রূত 1 - Chakma Bibleনয়মী আর রূত 1 শাজন্গুরিয়্যেগুনোর শাজন আমলত ইস্রায়েলীয়গুনোর দেজত্ একপল্লা ভাদঅ রাত্ দেগা দিলো। সেক্কে যিহূদা দেজর বৈৎলেহম আদামর এক্কো মান্জ্যে তা মোক্কো আর দ্বিবে পূঅরে নেযেইনে কয়েকদিনোত্তে মোয়াব দেজত্ বজত্তি গুরিবাত্তে গেলঅ। 2 মানুচ্চোর্ নাঙান্ এলদে ইলীমেলক। তা মোক্কোর্ নাঙান্ নয়মী আর দ্বিবে পূঅর্ নাঙানি মহলোন আর কিলিয়োন। তারা অলাক্ যিহূদা দেজর্ বৈৎলেহমর ইফ্রাথীয় মানুচ্। তারা মোয়াব দেজত্ যেইনে সিদু রোই গেলাক্। 3 পরেন্দি নয়মীর নেক্কো ইলীমেলকে মুরি গেলঅ, আর সেক্কে বাঁজি রলাক্ বানা নয়মী আর তার দ্বিবে পূঅ। 4-5 নয়মীর পূঅগুনে মোয়াব দেজর মিলেরে বৌ ললাক্। সে মিলেগুনোর এক্কোর্ নাঙান্ অলদে অর্পা আর এক্কোর্ নাঙান্ অলঅ রূত। মহলোন আর কিলিয়োনে মোয়াব দেজত্ দশ বজর বজত্তি গরানার পরেন্দি মুরি গেলাক্। দ্বিবে পূঅ আর নেক্কোরে আরেইনে নয়মী গায় গায় রলঅ। 6 মোয়াব দেজত্ থাগদে নয়মী শুনিলোদে, লগেপ্রভু তা মানুচ্চুনোরে হানার যুক্কোল্ গুরিনে তারা ইন্দি মনান্ দিয়্যে। সেনত্তেই তে তার দ্বিবে পূদবোরে নেযেইনে মোয়াব দেজত্তুন ঘরত্ ফিরি যেবাত্তে যুক্কোল্ অলঅ। 7 তারা যিয়েনত্ থেদাক্ সিয়োত্তুন্ দ্বিবে পূদবোরে নেযেইনে তে নিগিলিলো আর যিহূদা দেজত্ ফিরি যাইদে পথ্তান ধুরিনে লট্ দিলো। 8 পরেন্দি নয়মী তার দ্বিবে পূদবোরে কলঅ, “তুমি যার্ যার্ মাগুনোর ঘরত্ ফিরি যঅ। তুমি যেধোক্ক্যেন্ তমা মোজ্যেদে নেক্কুনো উগুরে আর মঅ উগুরে বিশ্বেজী এলা সেধোক্ক্যেন্ লগেপ্রভুয়ো যেনে তমা উগুরে বিশ্বেজী থায়। 9 লগেপ্রভু তমারে বর্ দুয়োক্ যেনে তুমি দ্বিজনে আর গমেডালে গিরিত্তি গুরি পারঅ।” এ কধাগান কোইনে তে তারারে চুমিলো আর তারা গুজুরি গুজুরি কানা ধুরিলাক্। 10 তারা কলাক্, “না, আমি তঅ লগে তঅ মানুচ্চুনোর ইদু ফিরি যেবং।” 11 নয়মী কলঅ, “না, মা, তুমি ঘরত্ ফিরি যঅ। তুমি কিত্তেই মঅ লগে যেবা? মঅ পেদত্ কি আর পূঅ অবার্ আজা আঘে যিগুনে তমার্ নেক্ ওই পারিবাক্? 