রোমীয় 2 - Chakma Bible

গোজেনর্ ন্যায় বিচের্

¹ কেঅ যুনি ইয়েন্দোই অন্যগুনোরে দুষ্ দুয়োন সালে মুই তারে কোম্, তর্ নিজো অজুহাত্তান্ কুধু? তুই যেক্কে অন্যগুনোরে দুষ্ দুয়োচ্ সেক্কে কি তুই নিজোরে দুষি বিলিনে প্রমাণ্ ন-গরচ্? তুই অন্যগুনোরে দুষ্ দুয়োচ্ অদচ তুই সেই একই কাম্ গুরি থাচ্।

² আমি কোই পারিই যিগুনে এবাবোত্যে কাম্ গরন্ গোজেনে তারারে উজিত্ বিচের্ গরে।

³ তুই যে কামানত্যে অন্যগুনোরে দুষ্ দুয়োর্ সেই এক্কুই কাম্ যেক্কে তুই নিজেয়ো গরচ্ সেক্কে কি গোজেন আঢত্তুন্ বাঁজিবে বিলি মনে গরচ্?

⁴ তুই দঅ গোজেনর্ দোয়্যে, সোজ্যগুন্ আর ধৈজ্জ্যগানিরে ঈচ্ গোজ্জ্যস্। তুই পুরি ফেল্ল্যচ্ গোজেনর্ এ দোয়্যের্ উদ্দেচ্চ্য অলঅ তরে পাপত্তুন্ মন ফিরেবার পদথ্ আনানা।

⁵ মাত্তর্ তঅ মনান্ দরঅ; তুই দঅ পাপত্তুন্ মনান্ ফিরেবার ন-চাজ্। সেনত্তে যেদিন্ন্যে গোজেনর্ রাগ্‌কান্ ফগদাং পেবঅ সেই দিন্নোত্তে তুই তর্ পাওনা সাজা থুবেই থর্। সেই সময়োত্ গোজেনর্ ন্যায়বিচের্ ফগদাং পেবঅ।

⁶ তে পত্তিজনরে তারার্ কাম্ ইজেবে ফল দিবো।

⁷ যিগুনে ধৈজ্জ্য ধুরিনে গম্ কাম্ গরন্ গোজেনত্তুন্ বাঈনী, সর্মান আর ভস্ত ন-ওইয়্যে জিংকানি পেবাত্তে চান, গোজেনে তারারে উমর জিংকানি দিবো।

⁸ মাত্তর্ যিগুনে নিজো আওজ্ মজিম চলন্ আর সত্যগানরে ন-মানিনে অন্যেয়ানরে মানি চলন্ গোজেনে তারারে জদবদে সাজা দিবো।

⁹ যিগুনে পাপ গুরিনে বেড়ান্ তারার্ পত্তিজনর্ দুঘ্-দুদ্দশা অবঅ-পত্তমে যিহূদীগুনোর্, সে পরেদি অযিহূদীগুনোর।

¹⁰ মাত্তর্ যিগুনে গম্ কাম্ গরন্ সিগুনে বাঈনী, সর্মান আর সুগ্-শান্তি পেবাক্-পত্তমে যিহূদীগুনে, সে পরেদি অযিহূদীগুনে।

¹¹ ইয়েনত্ দেগা যায়, গোজেনর্ চোগেদি বেক্কুনে সং সং।

¹² মোশির রীদি-সুদোমর্ বারেদি থেইনে যিগুনে পাপ্ গরন্ তারা রীদি-সুদোম বাদে ভস্ত অবাক্। মাত্তর্ যিগুনে রীদি-সুদোম ভিদিরে থেইনে পাপ্ গরন্ তারার্ বিচের্ রীদি-সুদোমবোই অবঅ।

¹³ যিগুনে বানা রীদি-সুদোম কধা শুনোন্ সিগুনে গোজেনর্ চোগেদি নিদ্দুজি নয়, মাত্তর্ যিগুনে রীদি-সুদোম পালান্ গোজেনে তারারে নিদ্দুজি বিলি মানি লবঅ।

¹⁴ অযিহূদীগুনে মোশির রীদি-সুদোম ন-পান্, মাত্তর্ তো তারা যেক্কে নিজোত্তুন্ রীদি-সুদোম মজিম কাম্ গরন্ সেক্কে রীদি-সুদোম ন-পেইনেয়ো তারা নিজেই নিজোর্ রীদি-সুদোম অন্।

¹⁵ ইয়েনত্ দেগা যায়, রীদি-সুদোম মজিম যিয়েন গরানা উজিত্ সিয়েন তারা মনত্ লেগা আঘে। তারার্ বিবেক্-অ সেই এক্কুই সাক্ষ্য দে। তারার্ চিন্তেগানিয়ে কনঅ কনঅ সময় তারারে দুষী গরে, আরঅ কনঅ কনঅ সময় তারা পক্ষেয়ো থায়।

