাক্, আর জানালাদি তারার্ রগুন্ শুনো যেবঅ। ঘরানি ভস্ত ওই যেবঅ আর ঘরর্ এরস গাজর্ তক্তানি লুদ্ ওই যেবঅ।

¹⁵ ইয়েনই সেই নিচিদে থেইয়্যে শঅর্ যিয়েন গমেডালে আঘে। তে মনে মনে কইদ্যে, “মুয়ই আগং, মুই বাদে আর কনজন নেই।” তে কিবাবোত্যেগুরি ভস্ত ওই গেলঅ, ঝার্‌বো য়েমানুনোর আশ্রয়র জাগা অলঅ! যিগুনে তা কায়কুরেদি যেবাক্ তারা ঠাট্টা-মশ্‌‌‌‌কারি গুরিবাক আর তারার্ বুজ্যে আঙুল্ দেগেবাক্।‌‌