রোমীয় 8 - Chakma Bible

পবিত্র আত্মার্ দিয়্যে জিংকানি

¹ যিগুনে খ্রীষ্ট যীশু সমারে মিজেয়োন্ গোজেনে তারারে আর সাজা দেদে ধোক্ক্যেন্ মনে ন-গুরিবো।

² জিংকানির্ গিরোজ্‌সো পবিত্র আত্মার্ সুদোমান্দোই খ্রীষ্ট যীশুর্ মাধ্যমে মরে পাপ আর মরণর্ সুদোমত্তুন্ উদ্ধোর্ গোজ্জ্যে।

³ মান্‌জ্যর পাপ খাচ্চ্যদত্যে আইন-কানুনানি ভাঙি পোজ্জ্যে, আর সেনত্তে রীতি-সুদোমে যিয়েনি গুরি ন-পারে গোজেনে নিজে সিয়েনি গোজ্জ্যে। তে পাপ্‌পানি ধাবেবাত্যে নিজোর্ পাপ-নেইয়্যে পুয়োবোরে মান্‌জ্যর্ খাচ্চ্যত্ দিইনে পাধেই দিলো আর তা পুয়োবোর্ মরণর্ মাধ্যমে পাপর্ বিচের গুরিনে তা খেমতাগানরে বাদ দি দিলো।

⁴ তে সিয়েন গুরিলো যেন পাপ-খাচ্চ্যদ অধীনোত্ ন-চলিনে পবিত্র আত্মার্ অধীনোত্ চলিবাত্যে আমা ভিদিরে রীদি-সুদোমর্ দাবী-দাওয়া পূরোণ্ অয়।

⁵ যিগুনে পাপ-খাচ্চ্যদর্ তলে তারার্ মনানি পাপ-খাচ্চ্যদে যিয়েনি চায় সিয়েনি আয়োজি; আর যিগুনে পবিত্র আত্মার্ তলে তারার্ মনানি পবিত্র আত্মাগানে যিয়েনি চায় সিয়েনি আয়োজি।

⁶ পাপ-খাচ্চ্যদে যিয়েনি চায় সিয়েনি আয়োজি অনার্ ফল অলঅ মরণ্, আর পবিত্র আত্মা যিয়েনি চায় সিয়েনি আয়োজি অনার্ ফল অলঅ জিংকানি আর শান্তি।

⁷ যে মনানে পাপ-খচ্চ্যদে যিয়েন চায় সিয়েন্দোই আয়োজি, সেই মনান্ গোজেনর্ বিরুদ্ধে, কিয়া সিয়েন গোজেনর্ রীদি-সুদোম মানিবাত্তে ন-চায়, মানিয়ো ন-পারে।

⁸ সেনত্তে যিগুনে পাপ-খচ্চ্যদর্ তলে তারা গোজেনরে হুজি গুরি ন-পারন্।

⁹ মাত্তর্ গোজেনর্ আত্মাগানে যুনি তমা মনত্ বজত্তি গরে সালে তুমি দঅ পাপ-খাচ্চ্যদর্ তলে নয় বরং পবিত্র আত্মার তলে। যিবে মনত্ খ্রীষ্টর্ আত্মা নেই তে খ্রীষ্টর্ নয়।

¹⁰ মাত্তর্ খ্রীষ্ট যুনি তমা মনত্ থায় সালে পাপত্যে তমা কিয়্যেগানি উগুরে মরণানে কাম গুরি থেলেয়ো তমা আত্মাগানি জেদা, কারন গোজেনে তমারে নিদ্দুজি বিলি মানি লোইয়্যে।

¹¹ যে যীশুরে মরণত্তুন্ জেদা গোজ্জ্যে সেই গোজেনর্ আত্মাগান্ যুনি তমা মনত্ বজত্তি গরে, সালে গোজেনে তার্ সেই আত্মাগান্দোই তমা মরণর্ তলে কিয়্যেগানরেয়ো জিংকানি দান গুরিবো।

¹² সেনত্তে ভেইলগ্, আমি কজ্জ তলাত্, মাত্তর্ সেই কজ্জগুন্ পাপ-খাচ্চ্যদ ইধু নয়। পাপ-খাচ্চ্যদর্ অধীন্ ওইনে আর আমার চলিবার্ দরকার্ নেই।

¹³ যুনি তুমি পাপ-খাচ্চ্যদ্ মজিম চলঅ সালে তুমি উমরত্তে মুরিবা। মাত্তর্ যুনি পবিত্র আত্মালোই কিয়্যের্ বেক্‌ ভান্ন্যেই কামানি ভস্ত গুরি ফেলঅ সালে উমরত্তে জেদা থেবা,

