রোমীয় 16 - Chakma Bible

পৌলর্ ভালেদি জানানা

¹ এবেরা মুই আমা বোন ফৈবী পৌইদ্যেনে তমা ইধু সুপারিশ্ গরঙর্। তে কিংক্রিয়া শঅর মন্ডলীর দেগাশুনোগুরিয়্যে।

² গোজেন মানুচ্চুনোরে যেবাবোত্যেগুরি আপন গুরি নেযানা উচিত তারে তুমি প্রভুর্ নাঙে সেবাবোত্যেগুরি আপন গুরি লোইয়ো। কনঅ পৌইদ্যেনে যুনি তে তমার সাহায্য চায় সালে তারে সাহায্য গোজ্জ্য, কিয়া তে বোউত্ মান্‌জ্যরে, এমন্‌ কি মরেয়ো, সাহায্য গোজ্জ্যে।

³ প্রিষ্কিল্লা আর আকিলারে মর্ ভালেদি জানেয়ো। তারা খ্রীষ্ট যীশু কামত্ মঅ সমারে দুঘ্ গোজ্জ্যন্।

⁴ মঅ পরাণান্ রোক্ষ্যে গুরিবাত্তে যেইনে তারা নিজোরে মরণ মুয়োত ফেল্ল্যন্। বানা মুই নয়, মাত্তর্ বেক্‌ অযিহূদী মন্ডলীগুন্অ তারা ইধু কৃতজ্ঞ।

⁵ তারা ঘরত্ যিগুনে মন্ডলী ইজেবে এক সমারে এগত্তর্ অন্, তারারেয়ো ভালেদি জানেয়ো। এশিয়া রেজ্যত্ পত্তম্ যিবে খ্রীষ্টরে মানি লোইয়্যে মর্ সেই পরাণর্ দাংগু ইপেনিতরে ভালেদি জানেয়ো।

⁶ মরিয়ম, যিবে তমাত্যে বোউত্ কাম্ গোজ্জ্যে, তারে ভালেদি জানেয়ো। আন্দ্রনীক্ আর যূনিয়রে ভালেদি জানেয়ো।

⁷ তারা মঅ ধোক্ক্যেন যিহূদী আর মর্ সমারে তারায়ো জেলোত্ বন্দী এলাক্। প্রচারগ্‌কুনো ভিদিরে তারা ভারী সর্মানি মানুচ্। তারা মঅ আগেদি খ্রীষ্ট উগুরে বিশ্বেজ্ গোজ্জ্যন্।

⁸ প্রভু সমারে মিজেয়্যে মর্ পরাণর্ দাংগু আম্‌প্লিয়াতরে ভালেদি জানেয়ো।

⁹ উর্বাণ, যিবে আমা লগে খ্রীষ্টত্যে কাম্ গরে, তারে আর মর্ পরাণর্ দাংগু স্তাখিসরে ভালেদি জানেয়ো। আপিল্লিস্‌রে ভালেদি জানেয়ো।

¹⁰ খ্রীষ্টর মানুচ্‌ ইজেবে তারে চাগি চাহ্ ওইয়্যে।

¹¹ হেরোদিয়োন, যিবে মঅ ধোক্ক্যেন্ যিহূদী, তারে ভালেদি জানেয়ো। নার্কিস ঘর ভিদিরে যিগুনে প্রভুর্ মানুচ্ তারারে ভালেদি জানেয়ো।

¹² ত্রুফেণা আর ত্রুফোষারে ভালেদি জানেয়ো। এ মিলেগুনে প্রভুত্যে কাম্ গরন্। পরাণর্ পর্ষিসরেয়ো ভালেদি জানেয়ো। এ মিলেবোয়ো প্রভুত্যে বোউত্ কাম্ গোজ্জ্যে।

¹³ খ্রীষ্ট উগুরে গম্ বিশ্বেজি বিলিনে যিবের্ সুনাঙ্ আঘে সেই রূফরে আর তা মারে ভালেদি জানেয়ো। তা মাবো মইধু মঅ মা ধোক্ক্যেন।

¹⁴ অংসুক্রিত, ফ্লিগোন, হের্মেস, পাত্রোবাস, হের্মাস্‌ আর তারা সমারে খ্রীষ্ট উগুরে বিশ্বেজি অন্য ভেইয়ুনোরেয়ো ভালেদি জানেয়ো।

