রোমীয় 9 - Chakma Bible

গোজেনর বেঈ লোইয়্যে মানুচ্চুন

^1-2 খ্রীষ্ট সমারে মিজেইনে মুই কঙত্তে, মনত্ দুঘে বুগ্ ভাঙের্ আর চিদোত্ পুদের্, আর এ কধাগান সত্য, মিজে নয়। মঅ বিবেগ্‌কান্অ পবিত্র আত্মা সমারে মিজেইনে সেই একই সাক্ষ্য দের্।

³ মঅ ভেইয়ুনো বদলে, অত্তাৎ যিগুনে মঅ জাদর্ মানুচ্‌ তারার্ বদলে যুনি সম্ভব অদঅ সালে মুই নিজেই খ্রীষ্ট কায়-কুরেত্তুন দূর্ ওই যেবার্ অভিশাব্ মানি লোদুং।

⁴ তারা দঅ ইস্রায়েল জাদর্ মানুচ্‌। গোজেনে তারারে পুয়ো ইজেবে অধিকার্ দিয়্যে, নিজোর্ মহিমা দেগেয়্যে, তারাত্যে বেবস্থা থিদেবর্ গোজ্জ্যে, রীদি-সুদোম দিয়্যে, তারে সেবা আর উবোসনার্ পধ্ গুরি দিয়্যে আহ্ বোউত্ এগেম্‌অ গোজ্জ্যে।

⁵ গোজেনর্ দাঙর্ ভক্তগুনে তারার্ পুরোণি মানুচ্ এলাক্ আর মানুচ্ ইজেবে মশীহ তারা গুট্টিত্ জোর্মেয়্যে। তেয়ই গোজেন, যিবে বেক্কুনো উগুরে; বেক্ বাঈনীগান্ তার্। আমেন।

⁶ গোজেন কধানি যে মিজে ওই যেইয়্যে সিয়েন নয়, কিয়া যিগুনে ইস্রায়েল জাদ ইধু জোর্মেয়োন তারা বেক্কুনে ঘেচ্চেকগুরি ইস্রায়েল নয়।

⁷ অব্রাহাম গুট্টির্ বিলিনে যে তারা তার্ আজল্ পুয়ো সিয়েন নয়, বরং পবিত্র বোইবোর্ কধা মজিম্, “ইস্‌হাকর্ গুট্টিবোরে তর্ গুট্টি বিলিনে ধরা অবঅ।”

⁸ ইয়েনর্ অত্তগান্ অলঅ, ইস্রায়েল জাদঅ ভিদিরে জর্ম ওইয়্যে বিলি কেঅ যে গোজেনর্ পুয়ো সিয়েন্ নয়, মাত্তর্ গোজেনর্ এগেম্ মজিম যিগুনোর্ জর্ম ওইয়্যে তারারে অব্রাহাম গুট্টির্ বিলিনে ধরা অবঅ।

⁹ সেই এগেমান্ ইয়েন-“ঠিগ্ সময়োত্ মুই ফিরি এম্ আর সারার্ এক্কো পুয়ো অবঅ।”

¹⁰ বানা সিয়েন্ নয়, রিবিকার্ জামা পুয়োগুন একই মরদর্ পুয়ো এলাক্।

^11-12 সেই মরদ্‌তো আমার পূরোণি মানুচ্ ইস্‌হাকে এলঅ। সেই পুয়ো দ্বিবের্ জর্মর্ আগেদি যেক্কে তারা গম্ বা ভান্ন্যেই কিচ্চু ন-গরন্ গোজেনে সেক্কে রিবিকারে কোইয়্যে, “দাঙর্‌বো চিগোন্নোর্ চাগর্ অবঅ।” ইয়েন্দোই গোজেনে দেগেয়্যেদে যে, নিজো উদ্দেশ্যগান্ পূরোণ গুরিবাত্তে তেয়ই বেঈ লয়; কনঅ কামর্ ফলে তে সিয়েন ন-গরে বরং তা আওজ্ মজিম তে মান্‌জ্যরে ডাগে।

¹³ আর সেনত্তে পবিত্র বোইবোত্ লেগা আঘে, “যাকোবরে মুই কোচ্‌পেইয়োং, মাত্তর্ এষৌরে এলাফেলা গোজ্জ্যং।”

¹⁴ সালে আমি কি কবং গোজেনে অন্যেয় গরে? কনবাবদে নয়। তে মোশিরে কোইয়্যেদে,

¹⁵ “মর্ যিবেরে আওজ্ তারে দোয়্যে গুরিম, যিবেরে আওজ্ তারে মেয়্যে গুরিম।”

¹⁶ সালে ইয়েন্ কারঅ চেট্ট্যা বা আয়োজ উগুরে নির্ভর ন-গরে, গোজেনর্ দোয়্যে উগুরে নির্ভর গরে।

¹⁷ পবিত্র বোইবোত্ গোজেনে ফরৌণরে এ কধাগান্ কোইয়্যে, “মুই তরে রাজা বানেয়োং যেন তঅ উগুরে মর্ বেবহারর্ মাধ্যমে মঅ খেমতাগান্ দেগেই পারং আর গোদা পিত্‌থিমীয়ানত্ মঅ নাঙান্ ফগদাং অয়।”

¹⁸ সালে দেগা যাত্তে, গোজেনে নিজোর্ আওজ্ মজিম কাররে দোয়্যে গরে আর কারর্ মনানি দরমর গরে।

গোজেনর্ দোয়্যে

¹⁹ অয়ত তমাত্তুন্ কেঅ মরে পুযোর্ গুরিবাক্, “সালে গোজেনে কিত্ত্যে মান্‌জ্যর দুষ্ ধরে? কনজনে কি গোজেনর্ উদ্দেশ্যগানরে মানা গুরি পারন্?”

