সখরিয় 2 - Chakma Bible

মাবেদে দুড়িলোই এক্কো মানুচ্

^1-2 সে পরেদি মুই রিনি চেইনে মাবেদে দুড়িগান আঢত্ এক্কো মান্‌‌‌‌‌জ্যরে দেগিলুং। মুই পুযোর্ গুরিলুং, “তুই কুদু যর্?” জোবত্ তে মরে কলঅ, “যিরূশালেমান কত্তমান পাদাজ্জ্যে আর কত্তমান লাম্বা সিয়েন মাবি চেবাত্তে যাঙর্।”

³ যে স্বর্গদূত্‌তো আগে মঅ লগে কধা কোইয়্যে তে যার্, এমন সময়োত্ আর এক্কো স্বর্গদূত তা লগে দেগা গুরিবাত্তে এলঅ।‌‌‌‌‌

⁴ তে তারে কলঅ, “তুই ধাবা যেইনে সেই গাবুজ্যে পুয়োবোরে কঅ, ‘যিরূশালেমর্ ভিদিরে মানুচ্ আর য়েমান বেশ্ অনার কারনে সিয়েনত্ কনঅ দেবাল ন-থেবঅ।

⁵ লগেপ্রভু কত্তে, তে নিজেই সিয়েনর চেরোকিত্তে আগুনোর দেবাল অবঅ আর তেয়ই তার মহিমায় সিয়েনত্ থেবঅ।’ ”

দেজত্ ফিরিবার ডাগনি

⁶ লগেপ্রভু কত্তে, “শুনো, শুনো। মুই দঅ চেরোকিত্তে তমারে ছিদি দুয়োং, মাত্তর্ ইক্কিনে তুমি উত্তোরে দেজত্তুন্ ধেই এজঅ।

⁷ ও সিয়োনর্ মানুচ্চুন, তুমি যিগুনে বাবিলোত্ বজত্তি গরর্, তুমি ধেই এজঅ।”

⁸ বেগত্তুন খেমতাবলা লগেপ্রভু তার বাঈনীগান্ ফগদাং গুরিবাত্তে মরে সেই বেক্ জাদ্‌তুনো ইধু পাদেয়্যে যিগুনে তমারে লুদেয়োন। তে কত্তে, “যে কনজনে তমারে ধরন্ তে মর্ চোগো মানেক্কো ধরে।

⁹ মুই তারার্ বিরুদ্ধে হামাক্কায় মঅ আঢ্‌‌তানি তুলিম, সেক্কে তারার্ চাগরুনে তারারে লুদেবাক্।” ইয়েন যেক্কে ঘুদিবো সেক্কে তুমি বুঝি পারিবা যে, বেগত্তুন্ খেমতাবলা লগেপ্রভুই মরে পাদেয়্যে।

¹⁰ লগেপ্রভু কত্তে, “ও সিয়োন-ঝিবো, ফুত্তি গুরিনে গান গাহ্ আর হুজি অ, কিত্যে মুই এজঙর্, আর মুই তমাইদু বজত্তি গুরিম।

¹¹ সেদিন্যে ভালোক্ জাদে মঅ সমারে মিজেইনে মঅ মানুচ্ অবাক্। মুই তমা ইধু বজত্তি গুরিম।” যেক্কে সিয়েন ঘুদিবো সেক্কে তুমি হবর্ পেবা যে, বেগত্তুন্ খেমতাবলা লগেপ্রভু মরে তমা ইধু পাদেয়্যে।

¹² সুদ্ধো-সাংগ দেজত্ তার সোম্বোত্তি ইজেবে লগেপ্রভু যিহূদা দেজ্‌‌‌চান গজক্ গুরিবো আর যিরূশালেমানরে আরঅ বেঈ নেযেব।

¹³ ও বেক্ মানুচ্চুন, তুমি লগেপ্রভুর মুজুঙোত্ অলর্ অ, কিত্যে তে বিচের্ গুরিবাত্তে তার সুদ্ধো-সাংগ থেবার জাগাত্তুন্ নিগিলি এজের্।