ফগদাং পেইয়্যে 3 - Chakma Bibleসার্দি মন্ডলী ইধু 1 সার্দি শঅরর্ মন্ডলীর দূত্তো ইধু এ কধাগান লেগ- গোজেনর্ সাত্টো আত্মা আর সাত্টো তারা যিবে ধুরি আঘে তে এই কধাগান কর্: মুই তর্ কামর্ কধানি কোই পারং। জেদা আঘচ্ বিলিনে তর্ গম সুনাঙ্ আঘে, মাত্তর্ আজলে তুই মরা। 2 তুই জাগি উঠ্ আর বাদবাগী যিয়েনি মরেদে ধোক্ক্যেন ওইয়্যে সিয়েনি দরমর গুরি তুল্, কিত্যেই মঅ গোজেন মুজুঙোত্ তর্ কনঅ কাম মুই থুম অদে ন-দেগং। 3 ইয়েনত্যে যিয়েন তুই পেইয়োচ্ আর শুন্ন্যচ্ সিয়েন ইদোত্ তুল্ আর পালন গর্, আর এ অবস্থাত্তুন্ মনান ফিরা। যুনি তুই জাগি ন-উদোচ্ সালে মুই চুরো ধোক্ক্যেন এইম্, আর মুই কন্ অক্তদ্ তইধু এইম্ সিয়েন তুই হবর্অ ন-পেবে। 4 মাত্তর্ সার্দিত তর্ এন্ কয়েক্কো মানুচ্ আঘন যিগুনে তারার্ কাবর-চুগোর্, অত্তাৎ চালচলনান্ কাজর্ ন-গরন্। তারা যগাজ্জ্যে মানুচ্ বিলিনে ধুব্ কাবর পিনিনে মঅ সমারে আঢাউদো গুরিবাক্। 5 যে জিদিবো তে এবাবোত্যে ধুব্ পোজাক্ পিনিবো। জিংকানি-বোইবোত্তুন্ তা নাঙান্ মুই কনদিনঅ পুঝি ন-ফেলেম, বরং মঅ বাব্পো আর তা দুত্তুনো মুজুঙোত্ মুই তারে স্বীগের্ গুরি নিম। 6 যিবের শুনিবার কান আঘে তে শুনোক্, পবিত্র আত্মা মন্ডলীগুনোরে কি কর্। ফিলাদিল্ফিয়া মন্ডলী ইধু 7 ফিলাদিল্ফিয়া শঅরর্ মন্ডলী দূত্তো ইধু এ কধাগান লেগ- যিবে পবিত্র আর সত্য, যাইধু দায়ূদোর চাবি আঘে, যিবে খুলিলে কেঅ বানি ন-পারে আর বানিলে কেঅ খুলি ন-পারে, 8 তে এ কধাগান কত্তে: মুই তর্ কামর কধানি কোই পারং। চা, মুই তঅ মুজুঙোত্ এক্কান খুল্ল্যে দুয়োর্ থোলুং যিয়েন বানিবার খেমতা কারঅ নেই। মুই কোই পারং তর্ বল্ ভারী কম, মাত্তর্ তো তুই মঅ কধানি পালেয়োচ্ আর মরে অস্বীগের্ ন-গরচ্। 9 যিগুনে নিজোরে যিহূদী কন্ অদচ যিহূদী নয়, শদানর্ দলর সেই মিজেমাদিয়্যে মানুচ্চুনোরে মুই তইধু আনিম আর তঅ টেঙত্ তলে সালাম গোরেম, আর তারারে জানেই দিম যে, মুই তরে কোচ্পাং। 10 ধৈয্য ধুরিবার যে উগুমান যে মুই দুয়োং সিয়েন তুই পালেয়োচ্; সেনত্যে এ পিত্থিমীগান উগুরে যে দুঘোর্ সময় এজের্ সেই সময়ত্তুন্ ধুরি মুই তরে রোক্ষ্যে গুরিম। যিগুনে এ পিত্থিমীর তারারে যগা চেবাত্যে এ দুঘোর্ সময়ান এবঅ। 