ফগদাং পেইয়্যে 6 - Chakma Bible

সীলমহ্‌‌‌রুন

¹ ভেড়া-ছবো যেক্কে সেই সাত্‌টো সীলমহ্‌‌রর পত্তম্মো ভাঙের্ সেক্কে মুই রিনি চেলুং; আর মুই সেই চের্‌বো জেদা প্রাণী ভিদিরে এক্কোরে দেবা পেরাগ পড়েদে ধোক্ক্যেন আবাজ রলোই কধা কধে শুনিলুং, “আয়।” সেক্কে মুই এক্কো ধুব্ ঘোড়া দেগিলুং।

² যিবে তা উগুরে বৈ এলঅ তা আঢত্ এক্কান ধনু এলঅ। তারে এক্কো মুকুট দিয়া অলঅ আর তে জিত্যেদে ধোক্ক্যেন নিগিলিনে জয় গত্তে গত্তে গেলঅ।

³ ভেড়া-ছবো যেক্কে দ্বিলম্বর সীলমহ্‌রবো ভাঙিলো সেক্কে মুই দ্বিলম্বর জেদা প্রাণীবোরে কধে শুনিলুং, “আয়।”

⁴ সেক্কে আগুনো ধোক্ক্যেন রাঙা অন্য এক্কো ঘোড়া নিগিলি এলঅ। যিবে সেই ঘোড়াবো উগুরে বৈ এলঅ তারে পিত্‌থিমীত্তুন্ শান্তিগান তুলি লবার খেমতা দিয়্যে অলঅ, যেনে মান্‌জ্যে একজন আরেকজনরে মারে ফেলায়। তারে এক্কান দাঙর্ তরবারিয়ো দিয়্যে অলঅ।

⁵ ভেড়া-ছবো যেক্কে তিন লম্বর সীলমহ্‌রবো ভাঙিলো সেক্কে মুই তিন লম্বর জেদা প্রাণীবোরে কধে শুনিলুং, “আয়।” সে পরেদি মুই এক্কো কালা ঘোড়া দেগিলুং। যিবে সেই ঘোড়াবো উগুরে বৈ এলঅ তা আঢত্ এক্কো পাল্লা এলঅ।

⁶ আর মুই সেই চের্‌বো জেদা পরাণবলাগুনোর্ সংমধ্যে কাররে কধে শুনিলুং, “এক্কো কামগুরিয়্যের্ এক দিনোর আয় বানা এক সের্ গম বা তিন সের্ কেচ্‌বিজি পাহ্ যায়। তেল আর আঙ্গুর-রচ্‌‌সান তুই বর্‌বাদ ন-গুরিচ।”

⁷ ভেড়া-ছবো যেক্কে চের-লম্বর সীলমহ্‌র ভাঙিলো সেক্কে মুই চের-লম্বর জেদা প্রাণীবোরে কধে শুনিলুং, “আয়।”

⁸ সেক্কে মুই এক্কো য়্যেল্ রঙর্ ঘোড়া দেগিলুং। যিবে সেই ঘোড়াবো উগুরে বৈ এলঅ তা নাঙান্ মরণ; আর মরণর্ জাগায়ান ঠিগ্ তা পিজে পিজে আদের্। পিত্‌থিমীর চের্ ভাগর এক ভাগ উগুরে তারারে খেমতা দিয়্যে অলঅ, যেন তারা ছুরি, ভাদরাদ্, মরণ আর পিত্‌থিমীর ঝার্‌বো য়েমান্দোই মানুচ্চুনোরে মারে ফেলান।

⁹ যেক্কে তে পাঁচ-লম্বর সীলমহ্‌রবো ভাঙিলো সেক্কে মুই এক্কো ডালিপূজো তলে এমন্‌ বেক্‌ মানুচ্চুনোর আত্মাগানি দেগিলুং যিগুনোরে গোজেনর্ কধানিত্যে আর সাক্ষ্য দিবাত্যে মারে ফেলা ওইয়্যে।

¹⁰ তারা দাঙর্ দাঙর্ রঅ ছাড়িনে কলাক্, “ও পবিত্র আর সত্যময় প্রভু, যিগুনে এ পিত্‌থিমীর, তারারে বিচের্ গত্তে আর তারা উগুরে আমার লোর্ হেনা শুজোধে তুই আর কদক্ দেরি গুরিবে?”

¹¹ সেক্কে তারারে পত্তিজনরে এক্কান গুরি ধূব্ পোজাক্ দিয়্যে অলঅ আর কুয়ো অলঅ, তারার সমাজ্জ্যে আর ভেইয়ুনোরে, যিগুনোরে তারা ধোক্ক্যেন গুরি মারে ফেলা অবঅ তারা জনেদি ন-পুরোনা সং তারা যেন আরঅ কিজু কাল বাজ্জ্যেই থান্।

¹² সে পরেদি মুই দেগিলুং, তে যেক্কে ছ'লম্বর সীলমহ্‌রবো ভাঙিলো সেক্কে ভারী ভূজোল্ বেলঅ। বেলান্ এক্কুবারে কালা ওই গেলঅ আর গোদা চানান্ লো ধোক্ক্যেন রাঙা ওই উদিলো।

¹³ জোরে বৈয়্যের্ বেলে যেধোক্ক্যেন গুরি ডোমোর গুলোগুন বে-অক্‌তদ্ পড়ন ঠিগ্ সেধোক্ক্যেন গুরি আগাজর্ তারাগুন পিত্‌থিমী উগুরে ঝরি পড়িলাক্।

¹⁴ ভাজ্ গুরি থোইয়্যে কাগোজ ধোক্ক্যেন আগাজ্‌চান ভাজ্ ওই গেলঅ; আর পত্তি মোন্‌মুড়ো আর দ্বীপ নিজোর্ নিজোর্ জাগানত্তুন্ সরি গেলাক্।

¹⁵ পিত্‌থিমীর বেক্‌ রাজাগুনে আর বেগ দাঙর্ নেতাবো, সেনাপতি, থাগোইয়্যে আর খেমতাবলা মানুচ্‌, পত্তি চাগর আর চাগর নয়দে মানুচ্‌ মোন্‌মুড়ো হুলুঙে হুলুঙে আর পাত্তর আন্দলে আন্দলে নিজোরে লুগেলাক্।

¹⁶ তারা মোন্‌মুড়ো আর পাত্তরুনোরে কলাক্, “আমা উগুরে পড় আর যিবে সেই সিংহাসন উগুরে বৈ আঘে তা মুয়ো মুজুঙোত্তুন্ আর ভেড়া-ছবোর্ রাগত্তুন্ আমারে লুগেই থঅ,

¹⁷ কারন তারার্ রাগ ফগদাঙর্ সেই দাঙর্ দিন্নো লুম্মেগি, আর কন্না তা মুজুঙোত্ থিয়্যেই থেই পারে?”