রোমীয় 1 - Chakma Bibleভালেদি জানানা 1 10 মুই খ্রীষ্ট যীশুর্ চাগর্ পৌল রোম শঅরর্ বিশ্বেজিগুনো ইধু এ চিধিগান্ লেগঙর্। তার প্রচারক্ অবাত্যে গোজেনে মরে ডাক্ক্যে আর তার দিয়্যে গম্ হবরান্ প্রচার গুরিবাত্যে বেঈ লোইয়্যে। 2 গোজেনে তার্ ভাববাদীগুনোর্ মাধ্যমে পবিত্র বোইবো ভিদিরে আগেদি এ গম্ হবরানর্ এগেম্ গোজ্যে। 3-4 সেই গম্ হবরান্ অলঅ তার্ পুয়োবো পৌইদ্যেনে। সেই পুয়োবো যীশু খ্রীষ্ট, আমার্ গিরোজ্। কিয়্যেগানদি তে রাজা দায়ূদোর গুট্টি এলঅ, আর তার্ পাপ-নেইয়্যে আত্মাগান ইন্দিত্তুন্ তে দাঙর্ খেমতালোই মরণত্তুন্ জেদা ওইনে গোজেনর্ পুয়ো ইজেবে ফগদাং ওইয়্যে। 5 তার্ মাধ্যমে তা নাঙানত্তে আমি দোয়্যে আর প্রচারক-পদ পেইয়্যেই, যেন বেক্ জাদঅ ভিদিরেত্তুন্ মান্জ্যে বিশ্বেজ্ গুরিনে গোজেনর্ বাধ্য ওই পারন্। 6 সেই মানুচ্চুনো ভিদিরে তুমিয়ো আঘ। যীশু খ্রীষ্টর্ মানুচ্ অবাত্যে গোজেনে তমারে ডাক্ক্যে। 7 রোম শঅরর্ যে মানুচ্চুনোরে গোজেনে কোচ্পায় আর তার্ নিজো মানুচ্ অবাত্যে ডাক্ক্যে তারা বেক্কুনো ইধু, অত্তাৎ তমা ইধু মুই এ চিধিগান লেগঙর্। আমা বাবা গোজেনে আর প্রভু যীশু খ্রীষ্ট তমারে বর্ দুয়োক্ আর সুগ্-শান্তি দান গোরোক্। পৌলর রোমত্ যেবার্ আওজ্ 8 পত্তমে মুই যীশু খ্রীষ্টর্ মাধ্যমে তমা বেক্কুনোত্যে মর্ গোজেনরে ভালেদি জানাঙর্, কিত্যে তমা বিশ্বেজর্ কধানি গোদা দুনিয়েগানত্ ছিদি পোজ্জ্যে। 9 গোজেন পুয়ো পৌইদ্যেনে গম্ হবর্ প্রচার গুরিনে মর্ বেক্ মনান্দোই মুই গোজেনরে সেবা গরঙর্। মুই যেদক্ বার্ তবনা গরং সেদক্ বার্ যে তমা কধানি ইদোত্ তুলোং, তেয়ই সিয়েনর্ সাক্ষী। 10 মর্ তবনাগান ইয়েন্, গোজেনর্ আয়োজে মুই যেন এবারত্ কনঅ বাবদে তমা ইধু যেই পারং। 11 তমারে খেমতাবলা গুরিবাত্তে কনঅ আত্মিক দান যেন তুমি মঅ মাধ্যেমে পেই পার সেনত্তে মুই তমা সমারে দেগা গুরিবাত্তে চাং। 12 সিয়েনর্ ভেদ্তান্, আমি বেক্কুনে যেন একজন আরেক্ জনর্ বিশ্বেজত্তুন্ উচ্চোমি পেই। 