পরমগীত 4 - Chakma Bible

¹ মর্ পরাণি, কি দোল্ তুই! অয়, তুই দোল্‌বি। ঘঙদা ভিদিরে তঅ চোগ্‌কুন দ্বিবে কঅ ধোক্ক্যেন্। তঅ চুলান্ যেন গিলিয়দ মুড়োবোত্তুন্ লামি এচ্চ্যে ছাগল পাল্।

² তঅ দাদ্‌তুন্ এমন পাদি ভেড়া পাল ধোক্ক্যেন্ যিগুনে ইক্কিনে কেশ্‌চানি কাবিনে গাদিগাদাই এচ্চ্যন্। তারার্ বেক্কুনোর্ জড়া আঘে, কনবো ন-আজন্! ‌‌‌ ‍

³ তর্ ঠুট্ দ্বিবে রাঙা রংয়র্ সুদো ধোক্ক্যেন্ রাঙা; কি দোল্ তঅ মুয়োন্! ঘঙদা ভিদিরে তঅ কবাল দ্বিকিত্তেদি যেন অদ্দেক্ হেইয়্যে ডালোম্।

⁴ তঅ গত্তনাবো যেন দায়ূদোর অজল চুগিদার-ঘর ধোক্ক্যেন্ লাম্বা; সিয়েনত্ দুলি দুলি আগেদে এক আজারান্ ঢাল্, সিয়েনি বেক্কানি যুদ্ধোগুরিয়্যেগুনোর্।

⁵ তর্ বুক্ দ্বিবে যেন লিলি ফুলোর্ ঝারত্ বেড়েয়্যে চুন্নু উরিঙোর্ জামা ছঅ।

⁶ যেদক্কন্ সং বেন্যে পহ্‌‌‌র ন-অয় আর আন্ধারান্ ন-যায় সেদক্কন্ মুই তুম্বাজ রস মুড়োবোত্, অয়, আগর্‌বাট্টির্ মুড়োবোত্ থেম্।

⁷ মর্ পরাণি, তঅ কিয়্যেগানর্ বেক্কানি দোল্, তঅ ভিদিরে কনঅ টেপ্‌পোজ্যে নেই।

⁸ মেলা ঘরর্ মর্ বৌবো, লেবাননত্তুন্ মঅ সমারে আয়, মঅ সমারে লেবাননত্তুন্ আয়। অমানার্ মুড়ো চুক্কোত্তুন্, শনীর আর হর্মোণ মুড়োবোর্ উগুরেত্তুন্, সিংহ গাদত্তুন্, হোক্যে বাঘর্ মুড়োমুড়ি থেবার্ জাগানত্তুন্ তুই লামি আয়।

⁹ মর্ পরাণি, মর্ বৌবো, তুই মঅ মনান্ চুর্ গোজ্যস্; তর্ এক চোগো ইজিরেলোই, তঅ নেগেলেজর্ এক্কো মানেক্কোই তুই মঅ মনান্ চুর্ গুরি নেযেয়োচ্।

¹⁰ মর্ পরাণি, মর্ বৌবো, তঅ কোচ্‌পানাগানে কত্তমান্ হুজি গরায়! আংগুর-রসত্তুন্ বেশ্ তঅ কোচ্‌পানাগান্, আর বেক্ মজলাগানিত্তুন্ তঅ তুম্বাজ্‌ছানর্ দোল্ তুম্বাজ্ আরঅ কত্তমান্ বেশ্ গম্!

¹¹ মর্ বৌবো, তঅ ঠুট্‌তোত্তুন্ ফুদো ফুদো মধু ঝরে। তঅ জিলান তলে আগেদে দুধ আর মধু; তঅ কাবড় বাজ্‌ছান লেবানন ঝারর্ তুম্বাজ ধোক্ক্যেন্। ‌

¹² মর্ পরাণি, মর্ বৌবো, তুই যেন দেবাল্লোই ঘিজ্যে এক্কান বাগান্; তুই যেন আক্‌সো রাগেয়্যে পয়নালা, বানি রাগেয়্যে তান্জাং। ‌‌‌

¹³ তুই যেন দোল্ এক্কান ডালুমো বাগান; সিয়েনত্ আগেদে গম্ গম্ ফল, মেহেদী আর তুম্বাজ লুদি।

¹⁴ আগেদে জটামাংসী, জাফরান্, বচ, দারুচিনি আর নানান্ বাবোত্যে ধূপোর্ গাজ্; সিদু আগেদে তুম্বাজ রস, অগুরু আর বেগত্তুন্ গম্ নানান্ বাবোত্যে তুম্বাজ মজলা।

¹⁵ তুই যেন বাগানর্ পয়নালা, যেন উদুরে উঠ্যে কূয়ো পানি, যেন লেবাননত্তুন্ লামি এচ্চ্যে পানি গঙার্।

পরাণির্ কধা:

¹⁶ উত্তোরেদি বোইয়্যেরান্ জাগি উঠ্, দোগিনে বোইয়্যেরান্ আয়। মঅ বাগানান উগুরেদি বেই যাহ্ যেনে সিয়েনর্ তুম্বাজ্‌ছান ছিদি পড়ে। মর্ পরাণ্যে যেন তা বাগানানত্ এইনে তার গম্ গম্ ফলুন্ খান্।