ফগদাং পেইয়্যে 9 - Chakma Bible1 সে পরেদি পাঁচ-লম্বর স্বর্গদূত্তো তুরী বাজেল, আর মুই এক্কো তারা দেগিলুং। তারাবো আগাজত্তুন্ পিত্থিমীত পোজ্জ্যে। সেই তারাবোরে গভীন গাঢর্ চাবি দিয়্যে অলঅ। 2 তারাবো সেই গভিন্ গাঢ্তো খুলিলো; সেক্কে দাঙর্ চুলোবোত্তুন্ যেধোক্ক্যেন গুরি ধূমো নিগিলে, ঠিগ্ সেধোক্ক্যেন গুরি সেই গাঢ্তোত্তুন্ ধূমো নিগিলে ধুরিলো। সেই গাঢ্তোর্ ধূমোলোই বেলান আর আগাজ্চান আন্ধার ওই গেলঅ, 3 আর সেই ধূমোগান ভিদিরেত্তুন্ ভালোক্কুন পুগ্-যুগ্ পিত্থিমীত নিগিলি এলাক্। সেই পুগ্-যুগ্কুনোরে পিত্থিমীর কাঙারা বিঝে ধোক্ক্যেন খেমতা দিয়্যে অলঅ। 4 সিগুনোরে কুয়ো অলঅ তারা যেন পিত্থিমীর কনঅ ঘাস বা য়্যেল্ কনঅ কিজু বা কনঅ গাজর্ ক্ষোতি ন-গরন; বানা যে মানুচ্চুনোর কবালত্ গোজেনর্ সীলমহ্র নেই তারারে ক্ষোতি গরন্। 5 এ মানুচ্চুনোরে মারে ফেলেবার কনঅ খেমতা তারারে দিয়্যে ন-অলঅ ঠিগ্, মাত্তর্ পাঁচ মাস সং যন্ত্রণা দিবার খেমতা তারারে দিয়্যে অলঅ। কাঙারা বিছে যেক্কে কনঅ মান্জ্যরে লেজ্ ফুদেই দুয়োন সেক্কে যেধোক্ক্যেন গুরি যন্ত্রণা অয় এই পুগ্-যুগ্কুনোর্ দিয়্যে যন্ত্রণাগানিয়ো ঠিগ্ সেধোক্ক্যেন। 6 সেই সময়োত্ মান্জ্যে মরণানরে তোগেবাক্ মাত্তর্ কনমতে সিয়েন ন-পেবাক্; তারা মরিবার চেবাক্ মাত্তর্ মরণানে তারাত্তুন্ ধেই যেবঅ। 7 সেই পুগ্-যুগ্কুন চাদে যুদ্ধো গুরিবাত্যে যুক্কোল্ গোজ্জ্যে ঘোড়া ধোক্ক্যেন। তারার্ মাঢাত্ সনা মুকুটো ধোক্ক্যেন এক বাবোত্যে জিনিস এলঅ, আর তারার্ মুয়ো চেঙারাগান্ এলঅ মান্জ্য ধোক্ক্যেন। 8 তারার্ চুলানি মিলে চুলো ধোক্ক্যেন আর তারার্ দাত্তুন সিংহ দাত ধোক্ক্যেন। 9 তারার্ বুগোত্ বুগ রোক্ষ্যে গুরিবার লুয়ো পজাক্ এলঅ। ভালোক্কুন ঘোড়া একসমারে যুদ্ধোর রথ্তানি টানিনে দাবা দিলে যেধোক্ক্যেন রঅ অয়, তারার্ ডুয়োগানির রঅগুন ঠিগ্ সেধোক্ক্যেন এলঅ। 10 তারার্ লেজ্চানি আর হুলুন্ কাঙাড়া বিছের্ লেজ্ আর হুল ধোক্ক্যেন এলঅ। পাচ্ মাস সং মানুচ্চুনোরে ক্ষতি গুরিবার খেমতা তারার্ লেজত্ এলঅ। 