রোমীয় 10 - Chakma Bible

¹ ভেইলগ্, ইস্রায়েলীয়গুনোত্যে মঅ মনত্ অমকদ আওজ্ আর গোজেন ইধু মর্ তবনাগান ইয়েন, তারা যেন পাপত্তুন্ উদ্ধোর্ পান্।

² তারা পৌইদ্যেনে মুই এ সাক্ষ্যগান্ দোঙর্, গোজেন উগুরে তারার্ অমকদ আওজ্ আঘে, মাত্তর্ কেধোক্ক্যেন্ গুরি গোজেনর্ মানি লোইয়্যে উয়ো যায় সিয়েন তারা হবর্ ন-পান্।

³ গোজেনে মান্‌জ্যরে কেধোক্ক্যেন্ গুরিনে নিদ্দুজি বিলি মানি লয় সে কধাগান মনযোগ্ ন-দিইনে নিজো চেট্ট্যায় তারা তার্ মানি লয়দ্যে ধোক্ক্যেন্ অবাত্তে চেইয়োন। সেনত্তে গোজেনে যেবাবোত্যেগুরি মান্‌জ্যরে নিদ্দুজি বিলি মানি লয় সিয়েন তারা ন-মানন্।

⁴ যীশু খ্রীষ্ট রীদি-সুদোম পুরেই দিইনে সিয়েনির্ খেমতাগান্ বাদ্ দি দিয়্যে, যেন তা উগুরে যিগুনে বিশ্বেজ্ গরন্ তারা গোজেনর্ মানি লোইয়্যে অন্।

উদ্ধোর্ বেক্কুনোত্তে

⁵ রীতি-সুদোম পালেইনে গোজেনর্ যগাজ্জ্যে অনা পৌইদ্যেনে মোশি লেখ্যেদে, “যে মানুচ্চো রীতি-সুদোম্ মজিম আঢে তে সিয়েনর্ মাধ্যমে জিংকানি পেবঅ”

⁶ মাত্তর্ বিশ্বেজর্ মাধ্যমে কেধোক্ক্যেন্ গুরিনে মানুচ্ গোজেনর্ যগাজ্জ্যে অন্ সে পৌইদ্যেনে পবিত্র বোইবোত্ কুয়ো ওইয়্যেদে, “মনে মনে এ কধাগান্ ন-কোইয়ো, ‘কন্না স্বর্গত্ যেবঅ?’ ” ইয়েনর্ মানেগান্ অলঅ, স্বর্গত্তুন্ খ্রীষ্টরে লামেই আনিবাত্যে কন্না স্বর্গত্ যেবঅ?

⁷ “অথবা ন-কোইয়ো, ‘কন্না তলেদি মরাগুনোর্ জাগাত্ যেবঅ?’ ” অত্তাৎ মরণত্তুন্ খ্রীষ্টরে তুলি আনিবাত্যে কন্না মরাগুনো জাগানত্ যেবঅ?

⁸ গোজেনর্ মানি লোইয়্যে অনা পৌইদ্যেনে পবিত্র বোইবো আরঅ কয়, “গোজেনে যিয়েন কোইয়্যে সিয়েন তঅ সমারে আঘে, অত্তাৎ তঅ মুয়োত্ আর তঅ মনত্ আঘে।” যে বিশ্বেজর্ কধা আমি ফগদাং গুরির্ সিয়েন অলঅ গোজেনর্ সেই কধাগান্।

⁹ সেই কধাগান্ অলঅ, যুনি তুই যীশুরে প্রভু বিলিনে মুুয়োদি স্বিগের্ গরচ্ আর মনেদি বিশ্বেজ্ গরচ্ যে, গোজেনে তারে মরণত্তুন্ জেদা গোজ্জ্যে সালেই তুই পাপত্তুন্ উদ্ধোর্ পেবে;

¹⁰ কিয়া মনেদি বিশ্বেজ্ গরানার্ ফলে গোজেনে মান্‌জ্যরে নিদ্দুজি বিলিনে মানি লয় আর মুয়োদি স্বিগের্ গরানার্ ফলে পাপত্তুন্ উদ্ধোর্ গরে।

