তীত 1 - Chakma Bible

¹ মুই পৌল গোজেনর্ চাগর আর যীশু খ্রীষ্টর্ এক্কো প্রচারক ওইয়োং, যেন মুই গোজেনর্ বেঈ লোইয়্যে মানুচ্চুনোরে বিশ্বেজর্ পধেদি আনি পারং, আর গোজেন-ভোক্তির্ সমারে যে সত্যগান আঘে সেই সত্যগানরে জানিবাত্যে তারারে সাহায্য গুরি পারং।

² উমর্‌‌অ জিংকানি পেবার আজালোই মুই খ্রীষ্টরে সেবা গুরি যাঙর্। জগদ্‌‌তান সৃট্টি অবার আগেদি গোজেনে, যিবে মিজে কধা ন-কয়, তে এই জিংকানিগান দিবার এগেম্ গোজ্জ্যে।

³ আমার উদ্ধোর্ গুরিয়্যে গোজেনর্ উগুম মজিম মুই যিয়েনি প্রচার গরং সিয়েনিত্যে গোজেনে তার্ কধানি ঠিগ্ সময়োত্ ফগদাং গোজ্জ্যে।

⁴ খ্রীষ্ট উগুরে বিশ্বেজ্ গুরিনে যে মঅ সমারে এক ওই যেয়্যে, মর্ সেই আজল্ পুয়োবো তীত ইধু মুই এ চিধিগান লেগঙর্। বাবা গোজেন আর আমার্ উদ্ধোর্ গুরিয়্যে খ্রীষ্ট যীশু তরে দোয়্যে গোরোক্ আর শান্তি দান গোরোক্।

ক্রীট দ্বীবোত্ তীতর্ কাম

⁵ ক্রীট দ্বীবোত্ যে কামানি এজঅ সং আদ্‌ধান্ন্যেগুরি রোইয়্যে সিয়েনি ঠিগ্ গুরিবাত্যে মুই তরে ক্রীট দ্বীবোত্ থোই এচ্চ্যং। মুই তরে যে উগুমানি দুয়োং সেই মজিম পত্তি শঅর মন্ডলীর্ আজল্ নেতাগুনোরে কামত্ অদেঅদে রাগা।

⁶ মন্ডলীর আজল্ নেতাবোর্ এমন্‌ উয়ো পড়িবো যেন কেঅ তারে দুষ্ দি ন-পারন্। তার বানা এক্কো মোক্ থেবঅ। তার্ পুয়ো-ছাগুনে যেন খ্রীষ্ট উগুরে বিশ্বেজি অন্, যেন তারা নিজোর্ হুজি মজিম ন-চলন্ আর অবাধ্য ন-অন্।

⁷ গোজেনত্তুন্ কামর্ ভারান পেইয়্যে মানুচ্ ইজেবে সেই পরিচালক্কোত্তুন্ এমন্‌ উয়ো পরিবো যেনে কেঅ তারে নিন্দে গুরি ন-পারন। তে যেন একগোঙ্যে, রাগী, মাত্তল্ বা বদ্‌মেজাজী ন-অয়। অন্যেয় লাভ ইন্দি যেন তার্ মনান্ ন-থায়।

⁸ সিয়েনর্ বদলে গর্‌‌বা-লবিয়োত্ আর দোয়্যের্ কাম গুরিবাত্যে তে যেন গম্‌ পায়। তার গম্ বিচের বুদ্ধি থেবঅ, তে সৎ আর গোজেনর্ বাধ্য অবঅ আর নিজোরে দোঙেই রাগেব।

⁹ গোজেনর্ বিশ্বেজবলা কধানি, যিয়েনি মুই শিক্ষ্যে দুয়োং, তাত্তুন্ সিয়েনি দরমর গুরি ধুরি থা পরিবো, যেন সত্য শিক্ষ্যে পৌইদ্যেনে তে প্রচার গুরি পারে আর যিগুনে বিরুদ্ধে যান্ তারারে ভুলানি দেগেই দি পারে।

¹⁰ এধোক্ক্যেন বোউত্ মানুচ্‌ আঘন্ যিগুনে উল্লো, যিগুনে বাজে কধা কন্ আর যিগুনে ছলনা গুরি বেড়ান্। যিগুনে চুনু মাঢা কাবানা উগুরে জোর্ দুয়োন, বিশেষ গুরি মুই তারা কধানি কঙর্।

¹¹ এ মানুচ্চুনোর মুয়োনি নাঢি দেনা দরকার, কিয়া অন্যেয় লাভত্যে তারা এন্‌ শিক্ষ্যে দুয়োন যিয়েনি তারার্ দেনা উজিত নয়; আর এবাবোত্যে গুরি তারা কয়েক্কো ঘোর্‌‌‌‌‌বোরে ভস্ত গুরি ফেলেয়োন।

¹² তারার্ নিজোর এক্কো ভাববাদীয়ে এ কধাগান কোইয়্যেদে, “ক্রীট দ্বীবোর মানুচ্চুনে আজলে মিজে মাদিয়্যে, ঝার্‌বো য়েমান ধোক্ক্যেন, আল্‌সি আর পেদুক্।”

¹³ কধাগান সত্য। ইয়েনত্যে ভারী করা-করি গুরি তারার্ দুষ্‌চানি দেগেই দুয়ো যেন তারা খ্রীষ্টীয় ধর্ম-বিশ্বেজ্‌চানরে গমেডালে ধুরি রাগান,

¹⁴ আর যিহূদীগুনোর্ হিত্যে-কধালোই আর যিগুনে গোজেনর্ সত্যত্তুন্ ফিরি যেইয়োন তারার্ উগুমে কান ন-পাদন্।

¹⁵ যিগুনোর্ মনানি সিজি তারা ইধু বেক্কানি সিজি, মাত্তর্ যিগুনোর্ মনানি কুজুরো আর যিগুনে অবিশ্বেজি তারা ইধু কিচ্চু সিজি নয়; এন্‌ কি, তারার্ মনানি আর বিবেক্‌কান্‌অ কুজুরো‌।

¹⁶ মুয়োদি তারা কন্দে তারা গোজনরে জানন্, মাত্তর্ তারার্ কামানিলোই তারা তারে অস্বীগের্ গরন্। তারা ঈচ্‌গরা খেইয়্যে আর অবাধ্য; তারা কনঅ গম কামর্ যগাজ্জ্যে নয়।