12 মা, তুমি ঘরত্ ফিরি যঅ। নেক্ লবার্ বয়স আর মত্তুন নেই। ধোজ্য, পূঅ অবার্ আজা আঘে মনে গুরিনে যুনি এচ্চ্যে রেদোত্ মুই মঅ নেক্কো ইদু যাং আর মর্ পূঅয়ো অয়, 13 সালে তারা দাঙর্ অয় সং কি তুমি বাজ্জেই থেবা? তারাত্তে কি তুমি নেক্ ন-লোনেই থেবা? না, মা, না। তমাত্তুন বেশ্ মঅ জীংকানিগান আরঅ বোউত্ তিদে, কিত্যে লগেপ্রভু মঅ বিরুদ্ধে থিয়েইয়্যে।” 14 এ কধাগান শুনিনে তারা আরঅ গুজুরি গুজুরি কানা ধুরিলাক্। সে পরেন্দি অর্পা তা শুড়ীবোরে চুমিনে বিদেই নিলো মাত্তর্ রূতে তারে ফেলেই ন-গেলঅ। 15 সেক্কে নয়মী কলঅ, “চাহ্, তঅ জাল্লো তা নিজো মানুচ্চুনো ইদু আর তা দেবেদাগুনো ইদু ফিরি যার্। তুইয়ো তা লগে যাহ্।” 16 মাত্তর্ রূতে কলঅ, “তরে ফেলেই যেবাত্তে তুই মরে জোর্ ন-গুরিচ্, বা তঅ সমারে যেবাত্তে মরে মানা ন-গুরিচ্। তুই যিদু যেবে মুইয়ো সিদু যেম্ আর তুই যিয়েনত্ থেবে মুইয়ো সিয়েনত্ থেম্। তঅ মানুচ্চুন্ অবাক্ মঅ মানুচ্ আর তঅ গোজেনে অবঅ মর্ গোজেন্। 17 তুই যিয়েনত্ মুরিবে মুইয়ো সিয়েনত্ মুরিম্ আর সিয়েনত্ যেনে মর্ গোর্ অয়। এক মরণ বাদে আর অন্য কিজুয়ে যুনি আমারে ফারক্ গরে সালে লগেপ্রভু যেনে মরে সাজা দে আর সিয়েন জদবদে দে।” 18 নয়মী যেক্কে বুঝি পারিলো, রুতে তা সমারে যেবাত্তে মনান্ ঠিগ্ গোজ্যে সেক্কে তে তারে আর কিচ্ছু ন-কলঅ। 19 ইয়েনর্ পরেন্দি সে দ্বিজনে আঢা মারিলাক্ আর শেজন্দি বৈৎলেহমত্ যেইনে লুমিলাক্। তারা বৈৎলেহমত্ লুমোনার পরেন্দি বেক্ আদামানিত্ এক্কান্ উরুসতুল্ পড়ি গেলঅ। আদামর্ মিলেগুনে কলাক্, “ইবে কি সেই নয়মী?” 20 নয়মী কলঅ, মরে নয়মী (যিয়েনর্ ভেদ্তান্ আজি-হুজি) বিলি আর ন-ডাক্কো, বরং মারা (যিয়েনর্ ভেদ্তান্ “তিদে”) নাঙে ডাগঅ, কিত্তেই দিন দুনিয়ের্ গিরোজ্ গোজেনে মর্ জীংকানিগানরে তিদে গুরি দিয়্যে। 21 মুই ভরন্পুরোন্ আত্তোই যেইয়োং মাত্তর্ লগেপ্রভু মরে সুদো আত্তোই ফিরেই আনিলো। লগেপ্রভু যেক্কে মঅ বিরুদ্ধে সাক্ষী দের্ আর দিন দুনিয়ের্ গিরোজ্ গোজেনে যেক্কে মরে দুগোত্ ফেলেয়্যে সেক্কে তুমি মরে কিত্তে আর নয়মী বিলি ডাগর্? 22 ইঙিরিনে নয়মী তার পূদবৌ মোয়াবীয় রূতরে সমারে নেযেইনে মোয়াব দেজত্তুন ফিরি এলঅ। ধান কাবিবার অক্তবো আরাম্ভ অদে অদে তারা বৈৎলেহমত এইনে লুমিলাক্। |
Copyright © 2021 Bangladesh Bible Society
Bangladesh Bible Society