তীত 2 - Chakma Bible

নানান্ বাবোত্যে মান্‌জ্যত্যে উপদেচ্‌

¹ তুই এন্‌ গুরিনে শিক্ষ্যে দিবে যেনে তঅ কধানি সমারে সত্য শিক্ষ্যের্ মিল্ থায়।

² যিগুনে বুড়ো, তারারে কবে যেন তারা বেক্কানি পৌইদ্যেনে নিজোরে দোঙেই রাগান; তারা যেন সর্মান পেবার যগাজ্জ্যে অন্; তারার্ যেন গম বিচেরবুদ্ধি, সত্য বিশ্বেজ্, কোচ্‌পানা আর ধৈজ্জ্যগুণ থায়।

³ সেবাবোত্যেগুরি বুড়ো মিলেগুনোরে কবে, তারার্ চাল্‌চলনত যেন গোজেন উগুরে ভোক্তি থায় আর তারা যেন গম শিক্ষ্যে দুয়োন। পররে নিন্দে গরানা বা মাত্তল্ অনা তারার্ উচিত নয়।

⁴ সালে তারা গাবুর্ মিলেগুনোরে শিগেই পারিবাক্ যেন তারা নেগরে আর পুয়োগুনোরে কোচ্‌পান,

⁵ নিজোরে দোঙেই রাগান, পবিত্র থান্, সংসার ইন্দি খিয়েল্ গরন, দোয়্যেলু অন্ আর নেগ অধীনোত্ থান্, যেনে কেঅ গোজেনর্ কধা অসর্মান গুরি ন-পারন্।

⁶ সেবাবোত্যে গুরি গাবুর্ মরদ্‌তুনোরে উপদেচ্‌ দুয়ো যেন তারা নিজোরে দোঙেই রাগান।

⁷ বেক্কানিত্ তুই তারা ইধু গম কামর্ এক্কান আদর্শ অ। তঅ শিক্ষ্যে ভিদিরে যেন গম উদ্দেচ্চ্য থায়, সিয়েনত্ যেন পাদল্ মনভাব ন-থায়।

⁸ কেঅ যেনে তঅ দুষ্‌চান ধুরি ন-পারন্ সেবাবোত্যে সত্য শিক্ষ্যে দিস্, যেন তমার বিপক্ষ মানুচ্চুনে লাজান্, কিয়া আমা পৌইদ্যেনে ভান্ন্যেই কধা কবার্ দঅ কিচ্চু ন-থেবঅ।

⁹ যিগুনে চাগর্, তারারে কবা যেন বেক্কানি পৌইদ্যেনে তারা গিরোজ্‌সো অধীনোত্ থান্, তারারে হুজী গুরিবাত্যে চেষ্টা গরন্, কধা উগুরে কধা ন-কন্,

¹⁰ আর গিরোজ্‌সো জিনিস্‌চানি চুর্ ন-গরন, বরং তারা যে পুরোপুরি গুরি বিশ্বেজ্‌বলা সিয়েন প্রমাণ গরন্। যেন তারা আমার্ উদ্ধোর গুরিয়্যে গোজেন পৌইদ্যেনে যে শিক্ষ্যেগানি আঘে সিয়েনি বেক্কানিত্তুন্ দোল্ গুরি ফগদাং গুরি পারন।

¹¹ গোজেনর্ যে দোয়্যেলোই পাপত্তুন্ উদ্ধোর্ পাহ্ যায় সিয়েন বেক্‌ মানুচ্চুনো ইধু ফগদাং পেয়্যে।

¹² এই দোয়্যেগানে আমারে শিক্ষ্যে দেত্তে যেন আমি গোজেন উগুরে ভোক্তি-নেইয়্যে আর জগদর্ কামনা-বাসনারে এলাফেলা গুরিনে এ জগদত্ নিজোরে দোঙেই রাগেইনে গোজেন-ভোক্তি সমারে গম্ জিংকানি কাদেই,

¹³ আমার দাঙর্ গোজেনে আর উদ্ধোর গুরিয়্যে যীশু খ্রীষ্টর্ মহিমাভরা ফগদাঙর্ হুজিয়ে-ভরা আজা পূরেবাত্যে আওজ্‌ গুরিনে বাজ্জেই থেই।

¹⁴ যীশু খ্রীষ্ট আমাত্যে নিজো জিংকানিগান দিয়্যে, যেন বেক্‌ পাপ্‌পানিত্তুন আমারে উদ্ধোর্ গুরি পারে আর সিয়েন্দোই এমন্‌ এক দল মান্‌জ্যরে সিজি গুরি পারে যিগুনে বানা তা মানুচ্ অবাক্ আর যিগুনে অন্যগুনোরে উপকার গুরিবাত্যে আয়োজি অবাক্।

¹⁵ সেনত্যে পুরো অধিকার নিইনে তুই এ পৌইদ্যেনে শিক্ষ্যে দে, উপদেচ্‌ দে আর দুষ্ দেগেই দে। কেঅ যেন তরে ঈচ্ ন-গরন্।