13 ভেইলগ্, এ কধাগান্ হবর্ পেইয়ো, মুই ভালোক্ বার্ তমা ইধু যেবাত্তে চেইনেয়ো এজঅ সং মানা গরদন্। অন্য জাগাত্ অযিহূদীগুনো ইধু প্রচার গুরিনে যেবাবোত্যে ফল পেয়োং, ঠিগ্ সেবাবোত্যেগুরি তমাত্তুন্অ কিজু ফল দেগিবার আজায় মুই তমা ইধু যেবাত্তে চেইয়োং। 14 সভ্য-অসভ্য, শিক্ষিত-অশিক্ষিত, বেক্কুনো ইধু মুই বাধ্য। 15 সিয়েনত্তে তুমি যিগুনে রোমত্ আঘঅ তমা ইধুয়ো যীশু খ্রীষ্ট পৌইদ্যেনে গম্ হবর্ প্রচার গুরিবাত্তে মুই আওজি। গম্ হবরর্ খেমতা 16 যীশু খ্রীষ্ট পৌইদ্যেনে এই যে গম্ হবর্ সিয়েনত্ মর্ কনঅ লাজ নেই, কিত্যেই এ গম্ হবরানই অলঅ গোজেনর্ খেমতা যিবের্ মাধ্যমে তে বেক্ বিশ্বেজি গুনোরে পাপত্তুন্ উদ্ধোর্ গরে-পত্তমে যিহূদীগুনোরে, সে পরেদি অযিহূদীগুনোরে। 17 গোজেনে কেধোক্ক্যেন্ গুরি মান্জ্যরে নিদ্দুজি বিলিনে মানি লয় সে কধাগান্ এ গম্ হবর্ ভিদিরে ফগদাং গরা ওইয়্যে। পৌইল্যাত্তুন্ ধুরি থুম্ সং বানা বিশ্বেজর্ মাধ্যমে মান্জ্যরে নিদ্দুজি বিলিনে মানি লুয়ো অয়। পবিত্র বোইবোত্ লেগা আঘে, “যিবেরে নিদ্দুজি বিলিনে মানি লুয়ো অয় তে বিশ্বেজর্ মাধ্যমে জিংকানি পেবঅ।” মানুচ্ দুষী 18 মান্জ্যে গোজেনর্ সত্যগানরে অন্যেয়লোই চাবি থান্, আর সেনত্তে তা উগুরে ভক্তির অভাব আর বেক্ অন্যেয় কামানিত্যে স্বর্গত্তুন্ মান্জ্য উগুরে গোজেনর্ রাগ্কান্ ফগদাং ওই থায়। 19 গোজেন পৌইদ্যেনে যিয়েন জানি পারে সিয়েন মান্জ্য ইধু খুলোমেলা, কিত্যেই গোজেনে নিজেই তারা ইধু সিয়েনি ফগদাং গোজ্যে। 20 গোজেনর্ যেদক্কানি গুণ চোগেদি দেগা ন-যায়, অত্তাৎ তার্ উমরর্ খেমতা আর গোজেনর গুণান্ সৃট্টির আরাম্ভত্তুন্ ধুরি গমেডালে ফুদি উঠ্যে। তার্ সৃট্টিত্তুন্ ধুরি মান্জ্যে সিয়েন গমেদালে বুঝি পারন্। ইয়েনর্ পরেদি মান্জ্যর্ আর কনঅ জোব্ দিবার নেই। 21 মান্জ্যে তা পৌইদ্যেনে জানিবার্ পরেদিয়ো গোজেন ইজেবে তারে বাঈনীয়ো ন-গরন, আর ভালেদিয়ো ন-জানান্। তারার্ চিন্তেগানি বাজে ওই যেইয়্যে আর তারার্ বুদ্ধি-নেইয়্যে মনানি আন্ধারে ভুরি যেইয়্যে। 22 যুনিয়ো তারা নিজোরে জ্ঞানী বিলিনে দাবী গরলেয়ো আজলে তারা অঘা ওইয়োন। 23 উমর জিংকানিবর্, মহিমাবলা গোজেনর্ উবোসনা ছাড়িনে তারা খানক্কোন্যে মানুচ্, পেগ্, য়েমান আর বুগেদি-আঢি বেড়েইয়্যেগুনোরে মূত্তি পূজো গত্তন্। 