11 গভীন গাঢ্ দুনোবো এলদে এই পুগ্-যুগ্কুনোর্ রাজা। ইব্রীয় কধাদি সেই দূত্তোর নাঙান এলঅ আবদ্দোন আর গ্রীক কধাদি আপল্লুয়োন, অত্তাৎ ভস্ত গুরিয়্যে। 12 পত্তম দজাগান থুম্ অলঅ। চাহ্, ইয়েনর পরেদি আরঅ দ্বিয়েন দজা এজের্। 13 সে পরেদি ছ'লম্বর স্বর্গদূত্তো তা তূরীবো বাজেল। গোজেন মুজুঙোত্ যে সনার পূজোবো আঘে সেই পূজোবোর্ চের্বো শিংঅ কুরেত্তুন্ মুই একজনরে কধা কধে শুনিলুং। যিবে ইধু তূরী এলঅ সেই ছ'লম্বর স্বর্গদুদ্তোরে তে কলঅ, 14 “যে চেরজন দূত্ বড়্গাঙ ইউফ্রেটিস ভিদিরে বান্ন্যে আঘন্ তারারে ইরি দে।” 15 সেক্কে সেই চেরজন দূতোরে ইরি দিয়্যে অলঅ। এই বজরর্ এই মাস, এই দিন্নোত্ আর এ ঘন্টাবোত্যে সেই দুত্তুনোরে যুক্কোল্ গুরি থুয়ো ওইয়্যে যেন তারা তিন ভাগর এক ভাগ মান্জ্যরে মারে ফেলান। 16 যেরেদি মুই শুনিলুং, ঘোড়া উগুরে সৈন্যর সোংখ্যে এলদে কুড়ি কোটি। 17 জ্ঞানেদি যে ঘোড়াগুন আর সিগুনো উগুরে যিগুনোরে মুই দেগিলুং তারার চেঙারাগানি এবাবোত্যে এলঅ-তারার্ বুক্ রোক্ষ্যে গুরিবার পজাক্ এলঅ আগুনো ধোক্ক্যেন রাঙা, য়্যেল্ আর গন্ধক ধোক্ক্যেন ওলোত্যে রঙর্। ঘোড়াগুনোর মাঢাগুন এলদে সিংহ মাঢা ধোক্ক্যেন আর সিগুনোর্ মুয়োত্তুন্ আগুন, ধূমো আর গন্ধক নিগিলের্। 18 আগুন, ধূমো আর গন্ধক-এই তিনেন্ আঘাত্তোই তিন ভাগর্ এক ভাগ মান্জ্যরে মারে ফেলা অলঅ। 19 সেই ঘোড়াগুনোর মুয়োনিত্ আর লেজ ভিদিরে তারার বল্ এলঅ, কারন তারার্ লেজ্চানি এলদে সাপ ধোক্ক্যেন। সেই লেজ্চানির মাঢাগান্দোই তারা মান্জ্যরে ক্ষতি গোজ্জ্যন্। 20 মাত্তর্ এই আঘাতর্ পরেদিয়ো যিদুক্কুন মানুচ্ বাঁজি এলাক্ তারা নিজো আঢে বানেয়্যে মূত্তিগুনোত্তুন মনানি ন-ফিরেলাক্, তারা ভান্ন্যেই আত্মাগুনোর আর যিগুনে ন-দেগন্, ন-শুনোন্ বা আঢি ন-পারন এবাবোত্যে বেক্ সনা, রূবো, পিদোল, পাথর্ আর গাজ্সোই বানেয়্যে মূত্তিগুনোরে পূজো গরানাত্ থেলাক্। 21 ইয়েনিবাদে খুন, যাদুবিদ্যে, বেগেয়্যে আর চুর্-ইয়েনিত্তুন্ তারা মনানি ন-ফিরেলাক্। |
Copyright © 2021 Bangladesh Bible Society
Bangladesh Bible Society