রূত 2 - Chakma Bible

রূত আর বোয়স

¹ নেক্কো ইন্দি নয়মীর এক্কো সর্মানী মাজন্‌ কুদুম্মো এলঅ‌। তে ইলীমেলক গুট্টির্‌ মানুচ্‌। তা নাঙান্‌ এলদে বোয়স।

² একদিন্যে মোয়াবীয় রূতে নয়মীরে কলঅ, “মুই ক্ষেদত্‌ যেইনে পড়ি-আগন্দে ধান শীজেগুন্‌ কুড়ে আনিমবোই নাহি? যে মরে মেইয়্যে গুরিনে কুড়েই নিবাত্তে দিবো মুই তা পিজে পিজে থেইম্‌।” নয়মী তারে কলঅ‌, “অয়, মা, যাহ্।”

³ সেক্কে রূতে নিগিলি গেলঅ‌ আর খেদত্‌ যেইনে যিগুনে ফসলানি কাবদন্‌ তারার পিজে পিজে শীজেগুন কুড়ো ধুরিলো; আর এন্‌ অলঅ‌, তে যিয়েনত্‌ শীজেগুন কুড়োর্‌ সিগুন্‌ অলদে ইলীমেলকর গুট্টির্‌ বোয়সর ক্ষেততান্‌।

⁴ এমন্‌ সময়োত্‌ বোয়সে বৈৎলেহমত্তুন এলঅ‌ আর যিগুনে ফসল কাবদন্‌ তারারে কলদে, “লগেপ্রভু তমা লগে থোগ্‌।” তারায়ো ফিরিনে তারে কলাক্‌, “লগেপ্রভু তরে বর্‌ দোক্‌।”

⁵ বোয়সর যে চাগর্‌বো ফসল কাবেদে কামানি চেইদিদো বোয়সে তারে পুজোর্‌ গুরিলো, “এই গাবুর্‌ মিলেবো কার্‌?”

⁶ যে মানুচ্চো কামানি দেগাশুনো গুরিদো তে জোবত্‌ কলদে, “মোয়াব্‌ দেজত্তুন নয়মীর লগে যে মোয়াবীয় মিলেবো এচ্ছ্যে ইবে তে।

⁷ মিলেবো কোইয়্যেদে, যিগুনে ফসল কাবদন্‌ তারার্‌ পিজে পিজে বনাগুনোর্ সেরে সেরে পড়ি থেইয়্যে শীজেগুন যেনে তারে মেইয়্যে গুরি কুড়েই নিবাত্তে দিয়্যে অয়। এধোক্ক্যেন গুরিনে তে বেন্যেত্তুন্‌ ধুরি এদক্ষণ সং ইদু আঘে; বানা হানক্ষণ তে ছালত্‌ তলে জিরেইয়্যে।”

⁸ সেক্কে বোয়সে রূতরে কলঅ‌, “এইয়্যে মা, শুন্‌। তুই এ ক্ষেদ্‌তান্‌ ছাড়িনে অন্য কনঅ‌ ক্ষেদত্‌ ধান শীজেগুন কুড়েবাত্তে ন-যেইনে মঅ‌ কামর্‌ মিলেগুনো সমারে ইদু থেইচ্‌।

⁹ ভূইয়োর কন্‌জাগানত্‌ মানুচ্চুনে ফসল কাবদন্‌ সিয়েনি উজ্‌ রাগেইনে তুই কামর্‌ মিলেগুনোর পিজে পিজে সিদু যেচ্‌। মুই মানুচ্চুনোরে কোই দুয়োং যেনে তারা তরে তোচ্যে ন-লাগান্‌। মঅ‌ মানুচ্চুনে যে পানিগান তুল্যন্‌, পানিতিরেস্ পেলে তুই সিয়োত্তুন পানি খেচ্‌।”

¹⁰ এ কধাগান শুনিনে রূতে মাদিত্‌ মাদা নিগিরিনেই তারে সালাম্‌ গুরিনে কলঅ‌, “তুই মেইয়্যে গুরিনে মঅ‌ উগুরে এদক্‌ মনান্‌ দুয়োচ্‌, ইয়েন্‌ কেধোক্ক্যেন্‌ গুরিনে অলঅ? মুই দঅ‌ এক্কো বিদেশী মিলে।”

¹¹ সেনে বোয়সে কলদে, “তঅ‌ নেক্কোর্‌ মরাণার পরেন্দি তুই তঅ‌ শুড়ীবোত্তে যিয়েনি গোজ্যস্‌ সিয়েনি বেক্কানি মুই শুন্যং, আর ইয়েন্‌অ শুন্যং, তঅ‌ মা-বাপ্‌পুন আর জর্ম ওইয়্যে জাগায়ান ছাড়িনে তর্‌ অজানা এক্কো জাদঅ‌ ভিদিরে তুই বজত্তি গুরিবাত্তে এচ্ছোস্‌।

