পরমগীত 8 - Chakma Bible

¹ আহ্, যুনি তুই মঅ ভেইবো ধোক্ক্যেন্ অদে যে মঅ মাবো দুধ্‌তান হেইয়্যে! সালে মুই তরে বারেদি পেলেয়ো চুমি পারিদুং, কনজনে মরে কিজু কোই ন-পারিদাক্;

² সালে মুই তরে পথ্ দেগেইনে মঅ মাবো ঘরত্ আনিদুং, আর তুই মরে শিক্ষ্যে দিদে। মুই তরে তুম্বাজ্ মজলা-দিয়্যে আংগুর-রস হেবাত্তে দিদুং, হেবাত্তে দিদুং মর্ ডালিমোর্ মিদে রস।

³ মঅ মাঢাবো তলেদি আগেদে তা বাঙ্ আঢ‌্‌তান, আর ডেন্ আঢ্‌‌‌‌তানে মরে আজাবোদে ধোজ্যে। ‌‌‌‌‌

⁴ ও যিরূশালেমর্ মিলেগুন, মুই তমারে কোজোলি গুরিনে কঙর্, তুমি কোচ্‌পানাগানরে ন-জাগেয়ো বা উচ্চোমি তুলি ন-দুয়ো যেদক্কন্ সং তার্ যগাজ্যে সময় ন-অয়। ‌‌‌‌‌‌‌

সমাজ্যেগুনোর্ কধা:

⁵ তার পরাণ্যে উগুরে ভর্ দিইনে ধূল্যেচর-চাগালাত্তুন্ যে এজের্ সিবে কন্না? আপেল গাজ তলে মুই তরে জাগেলুং; তঅ মা সিয়েনত্ পুয়ো পুদেইনে তরে জর্ম দিয়্যে।

পরাণির্ কধা:

⁶ সীলমহ্‌র ধোক্ক্যেন্ গুরি তুই মরে তঅ মনত্ আর তঅ আঢত্ রাগা; কিত্তে কোচ্‌পানাগান্ মরণ ধোক্ক্যেন্ খেমতাবলা, পাওনা কোচ্‌‌‌‌পানার্ আওজ্‌‌‌চান মরণ জাগা ধোক্ক্যেন্ উদি ন-যায়।‌‌

⁷ বান পানিগানেয়ো কোচ্‌পানাগানরে আক্‌সোই ন-পারে; বেক্ গাঙ পানিয়েয়ো ন-পারে সিয়েনরে ভাজেই নিবাত্তে। কোচ্‌‍পানাত্তে যুনি কনজনে তার্ বেক্কানিয়ো দি দে সালে সিয়েন্ অবঅ অমকদ কম্। ‌‍

সমাজ্যেগুনোর্ কধা:

⁸ আমার্ এক্কো চিগোন্ বোন আঘে, তার বুগ্ দ্বিবে এজঅ দাঙর্ ন-অয়। সেদিন্যে আমি কি গুরিবোং যেদিন্যে তার্ বৌ যেবার্ কধাবাত্তা অবঅ?

⁹ তে যুনি দেবাল অদঅ সালে আমি তা উগুরে রূবো দিইনে অজল্ চুগিদার-ঘর বানেদুং। যুনি তে দোর্ অদঅ সালে এরস গাজর্ তক্তালোই আমি তারে বানি রাগেদং।

পরাণির্ কধা:

¹⁰ মুই দঅ এক্কান্ দেবাল্, আর মর্ বুগ্‌‍‍ দ্বিবে অজল্ চুগিদার-ঘর ধোক্ক্যেন্। মুই তা চোগেদি সেধোক্ক্যেন্ অলুং‌‍‍ যিয়েন্ ঈল্ ফুদোনাগান্ আনি পারে।

¹¹ বাল্-হামোনত্ শলোমনর্ এক্কান আংগুর খেত্ আঘে; তে সিয়েন্ চেইচিদিয়্যেগুনোর্ আঢত্ দিয়্যে। তা ফলুনোর্ দাম ইজেবে পত্তিজনে বার কেজি রূবো দিয়্যে পরে।

¹² মর্ নিজোর আংগুর খেত্ আঘে, যিগুন বানা মুই দি পারং। ও শলোমন, সেই বার কেজি রূবো তরই থোক্, মাত্তর্ আড়ি কেজি থোক্ তারাত্তে যিগুনে ফলুনোর্ দেগাশুনো গত্তন্।

পরাণ্যের্ কধা:

¹³ তুই দঅ বাগানে বাগানে থাচ্; তঅ সমাজ্যেগুনে তঅ রবো শুনোন্, মরেয়ো সিবে শুনিবাত্তে দে।

পরাণির্ কধা:

¹⁴ মর্ পরাণ্যে, আঢি আয়; তুম্বাজ্ মজলা-ভরা মুড়ো উগুরে তুই চুন্নু উরিঙো ধোক্ক্যেন্ অ বা উরিঙো ছঅ ধোক্ক্যেন্।