ফগদাং পেইয়্যে 21 - Chakma Bibleনুয়ো যিরূশালেম 1 সে পরেদি মুই এক্কান নুয়ো স্বর্গ আর এক্কান নুয়ো পিত্থিমী দেগিলুং। পত্তম স্বর্গগান আর পত্তম পিত্থিমীগান থুম্ ওই যেয়্যে আর সাগরান্অ আর দেগা ন-গেলঅ। 2 যেরেদি মুই সেই পবিত্র শঅরানরে, অত্তাৎ নুয়ো যিরূশালেমানরে স্বর্গ ভিদিরেত্তুন্ আর গোজেন ইত্তুন লামি এত্তে দেগিলুং। বৌরে যেধোক্ক্যেন গুরি তা জামেইবোত্যে সাজা অয়, এই শঅরানরেয়ো ঠিগ্ সেধোক্ক্যেন গুরি সাজা ওইয়্যে। 3 সে পরেদি মুই একজনরে সেই সিংহাসনত্তুন্ জোরে এ কধাগান কধে শুনিলুং, “ইক্কিনে মান্জ্য ভিদিরে গোজেনর্ থেবার জাগা ওইয়্যে। তে মান্জ্য সমারে থেবঅ আর তারা তা মানুচ্ অবাক্। তে নিজেই মান্জ্য সমারে থেবঅ আর তারার্ গোজেন অবঅ। 4 তে তারার্ চোগো পানি পুজি দিবো। মরণ আর ন-অবঅ; দুঘ্, কানানা, আর পীড়ে আর্ ন-থেবঅ, কিয়া আগর্ বেক্কানি থুম্ ওই যেয়্যে।” 5 যিবে সেই সিংহাসনত্ বৈ এলঅ, তে কলঅ, “চঅ, মুই বেক্কানি নুয়ো গুরি বানাঙর্।” যেরেদি তে আরঅ কলঅ, “এ কধাগান লেগ, কিয়া এ কধানি বিশ্বেজ্ গুরিবার আর সত্য।” 6 মরে তে আরঅ কলঅ, “থুম্ ওইয়্যে। মুই আল্ফা আর ওমিগা-আরাম্ভ আর থুম্। যাত্তুন্ তিরেচ্ পেয়্যে মুই তারে জিংকানি-পানির্ পয়নালাত্তুন মাগানা পানি হেবাত্যে দিম। 7 যে জিদিবো তে ইয়েনি বেক্কানির অধিকারী অবঅ। মুই তার্ গোজেন ওম্ আর তে মর্ পুয়ো অবঅ। 8 মাত্তর্ জ্বোল্জোল্যে আগুন আর গন্ধকর্ পুয়োর ভিদিরে থানা অবঅ দোরেয়্যে গুনোর্, অবিশ্বেজি, ঈচ্ গরা হেইয়্যে, পর্পাগোল্যে, যাদুকর, মূত্তি পূজো গুরিয়্যে আর বেক্ মিজে মাদিয়্যেগুনোর শেজ্ দজা। ইবেয়ই অলঅ দ্বি বার্ মরাণা।” 9 যে সাতজন স্বর্গদূতো আঢত্ শেজ্ সাত্তান আঘাত-ভরা সাত্টো কদরা এলঅ তারাত্তুন্ একজনে মইধু এইনে কলঅ, “আয়, মুই তরে বৌ, অত্তাৎ ভেড়া-ছবোর্ মোগ্কোরে দেগাং।” 10 যেরেদি সেই স্বর্গদূত্তো মরে এক্কো দাঙর্ আর অজল্ মূড়োত্ নেযেল। সেক্কে মুই পবিত্র আত্মায় পরিচালিত এলুং। গোজেনর্ মহিমালোই জ্বোল্জোল্ল্যে যে পবিত্র শঅরান যিরূশালেম স্বর্গর্ ভিদিরেত্তুন্ আর গোজেনত্তুন্ লামি এজের্ তে মরে সিয়েন দেগেল। 11 সেই শঅরানর্ চোক্চোক্ক্যেকান্ ভারী বেশ্ পাত্তরর্ চোক্চোক্ক্যে ধোক্ক্যেন, ফুদিগো ধোক্ক্যেন তেল্তেল্যে হীরা ধোক্ক্যেন। 12 সেই শঅরানর্ এক্কান দাঙর্ অজল্ দেবাল এলঅ আর সেই দেবালানিত্ বারজন স্বর্গদূত্ এলাক্। ইস্রায়েল জাদর্ বার গুট্টির নাঙ্ সেই গেট্তুনো উগুরে লেগা এলঅ। 