ফগদাং পেইয়্যে 19 - Chakma Bible

গোজেনর্ বাঈনী গরানা

¹ ইয়েন পরেদি মুই স্বর্গত্ ভালোক্কুন মান্‌জ্যর ঝাগঅ রঅ শুনিলুং। তারা কধন্দে “হাল্লেলূয়া! উদ্ধোর্, বাঈনী আর খেমতা, বেক্কানি আমা গোজেনর্,

² কিয়া তার্ বিচেরান সত্য আর ন্যায্য। যে তার্ পর্‌পাগোল্যেলোই গোদা পিত্‌থিমীগানরে অসিজি গোজ্জ্যে সেই দাঙর্ বেশ্যেবোরে গোজেনে সাজা দিয়্যে আর তা চাগরুনোর্ লোর্ হেনা সুজোনাগান তে তা উগুরে নেযেয়্যে।”

³ তারা দ্বিবার্ কলাক্, “হাল্লেলূয়া! তা ভিদিরেত্তুন্ উমর সং ধূমো উদোনাত্ থেবঅ।”

⁴ গোজেন, যিবে সিংহাসনত্ বৈ আঘে তারে সেই চব্বিচ্‌জন নেতা আর সেই চের্‌বো জেদা প্রাণী মাঢা নিগুরিনে সালাম গুরিনে কলাক্, “আমেন। হাল্লেলূয়া!”

⁵ সেক্কে সিংহাসনত্তুন্ একজনে কলঅ, “গোজেনর্ চাগরুন আর তুমি যিগুনে গোজেনরে ভোক্তি গুরিনে দরঅ, তুমি চিগোন-দাঙর্ বেক্কুনে আমা গোজেনর্ বাঈনী গরঅ।”

⁶ সে পরেদি মুই ভালোক্কুন্ মান্‌জ্যর্ ঝাগঅ রঅ, জোরে বেঈ যেইয়্যে গঙার পানি রঅ আর জোরে দেবা পেরাগ রঅ ধোক্ক্যেন গুরি কোইয়্যে এ কধাগান শুনিলুং, “হাল্লেলূয়া! আমার বেগত্তুন্ খেমতাবলা প্রভু গোজেনে রাজাগিরি গরানা আরাম্ভ গোজ্জ্যে।

⁷ এজঅ, আমি মন হুজিয়ে বেশ্ গুরি ফুত্তি গুরিই আর তার্ বাঈনী গুরিই, কিয়া ভেড়া-ছবোর্ মেলা গুরিবার অক্ত ওইয়্যে আর তার্ বৌবো নিজোরে যুক্কোল্ গোজ্জ্যে।

⁸ চোক্‌‌চোক্যে, সাব্ আর নিগুজ্ কুজি কাবড় তারে পিনিবাত্যে দিয়্যে ওইয়্যে। সেই কাবড়ান অলঅ গোজেন মানুচ্চুনোর ধর্ম লক্কণ।”

⁹ সে পরেদি সেই স্বর্গদূত্‌তো মরে কলঅ, “এ কধাগান লেগ, ‘ভেড়া-ছবোর্ মেলাত্ যিগুনোরে বাত্যেনা ওইয়্যে তারা বর্‌পেইয়্যে।’ ” তে এ কধাগানঅ কলঅ, “ইয়েন গোজেনর্ কধা আর সিয়েন সত্য।”

¹⁰ সেক্কে মুই সেই স্বর্গদূত্‌তোর টেঙ ইধু মাঢা নিগুরিনে তারে গোজেনর্ সর্মান দিইনে সালাম গুরিলুং। মাত্তর্ তে মরে কলঅ, “ইয়েন কি গরর্? মুই তর্ সমাজ্জ্যে চাগর্। গোজেনরে সালাম গর্। তর্ বিশ্বেজি ভেইয়ুন, যিগুনে যীশুর্ শিক্ষ্যে ধুরি থান্, মুই তারাত্তুন্ একজন। যিশুর্ শিক্ষ্যেগান অলদে ভাববাদীগুনোর শিক্ষ্যের্ আজল্ কধা।”

রাজাগুনোর্ রাজা, প্রভুগুনোর প্রভু

¹¹ যেরেদি মুই দেগিলুং স্বর্গগান খুলো আঘে, আর সিয়েনত্ এক্কো ধুব্ ঘোড়া আঘে। যিবে সেই ঘোড়াবো উগুরে বৈ এলঅ তা নাঙান্ অলঅ বিশ্বেজবলা আর সত্য। তে গমেডালে বিচের্ আর যুদ্ধো গরে।