¹⁴ কিয়া যিগুনে গোজেনর্ আত্মার্ পরিচালনায় চলন্ সিগুনে গোজেনর্ পুয়ো।

¹⁵ তুমি দঅ চাগর মনভাব ন-পঅ যিয়েনত্যে দোরেবা; তুমি গোজেনর্ আত্মাগানরে পেইয়ো যিবে তমারে পুয়ো ইজেবে অধিকার্ দিয়্যে। সেনত্তে আমি গোজেনরে বাবা, মানে বাব্, বিলিনে ডাগিই।

¹⁶ পবিত্র আত্মাগানেয়ো নিজে আমা মনত্ এই সাক্ষিগান দেত্তে যে, আমি গোজেনর্ পুয়ো।

¹⁷ যুনি আমি পুয়ো-ছা ওই থেই সালে গোজেনে তা পুয়ো-ছা গুনোরে যিয়েন দিবো বিলিনে এগেম্ গোজ্জ্যে আমি সিয়েন পেবং। খ্রীষ্ট গোজেনত্তুন্ সিয়েন পেবঅ আর আমিয়ো তা সমারে সিয়েন পেবং; কিয়া যুনি আমি খ্রীষ্ট সমারে দুঘ্ ভুগি পারিই সালে তা সমারে মানীগুণির্‌‌‌অ ভাগি অবং।

যে মহিমাগান্ আমি পেবং

¹⁸ মুই কোই পারং, আমি যে মহিমাগান্ যেরেদি পেবং সিয়েন তুলনায় আমা এ জিংকানিত্ দুঘ্ পানাগান্ কিচ্চু নয়।

¹⁹ গোজেনর্ পুয়োগুনে কক্কে সেই মহিমায় ফগদাং পেবাক্ সিয়েনত্তে বেক্ প্রাণিগুনে আওজ্ গুরিনে বাজ্জেই আঘন্,

²⁰ কিয়া সৃট্টির্ উদ্দেশ্যগান্ বিফল ওই যেইয়্যে। খালিক্, নিজোর্ আয়োজে সিয়েন ন-অয়; গোজেনে তারে বিফলতার্ আঢত্ ইরি দিয়্যে। মাত্তর্ তা সমারে সমারে এ আজাগান দিয়্যেদে যে,

²¹ ভস্ত অনার্ বান্যেগানত্তুন্ উদ্ধোর্ ওইনে এ সৃট্টিগানে এক দিন্ন্যে গোজেনর্ পুয়ো-ছা গুনোর্ বাঈনী গুরিবার্ স্বাধীনতার ভাগিদার্ ওই পারিবাক্।

²² আমি কোই পারিই, গোদা সৃট্টিগান্ যেন এক্কান জদবদে পো-ফুদোইদ্যে ধোক্ক্যেন সুলোনিয়ে ইক্কিনেও ওমা-হদা গরের্।

²³ বানা সিয়েন্ নয়, মাত্তর্ যে মহিমাগান্ আমি যেরেদি পেবং সিয়েন্ পত্তম ফল্ ইজেবে পবিত্র আত্মারে পেইনে আমি নিজেয়ো মনেদি কোঙের্। আর সেই সমারে সেই দিন্নোত্তে বাজ্জেই আঘি যেক্কে গোজেনর্ পুয়ো-ছা ইজেবে আমারে ফগদাং গরা অবঅ, অত্তাৎ ভস্তর্ আঢত্তুন্ আমা কিয়্যেগানিরে উদ্ধোর্ গরা অবঅ।

²⁴ পাপত্তুন্ উদ্ধোর্ পেইনে আমি এ আজাগান পেইয়্যেই। আমি যিয়েনত্যে আজা গুরিই আঘি যুনি সিয়েন্ পেই যেই-গোই সালে দঅ সেই আজাগান্ আর আজা ন-থেলঅ। যিয়েন্ পেইয়্যেই সিয়েনত্যে কন্না আজা গুরি থায়?

