সফনিয় 1 - Chakma Bible

¹ আমোনর পুয়ো যিহূদার রাজা যোশিয়র রাজাগিরির সময়োত্ কূশির পুয়ো সফনিয় ইধু লগেপ্রভুর কধানি ফগদাং অলঅ। কূশি অলদে গদলিয়র পুয়ো, গদলিয় অমরিয়র পুয়ো, অমরিয় হিষ্কয়র পুয়ো।

ভস্ত অনা পৌইদ্যেনে উজিয়ার কধা

² লগেপ্রভু কোইয়্যেদে, মুই পিত্‌থিমীর বুগোত্তুন্ বেক্কানি শেজ্ গুরি দিম‌‌‌।

³ মানুচ্ আর য়েমান, আগাজ পেগ্‌কুন আর সাগরর মাছ্‌চুন মুই শেজ্ গুরি দিম। মুই পাজিগুনোর্ অধপতন ঘোদেম্। পিত্‌‌‌‌থিমীর উগুরেত্তুন্ মুই মানুচ্চুনোরে ভস্ত গুরি দিম।

⁴ “যিহূদার বিরুদ্ধে আর যিরূশালেমত্ বজত্তি গুরিয়্যে বেক্কুনো বিরুদ্ধে মুই মঅ আঢ্‌‌তানি তুলিম। মুই এ দেজত্তুন্ বাল দেবেদা পূজোর্ বেক্কানি আর মূত্তি পূজোগুরিয়্যে নানান্ পোজিশনর্ ধর্মগুরুগুনোরে শেজ্ গুরি ফেলেম।

⁵ যিগুনে আগাজর্ বেক তারাগুনোরে পূজো গুরিবাত্তে ছালঅ উগুরে উদিনে জু জু গরন্ আর যিগুনে লগেপ্রভুর নাঙে জু জু গুরিনে শমক্ গরানার্ পরেদি মিল্‌কম দেবেদার নাঙেও শমক্ গরন তারারে মুই ভস্ত গুরি ফেলেম।

⁶ যিগুনে লগেপ্রভুর পিজেদি চলানাত্তুন্ ফিরি যেইয়োন আর তার্ আওজ্ মজিম ন-চলন্ আহ্ তার্ আওজ্‌চান জানিবাত্তেয়ো ন-চান তারারে মুই শেজ্ গুরি দিম।”

⁷ তুমি প্রভু লগেপ্রভুর মুজুঙোত্ অলর্ অ, কিত্যে লগেপ্রভুর দিনুন্ কায়কুরে লুম্মেগি। লগেপ্রভু এক্কান উৎসর্বর আয়োজন গোজ্যে; তে যিগুনোরে বোলেয়্যে তারারে সিজি গোজ্যে।

⁸ লগেপ্রভু কোইয়্যেদে, “মর্ সেই উৎসর্বর্ দিন্নোত্ মুই রাজার্ কামগুরিয়্যে গুনোরে, রাজার্ পুয়োগুনোরে আর বিদেশী কাবড় চুগোর্ উজ্যে বেক্ মানুচ্চুনোরে সাজা দিম।

⁹ যিগুনে ফাল্যেনে চৌকাঠ পার্ অন আর অত্যেচার আহ্ ছলনালোই তারার্ দেবেদাগুনোর্ ঘরানি ফেলেং ফেলেং গরন্ সেদিন্যে মুই তারারে সাজা দিম।”

¹⁰ লগেপ্রভু আরঅ কোইয়্যেদে, “সেদিন্যে মাছ-গেদোত্তুন্ কানানি রঅ, শঅর দ্বিলম্বর্ ভাগত্তুন্ আবিলেচ রঅ আর মুড়োগুনোত্তুন্ ভাঙি পড়ানার্ দাঙর্ দাঙর্ রঅ শুনো যেবঅ।

¹¹ ও মক্তেশর আদাম্মেগুন, তুমি আবিলেচ্ গরঅ, কিত্যেই তমার্ বেক বেবসায়ীগুনোরে আর টেঙা-পোইজ্যে লেনদেনগুরিয়্যেগুনোরে ফুজি ফেলা অবঅ।

¹² সে সময়োত্ মুই চেরাগ্‌‌কোই যিরূশালেমর বেক জাগানিত্ তোগেম্ আর যিগুনে নিজোরে নিইনে হুজি থান্ আর কন্, ‘লগেপ্রভু গম্-ভান্ন্যেই কিচ্ছু ন-গুরিবো,’ তারারে মুই সাজা দিম্।

¹³ তারার্ ধন-সোম্বোত্তিগানি লুদো অবঅ আর তারার্ ঘরানি ভস্ত অবঅ। তারা ঘর বানেবাক্ মাত্তর্ সিয়েনিত্ বজত্তি গুরি ন-পারিবাক্; তারা আংগুর খেত্ গুরিবাক্ মাত্তর্ আংগুর-রস হেই ন-পারিবাক্।”

¹⁴ লগেপ্রভুর সেই দাঙর্ দিন্নো কায়কুরে লুম্মেগি আর যাদিমাদি এজের্। উইয়ো শুনো, লগেপ্রভুর দিনুনোর রবো! সেক্কে যোদ্ধাগুনে পীড়েই রঅ ছাড়িবাক্।

¹⁵ সেদিন্নো অবঅ রাগর্ দিন, অমকদ দুদ্দশা আর মনত্ দুঘো দিন, দযা আর ভস্ত অনার্ দিন, ঘুর্‌‌‌ঘুজ্যে আন্ধারর দিন, মেঘ আর ঘুর্‌‌‌ঘুজ্যে আন্ধারর্ দিন।

¹⁶ সিবে অবঅ দেবাল্ ঘিজ্যে বেক্ শঅরানির্ বিরুদ্ধে আর কোণার্ বেক অজল্ চুগিদার-ঘরর বিরুদ্ধে শিঙে রঅ আর যুদ্ধোর্ ডাগনির দিন।

¹⁷ মানুচ্চুনো উগুরে লগেপ্রভু অমকদ দুঘ্ আনিবো যিয়েনত্তে তারা কান্ মান্‌‌‌‌জ্য ধোক্ক্যেন আঢিবাক্, কিত্যেই লগেপ্রভুর বিরুদ্ধে তারা পাপ গোজ্যন্। তারার্ লো-গানি ধূল্যে ধোক্ক্যেন ফেলেই দিয়্যে অবঅ আর তারার্ কিয়্যেনি গবর ধোক্ক্যেন পড়ি থেবঅ।

¹⁸ লগেপ্রভুর রাগর্ দিন্নোত্ তারার সনা-রূবোনিয়ো তারারে বাঁজেই ন-পারিবো। তা রিবেঙর্ জ্বালার্ আগুনে বেক্ দুনিয়েগান পুড়ি যেবঅ, কিত্যে পিত্‌‌‌‌‌থিমীত্ বজত্তি গুরিয়্যে বেক্কুনোরে তে ঝিমিদোত্ শেজ্ গুরি দিবো, অয়, জদবদে শেজ্ গুরি দিবো।