¹¹ পবিত্র বোইবো কয়, “যে কেঅ তা উগুরে বিশ্বেজ্ গরে তে আজা-নেইয়্যে ন-অবঅ।”

¹² যিহূদী আর অযিহূদীগুনো ভিদিরে কনঅ বেচ্‌কম্ নেই, কিয়া বেক্কুনোর্ এক্কো প্রভু। যিগুনে তারে ডাগন্ তে তারা উগুরে জদবদে বর্ দে।

¹³ পবিত্র বোইবোত্ আঘে, “রোক্ষ্যে পেবাত্তে যে কনজনে প্রভুরে ডাগিবো, তে রোক্ষ্যে পেবঅ।”

¹⁴ মাত্তর্ যিবে উগুরে তারা বিশ্বেজ্ ন-গরন্ তারে কেধোক্ক্যেন্ গুরি ডাগিবাক্? যিবে পৌইদ্যেনে তারা ন-শুনোন্ তা উগুরে কেধোক্ক্যেন গুরিনে বিশ্বেজ্ গুরিবাক্? প্রচারক ন-থেলে তারা কেধোক্ক্যেন্ গুরিনে শুনিবাক্?

¹⁵ সিয়েন বাদে কেঅ দি ন-পাধেলে কেধোক্ক্যেন্ গুরিনে প্রচারগ্‌কুনে প্রচার গুরিবাক্? পবিত্র বোইবোত্ লেগা আঘে, “বর্ পেইয়্যে তারার্ টেঙানি যিগুনে ভালেদির্ গম্ হবর্ প্রচার গুরিবাত্তে এজন্।”

¹⁶ মাত্তর্ বেক্কুনে সেই গম্ হবরত্ কান্ ন-পাদন্। ভাববাদী যিশাইয় কোইয়্যে, “প্রভু, আমার দিয়্যে গম্ হবরান্ কন্না বিশ্বেজ্ গোজ্জ্যে?”

¹⁷ সালে দেগা যায়, গোজেনর্ কধানি শুনোনার্ পরেদি বিশ্বেজ্ এজে, আর যীশু খ্রীষ্ট পৌইদ্যেনে প্রচারর্ মাধ্যমে সেই কধানি শুনিবাত্তে পাহ্ যায়।

¹⁸ মাত্তর্ মুই কং, ইস্রায়েলীয়গুনে কি সেই কধানি ন-শুনোন্? খামাক্কায় শুন্ন্যন্। পবিত্র বোইবো কয়, তারার্ ডাগানাগান্ গোদা দুনিয়েগানত্ ছিদি পোজ্জ্যে, ছিদি পোজ্জ্যে তারার্ কধানি জগদর্ থুমো দুজি সং

¹⁹ মুই আরঅ কং, ইস্রায়েলীয়গুনে কি সেই কধানি ন-বুঝোন্? পত্তমে মোশির্ মাধ্যমে গোজেনে কোইয়্যেদে, “যে জাদ্‌‌তো কনঅ জাদ্ নয়, সেই জাদ্‌‌তোরে দিইনে মুই তঅ আওজ্‌‌চান জাগেই তুলিম; এক্কো অবুঝ জাদরে দিইনে তরে রাগ্ তুলি দিম্।”

²⁰ সে পরেদি যিশাইয়র্ মাধ্যমে গোজেনে আরঅ জোর্ গুরিনে কোইয়্যেদে, “মুই তারা ইধু এলুং, মাত্তর্ তারা কনঅ সাহায্যত্তে মইধু ন-এজন্। মুই এ মানুচ্চুনোরে মইধু কোজোলী গুরিবার্ সুযোগ্ দুয়োং, মাত্তর্ তারা মইধু কনঅ কোজোলী ন-জানান্।”

²¹ মাত্তর্ ইস্রায়েলীয়গুনো পৌইদ্যেনে তে কোইয়্যেদে, “অবাধ্য আর একবুচ্চ্যে মানুচ্চুনো ইন্দি মুই গোদা দিন্নো মঅ আঢ্‌‌‌তানি বাবেই রাগেয়োং।”