²⁵ মাত্তর্ যিয়েন পাহ্ ন-অয় সিয়েনত্যে যুনি আমার্ আজা থায় সালে সিয়েনত্যে আমি ধৈয্য ধুরিনে বাজ্জেই থেই।

²⁶ ইয়েন্ বাদে আমার বল্-নেইয়্যে অবস্থায় পবিত্র আত্মাগানে আমারে বল্ দে। কি কোইনে তবনা গরানা উচিত্ সিয়েন আমি হবর্ ন-পেই, মাত্তর্ যিয়েন ভাষাদি ফগদাং গুরি ন-পারে সেবাবোত্যে কোজোলী সমারে পবিত্র আত্মাগানে নিজেই আমার্ ওইনে কোজোলী গরে।

²⁷ যিবে মান্‌জ্যর্ মনানি তোগেই চায় তে পবিত্র আত্মার্ মনঅ কধায়ো কোই পারে, কিয়া পবিত্র আত্মাগানে গোজেনর্ আওজ্ মজিম গোজেন মানুচ্চুনোত্তে কোজোলী গরে।

²⁸ আমি হবর্ পেই যিগুনে গোজেনরে কোচ্‌পান, অত্তাৎ গোজেনে নিজোর্ আওজ্ মজিম যিগুনোরে ডাক্ক্যে তারার্ ভালেদিত্তে বেক্কানি এক সমারে কাম্ গুরি যার্।

²⁹ গোজেনে যিগুনোরে আগেদি বেঈ লোইয়্যে তারারে তে তার্ পুয়ো ধোক্ক্যেন্ অবাত্তে আগেদি ঠিগ্ গুরিয়ো থোইয়্যে, যেন সেই পুয়োবো ভালোক্ ভেইয়োত্তুন্ আজল্লো অয়।

³⁰ যিগুনোরে তে আগেত্তুন্ ধুরি ঠিগ্ গুরি রাগেয়্যে তারারে তে ডাগিলো; যিগুনোরে ডাগিলো তারারে তে নিদ্দুজি বিলি মানিয়ো ললঅ; যিগুনোরে নিদ্দুজি বিলি মানি ললঅ তারারে তে নিজোর্ মহিমায়ো দান গুরিলো।

গোজেনর্ কোচ্‌পানা

³¹ সালে এ বেপারানি আমি কি কবং? গোজেনে যেক্কে আমা পক্ষে আঘে সেক্কে আমারে ক্ষতি গুরিবার কন্না আঘে?

³² গোজেনে নিজোর্ পুয়োবোরেয়ো রেহাই ন-দিলো বরং আমা বেক্কুনোত্ত্যে তারে মরণর্ আঢত্ তুলি দিলো। সালে তে কি পুয়োবো সমারে আর বেক্কানিয়ো আমারে দান ন-গুরিবো?

³³ গোজেনে যিগুনোরে বেঈ লোইয়্যে কন্না তারা বিরুদ্ধে নালিচ্‌ গুরিবো? গোজেনে নিজেই দঅ তারারে নিদ্দুজি বিলিনে মানি লোইয়্যে।

³⁴ কন্না তারারে দুষি বিলিনে ঠিগ্ গুরিবো? যিবে মুরি যেয়্যে আর যিবেরে মরণত্তুন্ জেদা গরায়ো ওইয়্যে সেই খ্রীষ্ট যীশু ইক্কিনে গোজেনর্ ডেন্ ঢাগদি আঘে আর আমাত্যে কোজোলী গরের্।

³⁵ সেনত্তে এমন্‌ কি আঘে যিয়েনে খ্রীষ্টর্ কোচ্‌পানাত্তুন্ আমারে দূরোত্ সোরেই দিবো? যন্ত্রণা? মনত্ দুঘ্? অত্যেচার্? পেত্‌ পুরোনা? কাবড়-চুগোড়োর্ অভাব? দযা? মরণ?

³⁶ পবিত্র বোইবোত্ লেগা আঘে, তত্যে নিত্য আমাত্তুন্ কাররে নলে কাররে মারে ফেলা অর্; জবাই গোজ্জ্যে ভেড়া ধোক্ক্যেন্ মান্‌জ্যে আমারে মনে গরন্।

³⁷ মাত্তর্ যিবে তমারে কোচ্‌পায়, তা মাধ্যমে ইয়েনির্ ভিদিরেদিয়ো আমি পুরোপুরি জিত্তেই।

³⁸ মুই এ কধাগান্ গমেদালে কোই পারং, মরণ্ বা জিংকানি, স্বর্গদূত্ বা শদানর্ দূত, ইক্কিনে বা ভবিচ্চদর্ কনঅ কিজু বা অন্য কনঅ বাবোত্যে খেমতা,

³⁹ বা আগাজ উগুরে বা পিত্‌থিমী তলেদি কনঅ কিজু, এন্‌ কি, গোদা সৃট্টিগুনো ভিদিরে কনঅ পৌইদ্যেনে গোজেনর্ কোচ্‌পানাত্তুন্ আমারে দূরোত্ সোরেই দি ন-পারিবো। গোজেনর্ এই কোচ্‌পানা আমা প্রভু যীশু খ্রীষ্ট ভিদিরে আঘে।