13 গেট্তুনো ভিদিরে তিন্নো এলঅ পূগেদি, তিন্নো উত্তোরেদি, তিন্নো দোগিণেদি আর তিন্নো পোজিমেদি এলঅ। 14 সেই শঅরর্ দেবালানির্ বারবো খুদো গাড়েয়্যে এলঅ আর সিগুনো উগুরে ভেড়া-ছবোর্ বারজন দূতোর্ বারগান নাঙ্ লেগা এলঅ। 15 যিবে মঅ লগে কধা কোইয়্যে তা আঢত্ এক্কো সনার্ মাবেদে লুদিক্ এলঅ, যেন তে সেই শঅরান্, তার্ গেট্তুন আর তার দেবালান্ মাবি পারে। 16 শঅরান্ চেরকিত্যে-লাম্বা আর পাধাজ্জ্যেদি সং। যেরেদি তে সেই মাবিবার লুদিক্কোলোই শঅরান্ মাবিলে পরেদি দেগা গেলঅ সিয়েন লাম্বা, পাধাজ্জ্যে আর অজলদি দ্বি আজার চের্শ কিলোমিটার। 17 যেরেদি তে দেবালান্ মাবিলে পরেদি সিয়েন অজলদি অলঅ একশ চৌচোল্লিশ্ আঢ্। মান্জ্যে যেধোক্ক্যেন গুরি মাবন্ সেই স্বর্গদূত্তো সেধোক্ক্যেন গুরি মাপ্প্যে। 18 হীরালোই দেবালান্ বানেয়্যে এলঅ আর শঅরান্ এলঅ সাব্গোজ্যে ফুদিগো ধোক্ক্যেন খাটি সনালোই বানেয়্যে। 19 সেই শঅরানর্ দেবাল গড়াগানিত্ নানান্ বাবোত্যে মংগা পাত্তর্ বোজেয়্যে এলঅ। পত্তম গড়াগান হীরের্, দ্বিলম্বরান নীলকান্তমণির, তিন লম্বরান তাম্রমণির, চের্ লম্বরান পান্নার, 20 পাচ্ লম্বরান সূর্যকান্তমণির, ছয় লম্বরান সার্দীয়মণির, সাত লম্বরান পোখরাজর, আস্তো লম্বরান বৈদুর্যমণির, নয় লম্বরান পীতমণির, দশ লম্বরান উপলের, এগার লম্বরান ফিরোজামণির আর বার লম্বরান পদ্মরাগর। 21 বারবো গেইট্ এলাক্ বারবো মুক্তো। পত্তি গেইট্ এক্কো এক্কো মুক্তোলোই বানেয়্যে এলঅ। শঅরর্ পধ্তান্ সাব্ ফুদিগো ধোক্ক্যেন খাটি সনালোই বানেয়্যে এলঅ। 22 মুই সেই শঅরর্ কনঅ উবোসনা-ঘর ন-দেগিলুং, কারন বেগত্তুন্ খেমতাবলা প্রভু গোজেন আর ভেড়া-ছবোই এলাক্ সেই শঅরানর্ উবোসনা-ঘর। 23 সেই শঅরানরে পহ্র দিবাত্যে বেলান্ বা চানানর্ কনঅ দরকার নেই, কিয়া গোজেনর্ মহিমাই সিয়েনত্ পহ্র দে আর ভেড়া-ছবো সিয়েনত্ চেরাগ; 24 আর বেক্ জাদ্তুনে সেই পহ্রত্ আঢাউদো গুরিবাক্। পিত্থিমীর রাজাগুনে তারার্ সয়সাগোজ্জ্যেলোই সেই শঅরত্ এবাক। 25 দিনোত্ সেই গেইট্তুন কনদিনঅ বন্ধ ন-থেবঅ আর সিয়েনত্ রেত্অ ন-অবঅ। 26 বেক্ জাদ্তুনোর বাঈনী আর সর্মান সিয়েনত্ আনা অবঅ। 27 অসিজি কনঅ কিজু বা জঘন্য কাম গরে বা মিজে কধা কয় এমন কনঅ মানুচ্ সিয়েনত্ সোমেই ন-পারিবাক্; যিগুনোর নাঙানি ভেড়া-ছবোর্ জিংকানি বোইবোত্ লেগা আঘে তারা বানা সিয়েনত্ সোমেই পারিবাক্। |
Copyright © 2021 Bangladesh Bible Society
Bangladesh Bible Society