24 ইয়েনত্যে গোজেনে মান্জ্যরে তার্ মনর্ কামনা-বাসনা মজিম্ জঘন্য কাম্ গুরিবাত্তে ইরি দিয়্যে। যেরেদি তারা একজন আরেক জন লগে জঘন্য কাম্ গুরিনে নিজো কিয়্যেগানিরে অসর্মান গোজ্যন্। 25 গোজেনর্ সত্যগানরে ফেলেইনে তারা মিজেগানরে মানি লোইয়োন। গোজেনরে বাদ দিইনে তার্ বানেয়্যে জিনিজোর্ পূজো গোজ্যন, মাত্তর্ বেক্ বাঈনী পানা জিংকানিবর্ সেই গোজেনর্। আমেন। 26 মানুচ্ ইয়েনি গোজ্জ্যন্ বিলিনে গোজেনে লাজত্ পড়েদে কামনার্ আঢত্ তারারে ইরি দিয়্যে। মিলেগুনেয়ো মরদ সমারে তারার্ স্বাভাবিক বেবহারর্ বদলে অন্য মিলেগুনো সমারে অস্বাভাবিক্ গুরিনে বজং কাম্ গোজ্জ্যন্। 27 মরদ্তুনেয়ো ঠিগ্ সেবাবোত্যে গুরিনে মিলেগুনো সমারে তারার্ স্বাভাবিক বেবহার বাদ্ দিইনে মরত্তুনো সমারে কামনায় জ্বলি উত্ত্যন্; মরদ মরদঅ সমারে লাজ্ গরেপারা বজং কাম্ গোজ্জ্যন্। সেনত্তে তারা পত্তিজনে সিয়েনির অন্যেয় কামর্ পাওনা সাজা নিজেই পেইয়োন। 28 এবাবোত্যেগুরি মানুচ্ গোজেনরে মানিবাত্তে ন-চান্ বিলি গোজেনেয়ো পাপ্পোই ভরা মনঅ আঢত্ তারারে ইরি দিয়্যে, আর সেনত্তে মানুচ্ ভান্ন্যেই কাম্ গুরি থান্। 29 নানান্ বাবোত্যে অন্যেয়, ভান্ন্যেই, লুভ্, নীচুতা, ইংসে, খুন্, মারামারি, ছলনা আর অন্যরে ক্ষতি গুরিবার আয়োজে তারা যুক্কোল্। 30 অন্যরে নিন্দে গরন্ আর গোজেনরে ঘিনান্। তারা রগ্চদা, বার্বো আর দেমাগ্। অন্যেয় কাম্ গুরিবাত্তে তারা নুয়ো নুয়ো ফন্দি বার্ গরন্। তারা মা-বাবর্ উল্লো, 31 গম্-ভান্ন্যেয়র্ জ্ঞান্ তারাত্তুন্ নেই, আর তারা অবিশ্বেজি। পরিবার ইন্দি তারার্ কোচ্পানা নেই আর তারার্ মনত্ দোয়্যে-মেয়্যে নেই। 32 গোজেনর্ এ বিচেরর্ কধানি তারা গমেডালে হবর্ পান্ যে, এবাবোত্যে কাম্ যিগুনে গরন্ তারা মরণর্ সাজা পেবার্ কধা। এ কধাগান্ কোই পারিনেয়ো তারা যে বানা ইয়েনি গুরি থান্ সিয়েন নয়, মাত্তর্ অন্য যিগুনে সিয়েনি গরন্ তারারেয়ো অজেই দুয়োন্। |
Copyright © 2021 Bangladesh Bible Society
Bangladesh Bible Society