রোমীয় 7 - Chakma Bible

মেলা গরানাত্তুন্ শিক্ষ্যে

¹ ভেইলগ্, তুমি দঅ রীদি-সুদোম জান। তুমি কি কোই ন-পারঅ যে, যেদক্ বিলোন মানুচ্‌ জেদা থান্ সেদক্ বিলোন্ রীদি-সুদোমর্ দাবি তা উগুরে থায়?

² যেদক্ দিন নেক্কো বাঁজি থায় সেদক্ দিন সং মোক্কো রীদি-সুদোমদোই তা সমারে বান্যে থায়। মাত্তর্ নেক্কো মরানার্ পরেদি সেই আইনোর্ বান্যেগানত্তুন্ মোক্কো উদ্ধোর্ অয়।

³ সেনত্তে নেক্কো বাঁজি থাগদে সেই মোক্কো যুনি অন্য কাররে লয় সালে তারে বেগেয়্যেবানী কুয়ো অয়। মাত্তর্ যুনি তা নেক্কো মুরি যায় সালে তে সেই আইনোর্ বান্যেগানত্তুন্ উদ্ধোর্ অয়। আর সেক্কে যুনি তে অন্য কাররে লয় সালে তে বেগেয়্যে/সিনেলী ন-অয়।

⁴ ঠিগ্ সেবাবোত্যে মর্ ভেইয়ুন, যীশু খ্রীষ্টর্ মাধ্যমে মোশির্ রীদি-সুদোমর্ দাবি-দাওয়া ইধু তুমিয়ো মোজ্জ্য। সিয়েনর্ কারনে যিবেরে মরণত্তুন্ জেদা গরা ওইয়্যে তুমি সেই যীশু খ্রীষ্টর্ ওইয়ো, যেন গোজেনত্তে তমা জিংকানিয়ানি দোল্ ওই উদে।

⁵ আমি যেক্কে পাপ খাচ্চ্যদর্ অধীনোত্ এলং সেক্কে আইন-কানুনানি আমা ভিদিরে পাপর্ কামনা-বাসনা জাগেই তুলিদো আর সেই কামনা-বাসনাগান্ আমা কিয়্যেগান ভিদিরে কাম্ গত্ত; সেনত্তে আমা জিংকানিগানি মরণত্যে ফলবান অদঅ।

⁶ সেক্কে আমারে যিয়েনিয়ে বানি রাগেদ সিয়েনির দাবি-দাওয়া ইধু আমি মোজ্জ্যেই। সেনত্তে আইন-কানুনোত্তুন্ ইক্কিনে আমি মুক্ত। সিয়েনর্ কারনে আমি ইক্কিনে লেগা রীদি-সুদোমর্ সেই পুরোণি জিংকানি-পধর্ চাগর্ নয়, মাত্তর্ পবিত্র আত্মার্ দিয়্যে নুয়ো জিংকানি-পধর্ চাগর্ ওইয়্যেই।

রীদি-সুদোম আর পাপ

⁷ সালে কি আমি কবং যে, রীদি-সুদোম বজং? খামাক্কায় নয়; বরং এ কধাগান্ ঠিগ্ যে, রীদি-সুদোম ন-থেলে পাপ্‌পান্ কি সিয়েন মুই হবর্ ন-পেদুং। “লুভ্ ন-গোজ্জ্য,” রীতি-সুদোমে যুনি এ কধাগান্ ন-কদঅ সালে লুভ্ কি সিয়েন্ মুই কোই ন-পাত্তুং।

⁸ মাত্তর্ পাপ্‌পানে সেই উগুমোর্ সুযোগে মইধু নানান্ বাবোত্যে লুভ্ জাগেয়্যে, কিয়া রীদি-সুদোম ন-থেলে পাপ্‌পান্ যেন মরা ধোক্ক্যেন্ পড়ি থায়।

⁹ মঅ জিংকানিত্ রীতি-সুদোম এবার্ আগেদি মুই বাঁজি এলুং, মাত্তর্ সেই উগুমান্ এজানার্ সমারে সমারে পাপ্ জিনিস্‌চান্অ জেই উদিলো,

¹⁰ আর মর্‌অ মরণ ঘুদিলো। যে উগুমানর্ কারনে জিংকানি পেবার্ কধা সিয়েনে মত্তেই মরণান্ এলঅ,

¹¹ কিয়া সেই উগুমানর্ সুযোগে পাপ্‌পানে মরে থোগেল, আর সেই উগুমানর্ কারনে পাপ্‌পানে মরে মারে ফেলেল।

