রোমীয় 15 - Chakma Bible

অন্যরে সুগী গরঅ

¹ আমি যিগুনে বিশ্বেজদি ঠিগ্, আমি যেন নিজোরে হুজি গরানা ইন্দি চোগ্ ন-দিইনে কম্ বিশ্বেজিগুনোর্ দুর্বলানি সোজ্জ্য গুরিই।

² বিশ্বেজি ভেইয়োরে গোড়েই তুলিবার আজায় আমি পত্তিজনে যেন তার্ ভালেদিত্যে তারে হুজি গুরিই।

³ খ্রীষ্টয়ো নিজোরে হুজি ন-গরে। পবিত্র বোইবোত্ লেগা আঘে, “যিগুনে তরে অগমান্ গরন্ সিগুনোর্ গোজ্জ্যে বেগ্ অগমানানি মঅ উগুরে পোজ্জ্যে।”

⁴ পবিত্র বোইবোত্ যিয়েনি আগে লেগা ওইয়্যে সিয়েনি আমার্ শিক্ষ্যাত্যে লেগা ওইয়্যে, যাতে সেই বোইবোত্তুন্ আমি ধৈজ্জ্য আর উচ্চোমি পেই আর সিয়েনর্ কারনে আজা পেই।

⁵ খ্রীষ্ট যীশু সমারে চলিবার্ পধত্ ধৈজ্জ্য আর উচ্চোমি দিয়্যে গোজেনে তমারে বেক্কুনোর্ মনানি এক গোরোক্।

⁶ সালে তুমি মনেদি আর মুয়োদি এক ওইনে আমা প্রভু যীশু খ্রীষ্টর্ গোজেন আর বাবারে বাঈনী গুরি পারিবা।

গম্ হবর্ বেক্কুনোত্যে

⁷ গোজেনর্ বাঈনী যাতে ফগদাং অয়, সেনত্তে খ্রীষ্ট যেধোক্ক্যেন তমারে আপন গুরি নেযেয়্যে সেবাবোত্যে তুমিয়ো একজন আরেক্ জনরে আপন গুরি লঅ।

^8-9 ইদোত্ রাগেচ্, গোজেন কধাগান যে সত্য সিয়েন ফগদাং গুরিবাত্তে খ্রীষ্ট যিহূদীগুনোর্ সেবাগুরিয়্যে ওইয়্যে। ইয়েনর্ উদ্দেশ্যগান্ এলঅ, পূরোণি মানুচ্চুনো ইধু গোজেনে যেদক্কানি এগেম্ গোজ্জ্যে সিয়েন যেন পুরোয় আর তার্ দোয়্যে-মেয়্যের্ কারনে অযিহূদীগুনে তারে বাঈনী গরন্। এ পৌইদ্যেনে পবিত্র বোইবোত্ লেগা আঘে, ইয়েনত্যে অন্য জাদ্‌তুনো ইধু মুই তর্ বাঈনী গুরিম আর তরে নাঙ্ গিনিম্।

¹⁰ আরঅ কুয়ো ওইয়্যেদে, ও বেক্ জাদর্ মানুচ্চুন, তুমি গোজেন মানুচ্চুনো সমারে তারে নাঙ্ গিনো।

¹¹ আরঅ আঘে, ও বেক্ জাদর্ মানুচ্চুন, প্রভুরে বাঈনী গরঅ; বেক্‌ মানুচ্চুনে তারে নাঙ্ গিনোদোক্।

¹² আরঅ যিশাইয় কোইয়্যেদে, যিবে যিশয়র গড়াগান্ তে এবঅ, বেক্ জাদ্‌তুনোরে শাসন গুরিবাত্তে তে থিয়্যেব। তা উগুরে বেক্ জাদর্ মানুচ্চুনোরে আজা রাগেব।

¹³ যিবে আজা দান গরে সেই গোজেনে তমা বিশ্বেজর্ মাধ্যমে অমকদ হুজিয়ে আর সুগে-শান্দিয়্যে তমারে ভর্‌পুনোং গোরোক্। সালে পবিত্র আত্মার্ খেমতালোই তমা মনানিত্ আজা পুড়েব।

পৌলর আওজ্

¹⁴ মঅ ভেইয়ুন, মুই তমা পৌইদ্যেনে এ কধাগান্ বিশ্বেজ্ গরঙর্ যে, তমা মনানি ভালেদির্-আয়োজে ভরা, তমার্ নানান্ বাবোত্যে জ্ঞান্ আঘে, আর তুমি একজন আরেকজনরে উপদেচ্‌ দি পারঅ।

^15-16 তো কয়েক্কো পৌইদ্যেনে তমারে ইদোত্ তুলি দিবাত্তে মুই সাহচ্‌ গুরিনে তমা ইধু এ কধাগানি লিগিলুং, কিয়া গোজেনে মরে অযিহূদীগুনো ইধু খ্রীষ্ট যীশুর্ সেবাগুরিয়্যে অবার্ বর্ দিয়্যে। পবিত্র আত্মালোই যিদুক্কুন্ অযিহূদীরে যুদো গুরি থুয়ো ওইয়্যে, তারা যেন গোজেনর্ মানি লোইয়্যে উৎসর্ব ওই পারন্ সেনত্তে তার্ দিয়্যে গম্ হবর্ ফগদাং গুরিনে মুই ধর্মগুরুর্ কাম্ গরঙর্।