¹⁵ ফিললগ আর যুলিয়া, নিরীয় আর তা বোন, ওলুমপ আর তারা সমারে গোজেনর্ যিদুক্কুন মানুচ্ আঘন্ তারা বেক্কুনোরে ভালেদি জানেয়ো।

¹⁶ কোচ্‌পানার্ মনভাব্‌পোই তুমি একজন আরেক জনরে ভালেদি জানেয়ো। খ্রীষ্টর্ বেক্‌ মন্ডলীগুন্ তমারে ভালেদি জানাদন্।

শেচ্‌ উপদেচ্‌

¹⁷ ভেইলগ্, তুমি যে শিক্ষ্যে পেইয়ো সিয়েনির বিরুদ্ধে শিক্ষ্যে দিইনে যিগুনে দলাদলি আর মানা গরন্, সিগুনো উগুরে খিয়েল্ রাগেবাত্তে মুই তমারে বিশেষ্ গুরিনে কোজোলি গরঙর্। তুমি তারাত্তুন্ দূরোত্ থেইয়ো,

¹⁸ কিয়া এবাবোত্যে মানুচ্চুনে আমা প্রভু খ্রীষ্টরে সেবা ন-গুরিনে বরং নিজো পেদর্ সেবা গত্তন্। মিধে মিধে আর বিগিদি কধা কোইনে তারা মাদিঘিলে মানুচ্চুনোরে ঠগাদন্।

¹⁹ তমা বাধ্যতার কধা বেক্কুনে শুন্ন্যন্, আর সেনত্তে মুই তমা উগুরে হুজী ওইয়োং। মুই চাং যেন তুমি গমানরে চিনিনে মানি লঅ আর বজঙত্তুন্ দূরোত্ থাগঅ।

²⁰ শান্তিদিয়্যে গোজেনে যাদিমাদি শদানরে তমা টেঙ তলেদি ফেলেনে নিগুজ্ গুরিবো। আমা প্রভু যীশুর্ দোয়্যে তমা উগুরে থোগ্।

²¹ মঅ সমারে যিবে কাম্ গরে সেই তীমথিয় তমারে ভালেদি জানার্; লুকিয়, যাসোন আর সোষিপাত্রয়ো তমারে ভালেদি জানার্। তারায়ো মঅ ধোক্ক্যেন্ যিহূদী জাদর্ মানুচ্।

²² মুই, তর্তিয়, পৌলর্ এ চিধিয়ান লেগঙর্। খ্রীষ্টর্ মানুচ্ ইজেবে মুইয়ো তমারে ভালেদি জানাঙর্।

^23-24 মুই যিবের্ ঘরত্ থাং আর মন্ডলী মানুচ্চুনে যিবে ঘরত্ এক সমারে এগত্তর্ অন্ সেই গাইয় তমারে ভালেদি জানার্। এ শঅরর্ টেঙা-পৌইজ্যের্ ইজেব্ রাগেবার ভারান্ যিবে উগুরে আঘে সেই ইরাস্ত আর আমা ভেই কার্ত তমারে ভালেদি জানাদন্।

²⁵ যীশু খ্রীষ্ট পৌইদ্যেনে যে গম্ হবরান্ মুই প্রচার গরং সেই গম্ হবরান ভিদিরেদি তমারে থির্ গুরি রাগেবার খেমতা গোজেনর্ আঘে। ভালোক্ যুগ্ ধুরিনে গোজেনে তার্ গুমুরো উদ্দেচ্চ্যগান পৌইদ্যেনে কাররে ন-কয়,

²⁶ মাত্তর্ ইক্কিনে গম্ হবরানর্ মাধ্যমে সিয়েন ফগদাং ওইয়্যে আর সেবাবোত্যেগুরি মুই প্রচার গরঙর্। উমর গোজেনর্ উগুম মজিম ভাববাদীগুনোর্ লেঘার্ মাধ্যমে বেক্ জাদর্ মানুচ্চুনো ইধু সিয়েন জানা ওইয়্যে, যেন তারা খ্রীষ্ট উগুরে বিশ্বেজ্ গুরিনে গোজেনর্ বাধ্য ওই পারন্।

²⁷ তে বানা এক্কো গোজেন, তেয়ই জ্ঞানী। যীশু খ্রীষ্টর্ মাধ্যমে উমরত্তে তার্ বাঈনী ওক্। আমেন।