তীত 3 - Chakma Bible

যিয়েনি উপকারি সিয়েনি গুরিবার নিদ্দেচ্

¹ গোজেনর্ মানুচ্চুনোরে মনত্ তুলি দে যেন তারা শাসনগুরিয়্যে আর যিগুনোর্ আঢত্ খেমতা আঘে তারার্ অধিনোত্ থান, বাধ্য অন্ আর মানুচ্চুনোরে যে কনঅ উপকার গুরিবাত্যে যুক্কোল্ থান্।

² তারা যেন কারঅ নিন্দে ন-গরন্ বা কোল্‌-কোজ্জ্যে ন-গরন্, বরং তারা যেন শান্ত খাচ্চ্যদর্ অন্ আর বেক্কুনো সমারে ভারী চিদে বেবহার গরন্।

³ আমিয়ো আগে বুদ্ধি-নেইয়্যে আর অবাধ্য এলং, ভুল্ পধেদি চলিদোং, সুগী আর নানান্ বাবোত্যে কামনা-বাসনার চাগর্ এলং। আমি অন্যরে ইংসে গুরিদোং আর ক্ষোতি গুরিবার চিন্তেলোই জিংকানি কাদেদং। নিজে অন্যগুনোত্তুন্ ঈচ্ গরা হেইয়্যে অলেয়ো আমি একজন অারেক জনরে ঘিনেদং।

⁴ মাত্তর্ যেক্কে আমার উদ্ধোর্ গুরিয়্যে গোজেনর্ দোয়্যে আর কোচ্‌পানা ফগদাং অলঅ সেক্কে তে আমারে পাপত্তুন্ উদ্ধোর্ গুরিলো।

⁵ কনঅ গম কামত্যে তে আমারে উদ্ধোর্ ন-গরে; তার্ দোয়্যের্ কারনে সিয়েন গোজ্জ্যে। পবিত্র আত্মালোই নুয়ো জর্ম দান গুরিনে আর নুয়ো গুরি বানেইনে তে আমা মনানি ধোইনে সাব্ গুরিলো, আর এবাবোত্যে গুরি তে আমারে উদ্ধোর্ গুরিলো।

⁶ আমা উদ্ধোর্ গুরিয়্যে যীশু খ্রীষ্টর্ মাধ্যমে তে খুলো আঢে পবিত্র আত্মাগানরে আমারে দিলো,

⁷ যেন আমি উমর জিংকানির্ আশ্বাস্ পেইনে গোজেনর্ বেক্কানির্ অধিকারী ওই। ইয়েন সম্ভব ওইয়্যেদে, কিয়া গোজেনর্ দোয়্যের্ মাধ্যমে আমারে নিদ্দুজি বিলি মানি লুয়ো ওইয়্যে।

⁸ এ কধানি বিশ্বেজ্‌ গুরিবার। মুই চাং, তুই ইয়েনি পৌইদ্যেনে জোর্ দে, যেনে গোজেন উগুরে যিগুনে বিশ্বেজ্ গোজ্জ্যন তারা অন্যগুনোরে উপকার গুরিবার কামত্ নিজোরে লাগি থেবাত্যেই মনানি দুয়োন। মান্‌জ্যর্ পক্ষে ইয়েনি বেক্কানি গম আর উপকারী।

⁹ অঘা ধোক্ক্যেন তর্কাতর্কি, বংশর-নাঙানি, কোল্-কোজ্জ্যে আর রীতি-সুদোমর্ কধা সলাসুলিত্তুন্ তুই দূরোত্ থাগ, কিয়া ইয়েনি গুরিনে কনঅ লাভ নেই; ইয়েনি বেক্কানি অত্ত-নেইয়্যে।

¹⁰ যে মানুচ্‌ ভুল্ শিক্ষ্যে দিইনে দলাদলির্ সৃট্টি গরে তারে পত্তমে একবার, যেরেদি আর একবার উজিয়ার্ গুরিচ্। ইয়েন্দোই কাম ন-অলে তা সমারে মিলেনা এক্কুবারে বন্ধ গুরি দে।

¹¹ তুই দঅ কোই পারচ, এবাবোত্যে মান্‌জ্যর্ মনর্ চিন্তেগান ভান্ন্যেই। তে পাপী; তে নিজোরে নিজে দুষি বিলিনে প্রমাণ গরে।

শেচ্‌ কধা

¹² মুই আর্তিমা বা তুখিকরে তঅ ইধু দি-পাধেলে তুই নীকপলিত্ মঅ ইধু এবাত্যে বিশেষ গুরিনে চেষ্টা গুরিচ্, কিয়া মুই নীকপলিত্ যার্‌কাল্লো কাদেম্ বিলিনে ঠিগ্ গোজ্জ্যং।

¹³ উকিল্ সীনা আর আপল্লোর যেবার পধত্ যিদ্দূর্ পারচ্ সাহায্য গুরিচ্, যেন তারার্ কনঅ কিজুর্ অভাব ন-অয়।

¹⁴ অন্যগুনোরে উপকার গুরিবার কামত্ নিজোরে লাগি রাগেবাত্যেই আমা মানুচ্চুনোর্ শিগে পরিবো, যেন তারা অন্যগুনোর অভাব্‌ দূর্ গুরি পারন। এবাবোত্যে গুরিলে তারার্ জিংকানিগানি ফলিবো।

¹⁵ মঅ সমারে যিগুনে আঘন সিগুনে বেক্কুনে তরে ভালেদি জানাদন্। খ্রীষ্ট উগুরে বিশ্বেজত্যে যিগুনে আমারে কোচ্‌পান সিগুনোরে ভালেদি জানেচ্। তমা বেক্কুনো উগুরে গোজেনর্ দোয়্যে থোক্।