রোমীয় 3 - Chakma Bible

¹ সিয়েনই যুনি অয় সালে যিহূদীগুনোর বিশেষ্ কি লাভ ওইয়্যে? চুনু মাঢাবো চামান কাবানার্ বা দামান্ কি?

² বেক্কানিদি যদেষ্ট লাভ্ ওইয়্যে। পৌইল্যাদি গোজেনে তা কধানি যিহূদীগুনোরে দিয়্যে।

³ খালিক্ তারাত্তুন্ কয়েক্কো মানুচ্‌ অবিশ্বেজি ওইয়োন্, মাত্তর্ সিয়েন্দোই কি অবঅ? তারা অবিশ্বেজি ওইয়োন্ বিলি কি গোজেনেয়ো অবিশ্বেজি অবঅ?

⁴ খামাক্কায় নয়। বেক্‌ মানুচ্চুন মিজে মাদিলেয়ো গোজেনে নিত্য সত্যবাদী। পবিত্র বোইবোত্ লেগা আঘে, “সেনত্তে তর্ রাইয়ান্ ঠিগ্, তঅ বিচেরান্ দোল্।”

⁵ মাত্তর্ আমা অন্যেয় কামানিত্তুন্ আরঅ গমেদালে বুঝো যায় যে, গোজেনে আমিযে ন্যায় কাম্ গরে। সালে আমি কি কবং যে, তে যেক্কে আমারে সাজা দে সেক্কে অন্যেয় গরে? খালিক্ কধাগান মুই মানুচ্ ইজেবে কঙর্, আজলে তে কনদিন্অ অন্যেয় ন-গরে।

⁶ গোজেনে যুনি অন্যেয় গরে সালে তে কেধোক্ক্যেন্ গুরি মান্‌‌জ্যর্ বিচের্ গরে?

⁷ কেঅ অলে কবাক্, “মর্ মিজে কধা কনার্ কারনে আরঅ গমেদালে ফগদাং অয় যে, গোজেনে সত্যবাদী। ইয়েন্দোই যেক্কে গোজেনে বাঈনী পেবঅ সেক্কে কিত্ত্যে পাপী বিলিনে মরে দুষী গরা অয়?”

⁸ গম্ ওইয়্যে, সালে কি আমি এ কধাগান্ কবং, “যেই, আমি ভান্ন্যেই কাম্ গুরিই যাতে সেই ভান্ন্যেয়র্ মাধ্যমে গম্ জিনিস্‌‌‌‌চান এই পারে”? কনঅ কনঅ মান্‌জ্যে আমারে বদ্‌‌নাঙ্ গুরিনে কন্, আমি এ বাবোত্যে কধা কোই থেই। তারার্ পাওনা সাজা তারা পেবাক্।

কেঅ নিদ্দুজি নয়

⁹ ইক্কিনে আমি কি কবং? যিহূদী ইজেবে আমা অবস্থা কি অযিহূদীগুনোত্তুন্ বেশ্ গম্? কন বাবদে নয়। আমি দঅ আগে কোইয়্যেই, যিহূদী-অযিহূদী বেক্কুনে পাপে ভরা

¹⁰ পবিত্র বোইবোত্ লেগা আঘে: নিদ্দুজি কেঅ নেই, একজন-অ নেই;

¹¹ কেঅ সত্য জ্ঞান্দোই ন-চলে, কেঅ গোজেনর্ আওজ্ মজিম কাম্ ন-গরে।

¹² বেক্কুনে ঠিগ্ পদত্তুন্ সুরি যেয়োন, বেক্কুনে একসমারে বজং ওই যেয়োন্। গম্ কাম্ গরন্ এবাবোত্যে কেঅ নেই, একজন-অ নেই।

¹³ তারার্ মুয়োনি যেন খুলো কবর ধোক্ক্যেন, জিলান্দোই তারা ছলনার্ কধা কন্। তারার্ ঠুদ্‌‌তুনো তলে যেন সাপর্ বিষ আঘে।

¹⁴ তারার্ মুয়োনি অভিশাব আর তিদে কধালোই ভরা।

¹⁵ খুন্ গুরিবাত্যে তারার্ টেঙানি যাদিমাদি ধাবা দে,

¹⁶ তারার্ পদথ্ ভস্ত অনাগান্ আর দযাগান থায়।

¹⁷ শান্তির্ পধ্ তারা কোই ন-পারন্,

¹⁸ তারা গোজেনরেয়ো ন-দরান্।

¹⁹ আমি কোই পারিই মোশির্ রীদি-সুদোম তারাত্যে যিগুনে সেই রীদি-সুদোমর্ অধীন। সেনত্তে যিহূদী- অযিহূদী কারর্ কিচ্চু কবার্ নেই, বেক্ মানুচ্চুন্ গোজেন ইধু দুষি ওই আঘন্।