¹² ইয়েনত্যেই লগেপ্রভু যেনে তরে বর্‌ দে। ইস্রায়েলীয়গুনোর গোজেন্‌ লগেপ্রভু, যিবের্‌ ছাবাত্‌ তলে তুই ঝিরেবাত্তে এচ্ছোস্‌, তে যেনে তরে তর্‌ পাওনাগান পুরোপুরিই দে।”

¹³ সেক্কে রূতে কলঅ, “ও মর্‌ প্রভু, তুই যেনে মরে মেইয়্যের চোগেন্দি চাজ্‌। তর্‌ এ চাগরানিবো ইদু উজ্‌সোমির্‌ কধানি কোইনে তুই মরে বুঝেলে, যুনিয়ো মর্‌ এই কামঅ‌ মিলেগুনোর কার লগে থিয়্যেবার সেদাম্অ মত্তুন্‌ নেই।”

¹⁴ হেবার সময় অলে বোয়সে তারে কলঅ, “তুই ইদু এইনে ইয়োত্তুন পিদে নেযেইনে রসঅ পিলেবোত্‌ ভুরেনে খাহ্।” যিগুনে ফসল কাপ্পন্‌ রূতে তারা ইদু যেইনে বজানার পরেন্দি বোয়সে আত্তান বাড়েইনে তারে কিজু ভাজি গোজ্যে শোজ্য দিলো। তে পেট ভরে সং খানার পরেন্দিয়ো কিজু বাগি রলঅ।

¹⁵ সে পরেন্দি তে যেক্কে শীজে কুড়েবাত্তে উদিলো সেক্কে বোয়সে তা মানুচ্চুনোরে কোই দিলো, “যুনি তে বনাগুনো সংমোধ্যেত্তুন্অ কুড়েইনে নেযায় তো তারে তুমি গেইল্ ন-দুয়ো।

¹⁶ তুমি আজলে ফসল কাবিবার সময় কিজু কিজু শীজে টানিনে নিগিলেই রাগে দুয়ো আর তারে সিগুন কুড়েবাত্তে দুয়ো, ধমক্ ন-দুয়ো।”

¹⁷ রূতে সাজোন্যে সং সেই ক্ষেত্‌থানদ্‌ শীজে কুড়েল। যে কেচ্‌বিঝিগুন তে কুড়েয়্যে সিগুন্‌ ঝাড়িনে মাবানার পরেন্দি সিগুনোর ওজন অলাক প্রায় আদার কেজি।

¹⁸ তে সেই কেচ্‌বিঝিগুন নেযেইনে আদামত্‌ ফিরি গেলঅ। তে যিদুক্কুন শীজে কুড়েইয়্যে তা শুড়ীবো সিগুন্‌ দেগিলো। পেট ভরেসং খানার পরেন্দি বাগী যে খাবারানি তে রাগেই দিলো সিগুন নিগিলেনেই তা শুড়ীবোরে দিলো।

¹⁹ তা শুড়ীবো তারে পুজোর্ গুরিলো, “তুই এচ্চ্যে কুত্তুন্‌ কুড়েয়োচ্‌, কুদু কাম্‌ গোজ্যচ্‌? যে তঅ উগুরে খিয়েল্ রাগেয়্যে গোজেনে তারে বর্ দুয়োক্।” সেক্কে রূতে কা ভূইয়োত্‌ কাম গোজ্যে সিয়েন তা শুড়ীবোরে জানেল। তে কলঅ, “মুই যার ক্ষেদত্‌ কাম গোজ্যং তার নাঙান্‌ বোয়স।”

²⁰ এই কধাগান শুনিনে নয়মী তার পূদঅবোবোরে কলঅ, “লগেপ্রভু, যিবে জেদা বা মরা কারঅ উগুরে অবিশ্বেজী ন-অয় তে তারে বর্ দুয়োক্।” তে আরঅ কলঅ, “উই মানুচ্চো আমার সদর্‌ কুদুম্মো। যে কুদুম্মোগুনো উগুরে মঅ নেক্কোর বেক্কানি ছাড়ি নেযেবার আর রোক্ষ্যে গুরিবার কাম ভারান্ রোইয়্যে তে তারা ভিদিরে এক্কো।”

²¹ মোয়াবীয় রূতে কলঅ, “তে মরে আরঅ কোইয়্যেদে, তার বেক্‌ ফসলানি কাবানা থুম্ ন-অনা সং মুই যেনে তা মানুচ্চুনো সমারে থাং।”

²² সেক্কে নয়মী তা পূদঅবোবোরে কলঅ, “মা, অন্য কনঅ ক্ষেদত্‌ যেনে তরে কনজনে ভেজাল্‌ গুরি ন-পারন সেনত্তেই তার কামর্‌ মিলেগুনো লগে লগে থানা তর্‌ পক্ষে গম্‌।”

²³ সেনত্তেই যেদকদিন সং কেচ্‌বিজি আর গম কাবা শেজ্‌ ন-অলঅ সেদকদিন সং রূতে বোয়সর কামগুরিয়্যে মিলেগুনোর্ লগে লগে থেইনে শীজে কুড়োনার কাম গুরিলো। তে তা শুড়ীবো সমারে বজত্তি গুরিদো।