¹² তা চোগ্‌‌কুন জ্বোল্‌‌জোল্যে আগুনো ধোক্ক্যেন আর তা মাঢাবোত্ ভালোক্কুন মুকুট এলাক্। তা কিয়্যেনত্ এন্ এক্কান নাঙ্ লেগা এলঅ, যে নাঙান্ তে নিজে বাদে আর কেঅ কোই ন-পারন্।

¹³ তা কিয়্যেনত্ এলঅ লো-ত্ বুড়েইয়্যে কাবড়, আর তা নাঙান্ অলঅ গোজেনর্ কধা।

¹⁴ স্বর্গর্ সৈন্যদলুনে ধুব্ সাব্ মসীনার্ কাবড় পিনিনে ধুব্ ঘোড়াত্ চড়িনে তা পিজে পিজে যাদন্।

¹⁵ তে যেন বেক্‌ জাদ্‌‌তুনোরে আঘাত্ গুরি পারে সেনত্যে তা মুয়োত্তুন্ এক্কান ধারেয়্যে ছুরি নিগিলি এজের্। তে লুয়োর্ লুদিক্কোই বেক্‌ জাদ্‌‌তুনোরে শাসন গুরিবো আর আঙ্গুর মাড়িবার গাঢত্ তে আঙ্গুর টেঙোই মাড়িবো। এই আঙ্গুর মাড়িবার গাঢ্‌‌তো অলঅ বেগত্তুন্ খেমতাবলা গোজেনর্ দর্‌‌গরেপারা রাগ্‌‌কান।

¹⁶ তার্ পোজাগত্ আর দামানাত্ এ নাঙান্ লেগা আঘে, “রাজাগুনোর রাজা, প্রভুগুনোর প্রভু।”

¹⁷ যেরেদি মুই এক্কো স্বর্গদূতোরে বেলান ভিদিরে থিয়্যেই থাগদে দেগিলুং। যিদুক্কুন পেগে আগাজত্ উত্ত্যন্ তে তারারে বেক্কুনোরে জোরে রঅ ছাড়িনে কলঅ, “এজঅ, গোজেনর্ দাঙর্ হানাগান হেবাত্যে এক সমারে এগত্তর্ অ,

¹⁸ যেন তুমি রাজা, সেনাপতি, বোলী মানুচ্‌, ঘোড়া আর সেই ঘোড়াত্ চোজ্জ্যে মানুচ্চুনোরে, গিরোজ্ আর চাগরুনোর আর চিগোন-দাঙর বেক্‌ মানুচ্চুনোর য়েরানি হেই পারঅ।”

¹⁹ সে পরেদি মুই দেগিলুং, যিবে সেই ঘোড়াবো উগুরে বৈ এলঅ তার আর তা সৈন্যগুনোর বিরুদ্ধে যুদ্ধো গুরিবাত্যে সেই য়েমান্নো আর পিত্‌থিমীর রাজাগুনে তারার্ সৈন্যগুন লোইনে এক সমারে থুবেইয়োন।

²⁰ সেই য়েমান্নোরে ধরা অলঅ আর যে ফক্কর্ ভাববাদীবো তার্ ওইনে আমক্ কাম গত্ত তারেয়ো ধরা অলঅ। যিগুনে সেই য়েমান্নোর্ চিহ্নোগান মানি লোইয়োন আর তা মূত্তিবোর পূজো গুরিদাক্ সেই ভন্ড ভাববাদীবো সেই আমক্ কামানিলোই তারারে ভুলেই রাগেয়্যে। জ্বোল্‌‌‌জোল্যে গন্ধক আগুনো হ্রদত্ জেদাবাদে এ দ্বিজনরে ফেলেই দিয়্যে অলঅ।

²¹ যিবে সেই ধুব্ ঘোড়াবো উগুরে বৈ এলঅ তা মুয়োত্তুন্ যে ছুরিগান নিগিলি এচ্চ্যে সিয়েন্দোই তারার্ অন্য বেক্‌ সমাজ্জ্যেগুনোরে মারে ফেলা অলঅ। সিয়েনর্ কারনে পেগ্‌‌‌কুনে পেট ভরে সং তারার্ য়েরানি খেলাক্।