পরমগীত 1 - Chakma Bible

¹ ইবে বেগত্তুন্ দোল্ গান। এ গান্নো শলোমনর্।

পরাণির্ কধা:

² তুই চুমিনে চুমি মরে মনান্ ভোরেই দে, কিত্তে তঅ কোচ্‌পানাগান্ আংগুর-রসত্তুন্ বেশ্ গম্।

³ তঅ তেলানর্ তুম্বাজ্‌চানে হুজি রাগায়; ঢালি দিয়্যে তুম্বাজ তেল ধোক্ক্যেন্ তঅ নাঙান্। সেনত্তে দঅ মিলেগুনে তরে কোচ্‌পান।

⁴ মুই রাজারে কলুং, “তুই মরে তঅ সমারে নেযা; আঢিচ্, আমি যাদিমাদি যেই।” তে মরে তা ঘরত্ নেযেল। আমি তরে নিইনে ফুত্তি গুরিবোং আর হুজি অবং; আংগুর-রসত্তুন্ বেশ্ তঅ কোচ্‌পানাগান বাঈনী গুরিম্। তারা যে তরে কোচ্‌পান সিয়েন্ ঠিগই গরন্।

যিরূশালেম মিলেগুনোর্ কধা: পরাণির্ কধা:

⁵ ও যিরূশালেমর্ মিলেগুন্, মুই কেদর তাম্বুলো ধোক্ক্যেন্ কালা মাত্তর্ শলোমন তাম্বুলো পর্দাগান ধোক্ক্যেন্ দোল্।

⁶ মুই কালা বিলিনে মন্দি এবাবোত্যেগুরি চেই ন-থেচ্, কিত্তে বেলানে মঅ রঙান্ কালা গোজ্যে। মঅ ভেইয়ুনে মঅ উগুরে রাগ্ গরন্ আংগুর খেদ্‌তান রিনি চেবার্ ভারান্ মরে দুয়োন্, সেনত্তে মঅ নিজো আংগুর খেত্ চানাগান্ মুই ন-গরং।

⁷ ও মর্ পরাণান্, তুই মরে কঅ, কুদু তঅ ভেড়া পালুন্ তুই চড়া? তঅ ভেড়াগুনোরে দ্বিবুজ্যে কুদু জিরেবাত্তে দুয়োজ্? তঅ সমাজ্যে গরক্কুনোর্ ভেড়া পালুনো ইদু কিত্তে মুই ঘঙদা দিয়্যে বেশ্যে ধোক্ক্যেন্ যেম্?

গোরক্কুনোর্ কধা:

⁸ ও বেগ দোল্ মিলেবো, তুই যুনি সিয়েন হবর্ ন-পাজ্ সালে ভেড়া পালর্ টেঙ চিহ্নোগান্ ধুরি এইনে গরক্কুনোর্ তাম্বুলানি কায়-কুরে তর্ বেক্ ছাগল ছঅগুন্ চরা।

পরাণ্যের্ কধা:

⁹ ও মর্ পরাণি, ফরৌণ রথ্‌তানর এক্কো পাড়ি-ঘড়া সমারে মুই তরে তুলোনা গোজ্যং।

¹⁰ তঅ গালানর্ দ্বিকিত্তেদি কান দুলুন্ দুলোদন্, সেক্কে তঅ গালান্ দোল্ লাগের্ আর নেগেলেচ্চো তঅ গত্তনাবোত্ দোল্ গুরি মানেয়্যে।

¹¹ আমি তত্তে সোনার্ আড়ুক্ গোজ্যে রূবোর্ কান দুল্ বানেবং।

পরাণির্ কধা:

¹² রাজা যেক্কেনে তা বিচ্চোনত্ এলঅ সেক্কে মঅ তুম্বাজ্‌ছানে তুম্বাজ্ নিগিলে ধুরিলো।

¹³ মর্ পরাণ্যে মইদু যেন তুম্বাজ রস্ রাগেবার চিগোন্ থৈল্যে যিয়েন মর্ বুগো ভিদিরে থায়।

¹⁴ মর্ পরাণ্যে মইদু যেন এক বনা মেহেদী ফুল যিবে ঐন্-গদীর আংগুর খেদত্ জর্মায়।

পরাণ্যের্ কধা:

¹⁵ মর্ পরাণি, কি দোল্ তুই! অয়, তুই দোল্। তঅ চোগ্‌কুন দ্বিবে ক ধোক্ক্যেন্।

পরাণির্ কধা:

¹⁶ মঅ পরাণ্যে, কি দোল্ তুই! অয়, তুই অমকদ দোল্। আমা বিচ্ছোনান্ পাদালোই ভরা ডেলালোই বানেয়্যে।

¹⁷ এরস গাজ্‌ আমা ঘরর্ ধার্‌বো, আর বেরস গাজ্ আমা ঘর ছালানর্ বীমুন।