¹⁶ গোজেনে যেদিন্ন্যে যীশু খ্রীষ্টর্ মাধ্যমে মান্‌জ্যর্ গুমুরো বেক্কানি বিচের্ গুরিবো সেদিন্যে সিয়েনি ফগদাং পেবঅ। মুই যে গম্ হবর্ প্রচার গরং সেই কধা মজিম ইয়েনির্ বিচের্ অবঅ।

রীদি-সুদোম আর যিহূদীগুন

¹⁷ তুই নিজোরে যিহূদী কোই থাচ্, নয়-নে? তুই মোশির রীদি-সুদোম উগুরে বিশ্বেজ্ গরচ্ আর নিজে গোজেনর্ মানুচ্‌ বিলিনে দেমাগ্ দেগেই থাচ্।

¹⁸ গোজেনে কি চায় সিয়েন তুই কোই পারচ্ আর যিয়েন্ গম্ সিয়েন মানি লচ্, কিত্যে রীদি-সুদোমত্তুন্ তুই সেই শিক্ষ্যেগান্ পেইয়োচ্।

¹⁹ তুই মনে গরচ্ তুই কান্ মানুচ্চুনোরে পধ্ দেগর্। তুই পারা পাচ্, যিগুনে আন্ধারত্ আঘন্ তারা ইধু তুই পহ্‌র ধোক্ক্যেন্।

²⁰ তর্ ধারনা, যিগুনে বুদ্ধি-নেইয়্যে আর যিগুনে রীদি-সুদোম পৌইদ্যেনে শিক্ষ্যে ন-পান্ তুই তারারে শিক্ষ্যে দি থাচ্। রীদি-সুদোম ভিদিরে জ্ঞান আর সত্য আঘে বিলিনে তর্ এ ধারনাগান্ আঘে।

²¹ বেশ্, তুই যেক্কে অন্যগুনোরে শিক্ষ্যে দি থাচ্ সেক্কে নিজোরেয়ো শিক্ষ্যে ন-দোচ্ কিত্ত্যে? তুই প্রচার গরর্, “চুর্ ন-গোজ্জ্য,” মাত্তর্ তুই নিজেই কি চুর্ ন-গরর্?

²² তুই কোই থাচ্, “বেগেয়্যে ন-গোজ্জ্য,” মাত্তর্ তুই নিজেই কি বেগেয়্যে ন-গরর্? তুই দঅ মূত্তি ঘিনাচ্, মাত্তর্ তুই কি নিজেই মন্দিরোত্ যেইনে চুর্ ন-গরর্?

²³ রীদি-সুদোম্বোই তুই দেমাগ্ গরচ্, মাত্তর্ তুই নিজেই কি রীদি-সুদোম ন-মানিনেই গোজেনরে অসর্মান ন-গরর্?

²⁴ পবিত্র বোইবোত্ এ কধাগান্ লেগা আঘে, “তমাত্যে অযিহূদীগুনে গোজেন নাঙানর্ বদ্‌নাম্ গরন্।”

²⁵ তুই যুনি রীদি-সুদোম মানি চলচ্ সালে চুুুনু মাঢাবো চামান কাবানার্ দামান্ আঘে; মাত্তর্ যুনি রীদি-সুদোম ন-মানচ্ সালে চুনু মাঢাবো চামান কাবিলেয়ো গোজেন ইধু তুই চুনু মাঢাবো চামান ন-কাপ্যে মান্‌জ্য ধোক্ক্যেন্।

²⁶ ইয়েনত্যে কনঅ চুনু মাঢাবো চামান ন-কাপ্যে মানুচ্ যুনি রীদি-সুদোমর্ দাবীগানি মানি চলে সালে গোজেনে কি তারে চুনু মাঢাবো চামান কাবা ওইয়্যে বিলি ন-ধুরিবো?

²⁷ তঅ ইধু দঅ লেক্ক্যে রীতি-সুদোম আঘে আর তর্ চুনু মাঢাবো চামান কাবা ওইয়্যে। মাত্তর্ তুই যুনি রীদি-সুদোম ন-মানচ্ সালে যিবের্ চুনু মাঢাবো চামান কাবা ন-অয় অদচ রীদি-সুদোম পালন গরের্, তে কি আইন ন-মানিবাত্যে তরে দুষি ন-ধুরিবো?

²⁸ বানা বারেন্দিত্তুন্ যে যিহূদী তে আজল্ যিহূদী নয়। কিয়্যেগান বারেদি চুনু মাঢাবো চামান কাবা অলে যে আজল্ চুনু মাঢাবো চামান কাবা অলঅ, সিয়েন্অ নয়।

²⁹ মাত্তর্ মনেদি যে যিহূদী তেয়ই আজল্ যিহূদী। আজল্ চুনু মাঢাবো চামান কাবানার্ কামান্ মন ভিদিরে অয়। ইয়েন পবিত্র আত্মার্ কাম্, লেক্ক্যে আইন মানিবার্ কাম্ নয়। এ বাবোত্যে মানুচ্‌ মান্‌জ্যর্ বাঈনী ন-পায় ঠিগ্, মাত্তর্ গোজেনত্তুন্ বাঈনী পায়।