²⁰ সিয়েনর্ জোবত্ মুই কোম্‌বে, তুই মানুচ্‌; গোজেনর্ কধানি উগুরে কধা কবার্ তুই কন্না? কনঅ মান্‌জ্যে যুনি এক্কান্ জিনিচ্‌ বানায় সালে সেই বানেইয়্যে জিনিচ্চানে কি তারে পুযোর্ গুরি পারে, “কিত্ত্যে মরে এবাবোত্যে বানেলে?”

²¹ একই মাদিত্তুন কি কুমোরর্ নানান্ বাবোত্যে কদরা বানেই ন-পারে-কোনবো সর্মানর্ কামত্যে, কোনবো নিযো কামত্যে?

²² ঠিগ্ সেবাবোত্যেগুরি গোজেনে তা রাগ্‌কান্ আহ্ খেমতাগান্ দেগেবাত্তে চেইয়্যে; তো যে মানুচ্চুনো উগুরে তা রাগ্‌কান্ ফগদাং গুরিবো, খুব ধৈজ্জ্য ধুরিনে তে তারারে সোজ্জ্য গুরিলো। এ মানুচ্চুনোর বানা এক্কান্ পাওনা এলদে ভস্ত অনা।

²³ আরঅ তে তার্ অশেষ্ মহিমার্ কধায়ো জানেবাত্তে চেইয়্যে। যিগুন তার্ দোয়্যের্ মানুচ্ তারারে তে তার্ মহিমা পেবাত্তে আগেবাগে যুক্কোল্ গুরি রাগেয়্যে।

²⁴ আমি অলঙে সেই দোয়্যের্ মানুচ্চুন্। তে আমারে বানা যিহূদীগুনোত্তুন্ ন-ডাগে, অযিহূদীগুনো ভিদিরেত্তুন্-অ ডাক্ক্যে।

²⁵ ভাববাদী হোশেয় বোইয়োত্ গোজেনে কোইয়্যেদে, “যিগুন্ মঅ মানুচ্ নয় তারারে মুই মর্ মানুচ্ বিলিনে ডাগিম, আর যিবেরে মুই কোচ্ ন পাং তারে মুই মর্ পরাণী বিলি ডাগিম।

²⁶ যে জাগানত্ তারারে কুয়ো ওইয়্যে, ‘তুমি মর্ মানুচ্ নয়,’ সিয়েনত্ তারারে জেদা গোজেনর্ পুয়ো বিলিনে ডাগা অবঅ।”

²⁷ ভাববাদী যিশাইয় ইস্রায়েল জাদ পৌইদ্যেনে কোইয়্যে, “ইস্রায়েলীয়গুন্ যুনিয়ো জনেদি সাগর-পার কোরোলি ধোক্ক্যেন্ তো বানা সিগুনোর্ বিশেষ এক্কো ভাগে উদ্ধোর্ পেবাক্।

²⁸ প্রভু যাদিমাদি পিত্‌থিমীগানরে তার্ পাওনা সাজা পুরোপুরি গুরিই দিবো।”

²⁹ যিশাইয় আরঅ কোইয়্যেদে, “বেগত্তুন্ খেমতাবলা প্রভু যুনি কিজু বংশধর আমাত্যে থোই ন-যেদঅ সালে আমা অবস্থা সদোম আর ঘমোরা শঅর ধোক্ক্যেন্ অদঅ।”

ইস্রায়েল জাদ্ আর গম্ হবর্

³⁰ সালে আমি এ কধাগান্ কবংগে, অযিহূদীগুনে যুনিয়ো গোজেনর্ যগাজ্যে অবার্ চেট্ট্যায়ো ন-গরন্ তো তারার্ বিশ্বেজর্ মাধ্যমে তারা গোজেনর্ যগাজ্যে ওইয়োন্।

³¹ মাত্তর্ ইস্রায়েলীয়গুনে রীদি-সুদোম পালানার্ মাধ্যমে গোজেনর্ যগাজ্যে অবার্ চেট্ট্যা গোজ্জ্যন্, মাত্তর্ তারা সিয়েন ওই ন-পারন্।

³² কিত্ত্যেই ন-পারন্? কিয়া তারা বিশ্বেজ্ উগুরে নির্ভর ন-গুরিনে কাম উগুরে নির্ভর গোজ্জ্যন্। যে শিল্লোত্ মান্‌জ্যে উজোট্ খান্ এ সিবেত্ তারা উজোট্ খেইয়োন্।

³³ এ পৌইদ্যেনে পবিত্র বোইবোত্ লেগা আঘে, চঅ, মুই সিয়েনত্ এন্ এক্কো পাত্তর্ থোইয়োং যেনে মান্‌‌‌জ্যে উজোত্ খান্ আর যিবে মান্‌‌‌জ্যর্ উজোত্ হেবার্ অয়। মাত্তর্ যে সিবে উগুরে বিশ্বেজ্ গরে তে আজা ন-অারেব।