ফগদাং পেইয়্যে 7 - Chakma Bible

সীলমহ্‌র গোজ্জ্যে একশঅ চৌচল্লিশ্ আজার ইস্রায়েলীয়

¹ ইয়েনর্ পরেদি মুই চেরজন স্বর্গদূতোরে পিত্‌থিমীর চের্ কোণাত্ থিয়্যেই থাগদে দেগিলুং। তারা পিত্‌থিমীত চের্ কোণাত্ বৈয়্যেরানরে আক্‌সোই রাগেয়োন, যেন পিত্‌থিমী, সাগর বা কনঅ গাজ উগুরে বৈয়্যের্ ন-বায়।

² পরেদি মুই আরঅ এক্কো স্বর্গদূতোরে পূগেন্দিত্তুন্ উদি এত্তে দেগিলুং। তাইধু জেদা গোজেনর্ সীলমহ্‌র এলঅ। যে চেরজন স্বর্গদূতোরে পিত্‌থিমী আর সাগরানরে ক্ষতি গুরিবার খেমতা দিয়্যে ওইয়্যে সেই চেরজন স্বর্গদূতোরে তে রঅ ছাড়িনে কলদে,

³ “আমা গোজেন চাগরুনোর্ কবালত্ সীলমহ্‌র ন-দেনা সং পিত্‌থিমী, সাগর বা গাজ্-পালার ক্ষোতি ন-গোজ্জ্য।”

⁴ সে পরেদি মুই সেই সীলমহ্‌র গোজ্জ্যে মানুচ্চুনোর সোংখ্যেগুন শুনিলুং। ইস্রায়েলীয়গুনোর বেক্‌ গুট্টিগুনোত্তুন্ বেক্কুনে একশঅ চৌচোল্লিশ্ আজার মান্‌জ্যরে সীলমহ্‌র গরা ওইয়্যে:

⁵ যিহূদা গুট্টি ভিদিরেত্তুন্ বার আজার। রূবেণ গুট্টি ভিদিরেত্তুন্ বার আজার। গাদ গুট্টি ভিদিরেত্তুন্ বার আজার।

⁶ আশের গুট্টি ভিদিরেত্তুন্ বার আজার। নাপ্তালি গুট্টি ভিদিরেত্তুন্ বার আজার। মনঃশি গুট্টি ভিদিরেত্তুন্ বার আজার।

⁷ শিমিয়োন গুট্টি ভিদিরেত্তুন্ বার আজার। লেবি গুট্টি ভিদিরেত্তুন্ বার আজার। ইষাখর গুট্টি ভিদিরেত্তুন্ বার আজার।

⁸ সবূলূন গুট্টি ভিদিরেত্তুন্ বার আজার। যোষেফ গুট্টি ভিদিরেত্তুন্ বার আজার। বিন্যামীন গুট্টি ভিদিরেত্তুন্ বার আজার।

ধুব্ কাবড় উজ্জ্যে মান্‌জ্যর ভিড়্

⁹ ইয়েনর্ পরেদি মুই পত্তি জাত্, গুট্টি, দেশ আর ভাষা ভিদিরেত্তুন্ এদক্ মান্‌জ্যর ভিড় দেগিলুং, তারারে কেঅ গুণি ন-পারিলাক্। ধুব্ কাবড় উরিনে তারা সেই সিংহাসন আর ভেড়া-ছবুয়ো মুজুঙোত্ খাজোর্ পাদা আঢত্ গুরিনে থিয়্যেই এলাক্।

¹⁰ তারা দাঙর্ গুরি রঅ ছাড়িনে কলাক্: “যিবে সিংহাসনত্ বৈ আঘে, আমার সেই গোজেন আর ভেড়া-ছবো আঢত্ পাপত্তুন্ উদ্ধোরান আঘে।”

¹¹ সে পরেদি স্বর্গদূত্‌তুনে বেক্কুনে সেই সিংহাসনর, নেতাগুনোর আর চের্‌‌বো জেদা প্রাণীর চেরোকিত্যেদি থিয়্যেলাক্। তারা সিংহাসন মুজুঙোত্ মাঢা নিগুরিনে গোজেনরে সালাম গুরিনে কলাক্,

¹² “আমেন। নাঙ্ গিনেনা, বাঈনী গরানা, জ্ঞান, ভালেদি জানানা, সর্মান, খেমতা আর বল্ উমরত্যে আমা গোজেনরই ওক্‌। আমেন।”

¹³ সেক্কে এক্কো নেতা মরে কলঅ, “ধুব্ কাবড় উজ্জ্যে এ মানুচ্চুন কন্না? আর কুত্তুনই বা ইগুনে এচ্চ্যন্?”

¹⁴ মুই তারে কলুং, “চাহ্, সিয়েন তুয়ই কোই পারচ্।” তে মরে কলঅ, “সেই অমকদ দুঘোত্তুন্ যিগুনে এচ্চ্যন ইগুনে সিগুনই। ইগুনে তারার্ কাবড়ানি ভেড়া-ছঅ লো-লোই ধোইনে ধুব্ গোজ্জ্যন।

¹⁵ সেনত্যে ইগুনে গোজেনর্ সিংহাসন মুজুঙোত্ আঘন আর স্বর্গর্ উবোসনা-ঘরত্ ইগুনে দিন-রেত্ তারে সেবা গত্তন্। যিবে সিংহাসন উগুরে বুয়োই আঘে তেয়ই ইগুনো উগুরে তা তাম্বুলান খাদেব।

¹⁶ ইগুনোর্ আর পেট্ ন-পুরিবো, তিরেচ্অ ন-পেবঅ; বেলানর্ তেজ্‌‌চান ইগুনো কিয়্যেত্ আর ন-লাগিবো,

¹⁷ কিয়া সেই ভেড়া-ছবুয়ো যিবে সিংহাসন উগুরে বৈ আঘে তেয়ই ইগুনোর্ গরক্ অবঅ। তাজা পানির উইফুদ ইধু তে ইগুনোরে নেযেব, আর গোজেনে ইগুনোর চোগো পানি পুঝি দিবো।”