11 মুই সবরে এজঙর্। তর্ যিয়েনি আঘে সিয়েনি দরমর গুরি ধুরি থঅ, যেন কেঅ তর্ জিদেনার্ বক্শিজ্চান কাড়ি ন-লয়। 12 যে জিদিবো তারে মুই মর্ গোজেন ঘরর্ এক্কো খুদো বানেম; তে আর কনদিন্অ বারেদি ন-যেবঅ। মুই তা উগুরে মর্ গোজেনর্ নাঙান্ আর মর্ গোজেনর্ শঅরানর্ নাঙান লিগিম। নুয়ো যিরূশালেমানই সেই শঅরান্। স্বর্গ ভিদিরেত্তুন্ মঅ গোজেন ইত্তুন এ শঅরান্ লামি এবঅ। যে জিদিবো মুই তা উগুরে মর্ নুয়ো নাঙান্অ লিগিম। 13 যিবের শুনিবার কান আঘে তে শুনোক্, পবিত্র আত্মা মন্ডলীগুনোরে কি কর্। লায়দিকেয়া মন্ডলী ইধু 14 লায়দিকেয়া শঅরর্ মন্ডলী দূত্তো ইধু এ কধাগান লেগ- যিবে আমেন, যে বিশ্বেজি আর সত্য সাক্ষী, যিবে গোজেনর্ সৃট্টির গড়াগান, তে এ কধাগান কর্: মুই তর্ কামর কধানি কোই পারং। 15 তুই জুরোয়ো নয়, গরম্অ নয়। তুই অয় জুরো ন-অয় গরম অলে গম অদঅ। 16 মাত্তর্ তুই নয় জুরো নয় গরম, সেনত্যে মুই তরে মঅ মুয়োনত্তুন্ চেফ ধোক্ক্যেন গুরি ফেলেই দিম। 17 তুই কত্তে, মুই থাগোইয়্যে; মুই দাঙর্ মানুচ্ ওইয়োং, সেনত্যে মর্ কনঅ কিজুর্ অভাব নেই। ভারী গম, মাত্তর্ তুই দঅ হবর্ ন-পাজ্, তুই দুখ্যে, দোয়্যের্ মানুচ্, নাঢা, কানা আর লাংদা। 18 সেনত্যে মুই তরে এ উপদেচ্চান দোঙর-তুই মত্তুন্ আগুনোত্ পুজ্জ্যে খাটি সনা কিনি লঅ যেন তুই থাগোইয়্যে ওই পারচ্। মত্তুন্ ধূব্ কাবর কিনিনে পিন্ যেন তর্ লাংদা থানার লাজ্চান দেগা ন-যায়। মত্তুন্ চোগোত্ দিবার মলম কিনি লঅ যেন তুই দেগচ্। 19 মুই যিগুনোরে কোচ্পাং সিগুনোরে দুষ্ দেগেই দুয়োং আর শাসন গরং। সেনত্যে এ অবস্থাত্তুন্ মনানি ফিরেবাত্যে আওজি অং। 20 চঅ, মুই দুয়োরান ইধু থিয়্যেইনে বাজ্জাঙর্। কেঅ যুনি মর্ মুয়ো রবুয়ো শুনিনে দুয়োরান খুলি দে সালে মুই ভিদিরে তাইধু যেইম্ আর তা সমারে হানা-দানা গুরিম, আর তেয়ো মঅ সমারে হানা-দানা গুরিবো। 21 “মুই জিদিনেই যেধোক্ক্যেন গুরি মঅ বাবা সমারে তা সিংহাসনানত্ বোস্যং, ঠিগ্ সেধোক্ক্যেন যে জিদিবো তারে মুই মঅ সমারে মঅ সিংহাসনানত্ বুজিবার্ অধিকার দিম। 22 যিবের শুনিবার কান্ আঘে তে শুনোক্, পবিত্র আত্মা মন্ডলীগুনোরে কি কর্।” |
Copyright © 2021 Bangladesh Bible Society
Bangladesh Bible Society