¹² মাত্তর্ এ কধাগান্ ঠিগ্ যে, আইন-কানুনানি পবিত্র আর তার্ উগুমানিয়ো পবিত্র, ঠিগ্ আর উপকারি।

¹³ সালে যিয়েন উপকারি সিয়েন্দোই কি মর্ মরণ অলঅ? কনদিন্‌অ নয়, বরং যিয়েন উপকারি সিয়েন্দোই পাপ্পানে মর্ মরণ্ ঘোদেল, যেন পাপ যে সত্যই পাপ সিয়েন বুঝো যায়। পাপ যে কত্তমান্ জঘন্য সিয়েন উগুম্বোই ধরা পড়ে।

মান্‌জ্যর্ দ্বি-বাবোত্যে খাচ্চ্যত্

¹⁴ আমি হবর্ পেই রীদি-সুদোম আত্মিক, মাত্তর্ মুই পাপ-খাচ্চ্যদর্ অধীন বিলি পাপর্ চাগর্ ওইয়োং।

¹⁵ মুই যে কি গরং সিয়েন মুই নিজেই ন-বুঝোং, কিয়া মুই যিয়েন গুরিবাত্তে চাং সিয়েন ন-গরং বরং যিয়েন ঘিনাং সিয়েনই গরং।

¹⁶ যিয়েন ন-চাং সিয়েনই যেক্কে মুই গরং সেক্কে মুই ইয়েনই স্বীগের্ গরং যে, রীদি-সুদোম গম্।

¹⁷ সালে দেগা যায়, মুই নিজেই ইয়েনি ন-গরঙর্, মাত্তর্ মইধু যে পাপ্‌পান্ বজত্তি গরে, তেয়ই মরে দিইনে সিয়েনি গরার্।

¹⁸ মুই হবর্ পাং মইধু, অত্তাৎ মঅ পাপ স্বভাব ভিদিরে গম্ বিলি কিচ্চু নেই। যিয়েন্ ঘেচ্চেকগুরি গম্ সিয়েন গুরিবার্ আওজ্ মর্ আঘে মাত্তর্ খেমতা নেই।

¹⁹ যেদক্কানি গম্ কাম্ মুই গুরিবাত্তে চাং সিয়েন ন-গরং, বরং সিয়েনর্ বদলে যিয়েন ন-চাং সেই বেক্ ভান্ন্যেই কামানি মুই গুরি থাং।

²⁰ যিয়েন গুরিবাত্তে ন-চাং সিয়েনই যেক্কে মুই গরং সেক্কে আজলে মুই নিজে সিয়েন ন-গরং, বরং মঅ ভিদিরে যে পাপ্‌পান্ বজত্তি গরে তেয়ই মরে দিইনে সিয়েন গরার্।

²¹ সালে মুই নিজো ভিদিরে এক্কান সুদোমরে কাম্ গত্তে দেগঙর্। সেই সুদোমান্ অলঅ এই-যিয়েনি গম্ সিয়েনি যেক্কে মুই গুরিবাত্তে চাং সেক্কে ভান্ন্যেয়ান নিত্য ম ইধু থায়।

²² মঅ মনানে গোজেনর্ রীতি-সুদোমে হুজি অয়;

²³ তো মুই দেগঙত্তে, এক্কান যুদো সুদোম মঅ কিয়্যে ভিদিরে কাম্ গরের্। যিয়েন গম্ মঅ মনানে সিয়েন গম্ বিলিনে মানি লয়, মাত্তর্ এই যুদো সুদোমান্ মঅ মন বিরুদ্ধে যুদ্ধো গরের্ আর মরে বন্দী গুরি রাগেয়্যে। মঅ ভিদিরে যে পাপ্পান্ আঘে এ সুদোমান্ তার্।

²⁴ কি পড়া-কবাল্ল্যে মানুচ্‌ মুই! মঅ ভিদিরে এই যে পাপ-খাচ্চ্যত্ যিয়েনে মরণ আনে, সিয়েন আঢত্তুন্ কন্না মরে রোক্ষ্যে গুরিবো?

²⁵ আমা প্রভু যীশু খ্রীষ্টর্ মাধ্যমে মুই গোজেনরে ভালেদি জানাং যে, তে মরে রোক্ষ্যে গোজ্জ্যে। সালে দেগা যায় যে, মন ইন্দিত্তুন্ মুই গোজেন রীদি-সুদোমর্ চাগর্, মাত্তর্ পাপ-খাচ্চ্যদর্ ইন্দিত্তুন্ মুই পাপ সুদোমর্ চাগর্।