পরমগীত 3 - Chakma Bible

¹ রেদোত্ মঅ বিচ্ছোনানত্ মর্ পরাণর্ কোচ্‌পানাগানরে মুই তোগেয়োং; মুই তারে তোগেয়োং, মাত্তর্ ন-পেলুং। ‌‌‌

² মুই ভাবিলুং, মুই ইক্কিনে উদিনে শঅর ভিদিরে ঘুরি বেড়েম্, ঘুরি বেড়েম্ পধে পধে, চক্করে চক্করে; সিদু মুই মর্ পরাণর্ কোচ্‌‌‌পানাগানরে তোগেম্; মুই তারে তোগেয়োং মাত্তর্ তারে ন-পেলুং।

³ চুগিদারুনে শঅরত্ ঘুরি ঘুরি চুগি দিবার্ সময়োত্ মরে দেগিলাক্। মুই তারারে পুযোর্ গুরিলুং, “তুমি কি মঅ পরাণর্ কোচ্‌‌‌‌পানাগানরে দেখ্য?”

⁴ তারারে ফেলেইনে উজেই যাদে মুই মর্ পরাণর্ কোচ্‌পানাগানরে দেগিলুং। তারে ধুরিনে মর্ মাবো ঘরত্ ন-আনানা সং মুই তারে ন-ছাড়িলুং; যিবে মরে পেদত্ রাগেয়্যে মুই তা ঘরত্ তারে আনিলুং। ‌‌‌‌‌‌‌‌‌

⁵ ও যিরূশালেমর্ মিলেগুন্, মুই চুন্নু উরিং আর মাঢ পাড়ি উরিঙুনোর্ নাঙে কোজোলী গুরিনে কঙর্, তুমি কোচ্‌‌‌‌‌‌পানাগানরে ন-জাগেয়ো বা উচ্চোমি তুলি ন-দুয়ো যেদক্কন্ সং তার্ যগাজ্যে সময় ন-অয়।

যিরূশালেম মানুচ্চুনোর্ কধা:‌‌‌‌‌‌

⁶ ধূল্যেচর-চাগালাত্তুন্ ধূমো খুদো ধোক্ক্যেন্ যে এজের্ সিবে কন্না? সে ধূমো খুদোবোত্ আগেদে বেবসায়িগুনোর নানান্ বাবোত্যে মজলা, তুম্বাজ রস্ আর তুম্বাজ আগর্‌বাট্টির্ বাজ্।

⁷ চাহ্, উবোন্ শলোমনর্ পালকী! ষায়েটজন বীর যোদ্ধা আগন্ সে পালকীনর্ চেরোকিত্তেদি; তারা ইস্রায়েলর বেগত্তুন্ খেমতাবলা বীর।

⁸ তারার্ বেক্কুনো সমারে তলোয়ার্ আঘে, যুদ্ধোত্ তারা বেক্কুনে কাবিল্; তলোয়ারান্ কমরত্ বানি নেযেইনে তারা বেক্কুনে যুক্কোল্ আগন্ রেদোর্ দযাগানত্তে।

⁹ রাজা শলোমনে এ পাল্‌‌‌‌‌‌‌কীগান বানেয়্যেদে নিজোত্তে, বানেয়্যেদে লেবাননর্ তক্তালোই। ‌‌‌‌‌‌‌

¹⁰ সে পালকীগানর্ খুদোগুন্ রূবোলোই বানেয়্যে, তলাগান্ সনালোই বানেয়্যে, আসনান তার্ বিগুনো রঙর্; যিরূশালেমর্ মিলেগুনে কোচ্‌‌‌‌‌‌‌‌পেইনে সিয়েন ভিদিরে কট্টাগান নক্‌সা গুরি দুয়োন্।

¹¹ ও সিয়োনর্ মিলেগুন্, তুমি নিগিলি এজঅ, চঅ, রাজা শলোমনে মুকুট্ পিনি আঘে; তার্ মেলা-মেইট্‌বান দিনোত্, তা মনর্ হুজি দিনোত্, তার্ মাবো তারে মুকুট্ পিনেই দিয়্যে।