²⁰ রীদি-সুদোম পালন গুরিলে যে গোজেনে মান্‌জ্যরে নিদ্দুজি বিলিনে মানি লবঅ সিয়েন নয়, মাত্তর্ রীদি-সুদোমর্ মাধ্যমে মানুচ্‌ নিজো পাপ পৌইদ্যেনে চেতনা পায়।

মান্‌জ্যরে নিদ্দুজি বিলিনে মানি লনা

²¹ গোজেনে মান্‌জ্যরে ইক্কিনে রীদি-সুদোম বাদে কেধোক্ক্যেন্ গুরি নিদ্দুজি বিলি মানি লোইয়্যে সিয়েন ফগদাং ওইয়্যে। মোশির রীদি-সুদোম আর ভাববাদীগুনে সে পৌইদ্যেনে সাক্ষ্য দি যেইয়োন।

²² যিগুনে যীশু খ্রীষ্ট উগুরে বিশ্বেজ্ গরন্ তারার্ সেই বিশ্বেজর্ মাধ্যমে গোজেনে তারারে নিদ্দুজি বিলি মানি লবঅ। যিহূদী আর অযিহূদী বেক্কুনে সং সং,

²³ কিত্যেই বেক্কুনে পাপ গোজ্জ্যন্ আর গোজেনর্ বাঈনী পেবার্ অযোগ্য ওইয়োন্।

²⁴ মাত্তর্ খ্রীষ্ট যীশু মান্‌জ্যরে পাপ আঢত্তুন্ উদ্ধোর্ গুরিবার্ বেবস্থা গোজ্জ্যে আর সেই উদ্ধোরর্ মাধ্যমে দোয়্যের্ দান ইজেবে বিশ্বেজিগুনোরে নিদ্দুজি বিলি মানি লুয়ো অয়।

²⁵ গোজেনে ফগদাং গোজ্জ্যেদে যে, যিগুনে বিশ্বেজ্ গরন্ তারাত্ত্যে যীশু খ্রীষ্ট তা লো-গান্দোই, অত্তাৎ তা জিংকানিগান্-উৎসর্বলোই তারে হুজি গোজ্জ্যে। এবাবোত্যেগুরি গোজেনে দেগেয়্যেদে, যুনিয়ো তে তার্ সোজ্য গুণোত্তে মান্‌জ্যর্ আগ পাপর্ সাজা ন-দে তো তে নিদ্দুজি।

²⁶ তে যে নিদ্দুজি সিয়েন তে ইক্কিনে দেগেয়্যেদে যেন প্রমাণ অয় যে, তে নিজে নিদ্দুজি আর যে কেঅ যীশু উগুরে বিশ্বেজ্ গরে তারেয়ো তে নিদ্দুজি বিলি মানি লবঅ।

²⁷ ইয়েনর্ পরেদি মান্‌জ্যর দেমাগ্ গুরিবার আর কি আঘে? কিচ্চু নেই। মাত্তর্ কিত্ত্যে নেই? মান্‌জ্যে রীদি-সুদোম পালন গরন্ বিলিনে কি তার্ দেমাগ্ গুরিবার কিচ্চু নেই? সিয়েন নয়। আজল্ কধাগান অলঅ, বিশ্বেজ্ ভিদিরে দেমাগর্ জাগা নেই,

²⁸ কিত্যে আমি কোই পারিই, গোজেনে মান্‌জ্যরে তার্ বিশ্বেজর্ কারনে নিদ্দুজি বিলি মানি লোইয়্যে, রীদি-সুদোম পালন গুরিবাত্তে নয়।

²⁹ গোজেনে কি সালে বানা যিহূদীগুনোর্, অযিহূদীগুনোর নয়? অয়, ঘেচ্চেকগুরি তে অযিহূদীগুনোর্‌অ গোজেন,

³⁰ কিত্যে গোজেনে দঅ বানা একজন। তে যিহূদীগুনোরে যেবাবোত্যেগুরি বিশ্বেজর্ মাধ্যমে নিদ্দুজি বিলি মানি লবঅ সেবাবোত্যেগুরি অযিহূদীগুনোরেয়ো মানি লবঅ।

³¹ এ বিশ্বেজ্‌চানত্তে কি আমি সালে রীদি-সুদোম বাদ্ দি দির্? কনদিন্অ নয়, বরং রীদি-সুদোম কধা যে সত্য সিয়েনই আমি প্রমাণ গুরির্।