¹⁷ মুই গোজেনত্তে যে কামানি গরঙর্ সিয়েনি খ্রীষ্ট যীশুর্ মাধ্যমে মর্ বাঈনী গুরিবার অধিকার আঘে।

^18-19 খ্রীষ্ট মঅ মাধ্যমে যিয়েনি গোজ্জ্যে সিয়েনির বারেদি কনঅ কধা কবার্ সাহস মুই ন-গুরিম। তে মর্ কধা আর কামর্ মাধ্যমে, আমক্ অবার্ কাম আহ্ চিহ্নো কামর্ মাধ্যমে আর পবিত্র আত্মার খেমতালোই অযিহূদীগুনোরে গোজেনর্ বাধ্য গোজ্জ্যে। সিয়েনর্ কারনে মুই যিরূশালেমত্তুন্ আরাম্ভ গুরিনে ইল্লুরিকা সং বেক্ জাগানিত্ খ্রীষ্ট পৌইদ্যেনে গম্ হবর্ পুরোপুরি গুরিনে প্রচার গোজ্জ্যং।

²⁰ খ্রীষ্ট নাঙান্ যিয়েনত কনদিন্অ কুয়ো ন-অয় সিয়েনত্ গম্ হবর্ ফগদাং গরানা মঅ জিবনর্ আজা, যেন অন্য মান্‌জ্যর্ বানেয়্যে জাগাত্ মত্তুন্ বানা ন-পড়ে।

²¹ পবিত্র বোইবোত্ লেগা আঘে, “যিগুনো ইধু তা পৌইদ্যেনে কুয়ো ন-অয় তারা সিয়েন দেগিবাক্, আর যিগুনে কনদিন্অ ন-শুনোন্ তারা বুঝি পারিবাক্।”

পৌলর্ রোমত যেবার্ আওজ্

²² ইয়েনত্যে মুই তমা ইধু ভালোক্ বার্ যেবাত্তে চেইনেয়ো যেই ন-পারং।

²³ মাত্তর্ ইক্কিনে এ বেক্‌ চাগালানিত্ মর্ কাম্ গুরিবার আর্ জাগা নেই। ভালোক্ বজর্ ধুরিনে তমা ইধু মর্ যেবার্ আওজ্,

²⁴ সেনত্তে ইক্কিনে স্পেইন দেজত্ যেবার্ পধত্ মুই তমা ইধু যেবাত্তে চাঙর্। মুই আজা গরং, সেই পধেদি যেবার্ অক্তত্ তমা ইধু যেই পারিম্ আর তমা সমারে খানক্‌কন্ হুজীয়ে কাদানার্ পরেদি তুমি মরে স্পেইন দেজত্ যেবার্ বেবস্থা গুরি দিবা।

²⁵ মাত্তর্ ইক্কিনে মুই গোজেন মানুচ্চুনোরে বল্ দিবাত্যে যিরূশালেমত্ যাঙর্,

²⁶ কিয়া যিরূশালেমত্ গোজেন মানুচ্চুনো ইধু যিদুক্কুন্ নাঢা মানুচ্ আঘন্ তারাত্তে ম্যাসিডোনিয়া আর আখায়া মন্ডলীগুনোর মানুচ্চুনে কিজু টেঙা তুল্ল্যন্।

²⁷ এ টেঙাগুন্ তারা হুজি ওইনে তুল্ল্যন। ইয়েন বাদেয়ো এই মন্ডলীগুন যিরূশালেম মানুচ্চুনো ইধু নাম্ ফুদেয়্যে, কিয়া যিহূদীগুনে যেক্কে তারার্ আত্মিক আশির্বাদর্ ভাগ্ অযিহূদীগুনোরে দুয়োন সেক্কে অযিহূদীগুনোর‌্‌‌অ উচিত্ সাংসারিগ পৌইদ্যেনে যিহূদীগুনোরে সাহায্য গরানা।

²⁸ মর্ এ কামান্ থুম্ অলে পরেদি যেক্কে মুই কোই পারিম, সেই টেঙাগুন্ গমেডালে লুমেই দুয়োন্ সেক্কে তমা কায় কুরে গুরি মুই স্পেইনত্ যেম্।

²⁹ মুই কোই পারং যেক্কে মুই তমা ইধু যেম্ সেক্কে খ্রীষ্টর্ পুরোপুরি আশিদ্‌বাদ লোইনে যেম্।

³⁰ ভেইলগ্, আমা প্রভু যীশু খ্রীষ্টর্ মাধ্যমে আর পবিত্র আত্মার্ দিয়্যে কোচ্‌পানার্ মাধ্যমে মুই তমারে বিশেষ্ গুরিনে কোজোলী গরঙর্, তুমি গোজেন ইধু মত্তে মঅ সমারে তবনার্ যুদ্ধো চালেই থাগঅ।

³¹ তুমি তবনা গরঅ, যিহূদীয়াত্ যিগুনে অমান্য গরন্ তারা আঢত্তুন্ মুই যেন রোক্ষ্যে পাং, আর যিরূশালেমর্ গোজেন মানুচ্চুনে যেন মর্ এ সাহায্যগান্ গুজি লন্।

³² সেক্কে গোজেন আয়োজে মুই হুজি মনে তমা ইধু যেই পারং আর তমা সমারে থেইনে পরাণান্ জুড়েব।

³³ শান্তিদিয়্যে গোজেনে তমা বেক্কুনো সমারে সমারে থোক্। আমেন।