রোমীয় 4 - Chakma Bible

অব্রাহামর্ জিংকানিত্তুন্ শিক্ষ্যে

¹ সালে আমা পূরোণি মানুচ্ অব্রাহাম পৌইদ্যেনে আমি কি কবং? এ পৌইদ্যেনে তে কি দেক্ক্যে?

² কামত্যে যুনি অব্রাহামরে নিদ্দুজি বিলি মানি নেযা অয় সালে দঅ তার্ দেমাগ্ গুরিবার কিজু আঘে। মাত্তর্ গোজেন মুজুঙোত্ তার্ দেমাগ্ গুরিবার কিচ্চু নেই।

³ পবিত্র বোইবোত্ লেগা আঘে, “অব্রাহামে গোজেনর্ কধা বিশ্বেজ্ গুরিলো আর সেনত্তে গোজেনে তারে নিদ্দুজি বিলি মানি ললঅ।”

⁴ কাম্ গুরিনে যে বেতনুন্ পাহ্ যায় সিগুন্ দান নয়, পাওনা।

⁵ মাত্তর্ যে নিজো চেট্ট্যা উগুরে নির্ভর ন-গুরিনে বানা গোজেন উগুরে বিশ্বেজ্ গরে গোজেনে তার্ সেই বিশ্বেজত্তে তারে নিদ্দুজি বিলি মানিবো, কিত্যে তেয়ই পাপীগুনোরে নিদ্দুজি বিলি মানি লোই পারে।

⁶ দায়ূদেয়ো সেই মানুচ্চোরে বর্ পেইয়্যে কোইয়্যে যিবেরে গোজেনে কনঅ কাম্ নেইয়্যেগুরি নিদ্দুজি বিলি ধোজ্জ্যে। দায়ূদে কোইয়্যেদে,

⁷ বর্ পেইয়্যে সেই মানুচ্চুন, যিগুনোর্ গোজেন উগুরে উল্লোমী গরানাগান খেমা গরা ওইয়্যে, যিগুনোর্ পাপ ঢাগি দিয়্যে ওইয়্যে।

⁸ বর্ পেইয়্যে সেই মানুচ্চো, যিবের্ অন্যেয়ান লগেপ্রভু খেমা গোজ্জ্যে।

⁹ ইয়েনত্ কি বানা তারারে বর্ পেইয়্যে কুয়ো ওইয়্যে যিগুনোর্ চুনু মাঢাবো চামান কাবা ওইয়্যে? চুনু মাঢাবো চামান ন-কাপ্যে মানুচ্চুনোরেয়ো কি কুয়ো ন-অয়? অয়, তারারেয়ো বর্ পেইয়্যে কুয়ো ওইয়্যে, কিত্যে আমি কোত্তে, “অব্রাহামর্ বিশ্বেজর্ কারনে তারে নিদ্দুজি বিলি ধরা ওইয়্যে।”

¹⁰ কন্ অবস্থায় ধরা ওইয়্যে? চুনু মাঢাবো চামান কাবিবার্ আগেদি, না যেরেদি? চুনু মাঢাবো চামান কাবিবার্ আগেদি ধরা ওইয়্যে, যেরেদি নয়।

¹¹ চুনু মাঢাবো চামান ন-কাপ্যে অবস্থায় বিশ্বেজত্তে যে গোজেনে তারে নিদ্দুজি বিলি ধোজ্জ্যে তার চুনু মাঢাবো চামান কাবানা অলদে সিয়েনর্ প্রমাণ আর চিহ্নো। সালে দেগা যাত্তে, চুনু মাঢাবো চামান কাবা ন-অলেয়ো বানা বিশ্বেজত্তে যিগুনোরে নিদ্দুজি বিলি মানি লুয়ো ওইয়্যে, অব্রাহামে তারার্ বেক্কুনোর্ বাপ্।

¹² ইয়েন বাদে, চুনু মাঢাবো চামান কাবিবার্ আগেদি অব্রাহামে যেবাবোত্যেগুরি বিশ্বেজর্ পধেদি চুলিদো, যিদুক্কুন্ চুনু মাঢাবো চামান কাপ্যে মানুচ্ সেবাবোত্যেগুরি চলন্ অব্রাহামে তারার্‌অ বাপ।

গোজেনর্ এগেম্-পূরোণ অনা

¹³ অব্রাহাম আর তা গুট্টিগুনো ইধু গোজেনে এগেম্ গোজ্জ্যেদে, এ পিত্‌থিমীগান্ অব্রাহামর্ অবঅ। রীদি-সুদোম পালানার্ কারনে এ এগেমান্ তা ইধু গরা ন-অয়, মাত্তর্ তার বিশ্বেজর্ মাধ্যমে তারে নিদ্দুজি বিলি মানি লুয়ো ওইয়্যে আর সেনত্তে সেই এগেমান্ গরা ওইয়্যে।

