ফগদাং পেইয়্যে 4 - Chakma Bible

স্বর্গর সিংহাসন

¹ ইয়েন পরেদি মুই স্বর্গর এক্কান দুয়োর্ খুলো দেগিলুং। তূরী আবাজ ধোক্ক্যেন যিবের্ মুয়ো রবুয়ো আগেদি মুই শুন্ন্যং তে মরে কলঅ, “তুই ইধু উদি আয়। ইয়েনর্ পরেদি যিয়েনি হামাক্কায় ঘুদিবাত্যে যার্ সিয়েন মুই তরে দেগেম।”

² আর সেলক্কে মুই পবিত্র আত্মার চালে স্বর্গত্ এক্কান সিংহাসন দেগিলুং। মুই দেগিলুং, সেই সিংহাসনত্ একজন বৈ আঘে।

³ তা চেঙারাগান্ ঠিগ্ হীরা আর সার্দীয় মণি ধোক্ক্যেন। সিংহাসনানর চেরোকিত্ত্যেদি এক্কান রান্‌‌জনী এলঅ; সিয়েন দেগদে ঠিগ্ এক্কান পান্না ধোক্ক্যেন।

⁴ সেই সিংহাসনানর চেরোকিত্যেদি আরঅ চব্বিচ্চান সিংহাসন এলঅ, আর সেই সিংহাসনানিত্ চব্বিচ্‌জন নেতা বৈ এলাক্। তারার পোজাগ্‌কানি এলঅ ধুব্ আর তারার মাঢাত্ সনার মুকুট এলঅ।

⁵ সেই সিংহাসনানত্তুন্ ঝিমিলেনি, দর্‌গরেপারা রঅ আর দেবাপেরাগর্ আবাজ্ নিগিলের্। সিংহাসনান মুজুঙোত্ সাত্‌টো বাট্টি জ্বলের্। সেই বাট্টিগুন গোজেনর্ সাত্‌টো আত্মা।

⁶ সেই সিংহাসনান মুজুঙোত্ যেন ফুদিগো ধোক্ক্যেন পোত্‌পোত্যে এক্কান কাচ ধোক্ক্যেন সাগর এলঅ। সেই সিংহাসনান সংমধ্যে সিংহাসনানর চেরোকিত্যেদি চেরজন জেদা পরাণবলা এলাক্। সিগুনোর্ মুজুঙেদি আর পিজেদি চোগ্‌কোই ভরণ এলাক্।

⁷ পত্তম জেদা পরাণবলাবোর চেঙারাগান্ সিংহ ধোক্ক্যেন, দ্বি-লম্বরবো গোরুছঅ ধোক্ক্যেন, তিন-লম্বরবো মান্‌জ্য ধোক্ক্যেন আর চের-লম্বরবো উড়েদে ঈগল পেগো ধোক্ক্যেন।

⁸ এই চের্‌বো জেদা পরাণবলার্ পত্তিবোর্ ছ'গান গুরি ডুয়ো এলঅ আর বেক্‌ জাগানিত্ চোগ্‌কোই ভরণ এলঅ। সেই পরাণবলাগুনে দিনে-রেদে এ কধাগান কধন্, “বেগত্তুন্ খেমতাবলা প্রভু গোজেন, যিবে এলঅ, যিবে আঘে আর যিবে এজের্, তে পবিত্র, পবিত্র, পবিত্র।”

⁹ উমরত্যে জেদা প্রভু গোজেন, যিবে সিংহাসনত্ বৈ আঘে, এই জেদা পরাণবলাগুনে যেলক্কে তারে বাঈনী, সর্মান আর ভালেদি জানায়,

¹⁰ সেক্কে সেই চব্বিচ্‌জন নেতা সিংহাসনর অধিকারী, অত্তাৎ যিবে উমরত্যে জেদা আঘে তারে মাঢা নিগুরিনে সালাম গরন্। এই নেতাগুনে সেক্কে সেই সিংহাসনান মুজুঙোত্ তারার মুকুট্‌তুন খুলি থোইনে কদন্দে,

¹¹ “আমার প্রভু আর গোজেন, তুই বাঈনী, সর্মান আর খেমতা পেবার যগাজ্যে, কিয়া তুয়ই বেক্কানি সৃট্টি গোজ্জ্যস্; আর তরই আওজে সিয়েনি বেক্কানি সৃট্টি ওইয়্যে আর থিগি আঘে।”