পরমগীত 7 - Chakma Bible

¹ ও রাজার্ ঝিবো, জদা ভিদিরে তর্ দ্বিয়েন্ টেঙ্ চাদে কেজান্ দোল্! তর্ দ্বিবে উলুহুল চেঙারাগান্ মানেগ ধোক্ক্যেন্, সিগুন যেন কাবিল্ কালিগরর্ আঢ কাম্।

² তঅ নেইবো রিনি চাদে গুল্ পিলে ধোক্ক্যেন্ যিবে ভিদিরে মিজেয়্যে আংগুর-রসর্ অভাব ন-অয়। তঅ পেট্‌তো চাদে উড়ি যেইয়্যে গম কুড়ো ধোক্ক্যেন্ যিয়েনর চেরোকিত্তে লিলি ফুল্লোই ঘিজ্যে।

³ তর্ বুগ্ দ্বিবে যেন উরিঙোর্ দ্বিবে ছঅ, চুন্নু উরিঙোর্ জামা ছঅ ধোক্ক্যেন্।

⁴ এদো দাদর্ অজল্ চুগিদার-ঘর ধোক্ক্যেন্ তঅ গত্তনাবো, তর্ চোগ্ দ্বিবে বৎ-রব্বীমর গেদো ইদু হিষ্‌বোনর্ পুয়োরুনো ধোক্ক্যেন্। তঅ নাগ্‌‌কো যেন দামেস্ক ইন্দি মু লেবাননর্ অজল্ চুগিদার-ঘর।

⁵ তঅ কিয়্যেগান্ উগুরে তঅ মাঢাবো কর্মিল মুড়োবো ধোক্ক্যেন্; জোক্‌জোক্যে নরম কাবড় ধোক্ক্যেন্ তঅ চুলান্; সেই চুল যুদোবোলোই রাজা বন্দী ওই আঘে। ‌‌‌

⁶ ও মর্ পরাণি, মরে হুজি গুরিয়্যেবো, তুই কি দোল্, কি অমকদ দোল্!

⁷ তঅ কিয়্যে গঠনান্ খাজোর্ গাজ ধোক্ক্যেন্, আর বুগ্ দ্বিবে যেন আংগুরর্ দ্বিবে থুপ্।

⁸ মুই কলুং, “মুই খাজোর্ গাজত্ উদিম্, মুই সে ফলুন্ ধুরিম্।” তর্ বুগ্ দ্বিবে ওক্ আংগুরর্ থুপ্, তঅ নিজেযর্ বাজ্‌‌‌ছান ওক্ আপেল ধোক্ক্যেন্,

⁹ আর তঅ মুয়োন্ ওক্ বেগত্তুন্ গম্ আংগুর-রস। সেই আংগুর-রস্‌চান সোজাগুরি মঅ পরাণ্যের্ গত্তনাবোত্ লামি যোক্, ‌‌‌ যেধোক্ক্যেন্ ঘুমোত্ পোজ্যে মানুচ্চুনোর্ ঠুদো ভিদিরেদি আংগুর-রস সহজে যায়।

পরাণির্ কধা: ‌‌‌

¹⁰ মুই মর্ পরাণ্যের্, তা কামনা-বাসনাগান্ মত্তেই।

¹¹ মর্ পরাণ্যে, আঢিচ্, আমি মাঢত্ যেই, মেহেদী ঝুবো ভিদিরে যেইনে রেত্তো কাদেই।

¹² আঢিচ্, আমি বেন্যেমাদান্ আংগুর ক্ষেদত্ যেই, চেই, আংগুর লুদিত্ বোল্ পোজ্যন্ নাহি, সিয়েনত্ ফুল ধোজ্যন্ নাহি আর ডালোম ফুল ফুত্যন্ নাহি; মুই সিদু তরে মর্ কোচ্‌‌পানাগান্ দান গুরিম্। ‌

¹³ দূদাফলুনে তা তুম্বাজ্‌ছান ছিদি দেদন্; তাজা আর পাগানা নানান্ বাবোত্যে গম্ গম্ ফল আমা দোরান কায়-কুরে আগন্। মর্ পরাণ্যে, মুই তত্তেই ইয়েনি রাগেয়োং।