¹⁴ রীদি-সুদোম পালেইনে যুনি কেঅ পিত্‌থিমীগানর্ অধিকার্ পেই যায় সালে দঅ বিশ্বেজ্‌চান অকেজো ওই পড়িবো আর গোজেনর্ সেই এগেমান্অ কনঅ মূল্য ন-থায়,

¹⁵ কারন রীদি-সুদোম গোজেনর্ সাজাগানরে ডাগি আনে। আর সত্যগান কধে কি, যিয়েনত্ রীদি-সুদোম নেই সিয়েনত্ রীদি-সুদোম অমান্য গুরিবার প্রশ্নয়ো নেই।

¹⁶ সেনত্তে মান্‌জ্যর্ বিশ্বেজর্ মাধ্যমে এই এগেমান্ পূরোন্ গরা অয়, যেন ইয়েন গোজেনর্ দোয়্যের্ দান ওই পারে। আর সেনত্তে অব্রাহামর্ গুট্টিগুনোর বেক্কুনোত্তে এ এগেমান্ খামাক্কায় পূরোণ অবঅ। রীদি-সুদোমর্ অধীনো মানুচ্চুনোত্যে যে বানা এ এগেমান্ পূরোন অবঅ, সিয়েন নয়; যিদুক্কুন্ মানুচ্ অব্রাহাম ধোক্ক্যেন্ একই বিশ্বেজে বিশ্বেজি তারাত্যেয়ো খামাক্কায় এ এগেমান্ পূরোন অবঅ।

¹⁷ পবিত্র বোইবোত্ যেবাবোত্যে লেগা আঘে, “মুই তরে ভালোক্ জাদর্ পূরোণিবাপ বানেয়োং,” সেই মজিম্ গোজেন চোগেদি অব্রাহামে আমার্ বেক্কুনোর্ বাপ্। যিবে মরা মান্‌জ্যরে জিংকানি দে আর যিয়েন নেই সিয়েন আঘে বিলিনে ফগদাং গরে সেই গোজেনরে অব্রাহামে বিশ্বেজ্ গোজ্জ্যে।

¹⁸ যেক্কে বাপ্ অবার্ কনঅ আজা ন-এলঅ সেক্কেয়ো অব্রাহামে গোজেন উগুরে আজা গুরিনে বিশ্বেজ্ গোজ্জ্যে। গোজেনে তারে কোইয়্যেদে, “তর্ গুট্টিগুনে আগাজ তারা ধোক্ক্যেন গুণি ন-পুরেইয়্যে অবাক্।” আর সেই কধামজিম অব্রাহামে ভালোক্ জাদর্ বাপ্ ওইয়্যে।

¹⁹ যুনিয়ো প্রায় একশত্ বজরর্ বুড়ো অব্রাহামে বুঝি পাজ্জ্যেদে যে, তা কিয়্যেগান্ অকেজো ওই যেইয়্যে আর সারার্‌অ পুয়ো-ছা অবার্ বয়জ্ আর নেই, তো অব্রাহামর্ বিশ্বেজ্‌চান মন্ মরা ন-এলঅ।

²⁰ গোজেনর্ এগেমান পৌইদ্যেনে তা মনত্ কনদিন্অ কনঅ সন্দেহ ন-এজে, বরং তে বিশ্বেজে আরঅ দরমর ওইনে গোজেনরে বাঈনি গুরিদো।

²¹ অব্রাহামে পুরোপুরি এ বিশ্বেজ্‌চান গুরিদো যে, গোজেনে যিয়েন এগেম্ গোজ্জ্যে সিয়েন গুরিবার্ খেমতায়ো তার্ আঘে।

²² ইয়েনত্যে অব্রাহামর্ বিশ্বেজর্ কারনে তারে নিদ্দুজি বিলি ধরা ওইয়্যে।

²³ “নিদ্দুজি বিলি ধরা ওইয়্যে,” এ কধাগান্ বানা অব্রাহামরে তাক্‌ গুরিনে লেগা ন-অয়,

²⁴ আমারেয়ো তাক্ গুরিনে লেগা ওইয়্যে। আমা বিশ্বেজত্তে গোজেনে আমারেয়ো নিদ্দুজি বিলি ধুরিবো, কারন যিবে আমা প্রভু যীশুরে মরণত্তুন্ জেদা গোজ্জ্যে আমি তা উগুরে বিশ্বেজ্ গুরিই।

²⁵ আমা পাপত্যে যীশুরে মরণ আদত্ তুলি দিয়্যে ওইয়্যে আর আমারে নিদ্দুজি বিলিনে মানি লবাত্যে তারে মরণত্তুন্ জেদা গরা ওইয়্যে।